សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដេប៉ូប្រេងឥន្ធនៈចំនួន៦ ក្នុងខេត្តឧត្តរមានជ័យ ខេត្តកំពង់ឆ្នាំង ខេត្តកំពង់ស្ពឺ ខេត្តសៀមរាប ខេត្តកំពត និងខេត្តកំពង់ធំ ត្រូវបាន មន្ត្រី ក.ប.ប. បន្តរកឃើញភាពមិនអនុលោមក្នុងការប្រកបអាជីវកម្ម។ នេះបេីយោងតាមប្រភពព័ត៍មានពីអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានឱ្យដឹងកាលពីយប់ថ្ងៃទី១៥ ខែកក្កដា ឆ្នាំ២០២២។
ប្រភពដដែលបន្តថា តាមរយៈការត្រួតពិនិត្យរបស់មន្ត្រីស៊ើបអង្កេត ក.ប.ប. ប្រចាំនៅខេត្តខាងលើ នៅថ្ងៃទី១៣-១៤ ខែកក្កដា ឆ្នាំ២០២២នេះ មន្ត្រីជំនាញបានបន្តធ្វើការត្រួតពិនិត្យអនុលោមភាពរបស់ស្ថានីយ ដេប៉ូប្រេងឥន្ធនៈស្ថិតក្នុងស្រុកបន្ទាយអំពិលនិងក្រុងសំរោង ស្រុកកំពង់ត្រឡាចនិងស្រុកទឹកផុស ស្រុកសំរោងទង ស្រុកគងពិសីនិងក្រុងច្បារមន ស្រុកពួក ស្រុកអង្គរជុំនិងក្រុងសៀមរាប ស្រុកឈូកនិងស្រុកជុំគិរី ស្រុកសណ្តាន់ និងស្រុកសន្ទុក បានសរុបចំនួន ៣៨ស្ថានីយ និងដេប៉ូ ដែលក្នុងនោះមន្ត្រីយើងបានរកឃើញដេប៉ូប្រេងឥន្ធនៈមិនមានអនុលោមភាពចំនួន៦ និងបានធ្វើការណែនាំ រួមទាំងចាត់វិធានការពិន័យអន្តរការណ៍តាមច្បាប់ជាធរមាន។
គួរជម្រាបដែរថា ដេីម្បីបន្តការពង្រឹងសមត្ថភាពមន្ត្រីមន្ទីរពិសោធន៍នៅតាមបណ្តាសាខា ក.ប.ប. រាជធានី ខេត្ត ដែលមានមន្ទីរពិសោធន៍ខ្នាតតូច កាលពីថ្ងៃ១៥ ខែកក្កដា ឆ្នាំ២០២២ម្សិលមិញនេះ ក្រោមការសម្របសម្រួលពីលោកប្រធាននាយកដ្ឋានមន្ទីរពិសោធន៍ លោកប្រធានសាខា ក.ប.ប. ខេត្តរតនគិរី បានដឹកនាំមន្ត្រីរបស់ខ្លួន បានចូលរួមវគ្គបណ្តុះបណ្តាលពង្រឹងសមត្ថភាពផ្ទៃក្នុងរបស់មន្ត្រី ក្នុងការធ្វើតេស្តិ៍នៅលើឧបករណ៍ថ្មីដែលអាចពិនិត្យរកឃើញនូវសារធាតុគីមីដែលមាននៅលើបន្លែនិងផ្លែឈើ ក្នុងទិសដៅបន្តត្រួតពិនិត្យគុណភាព សុវត្ថិភាពទំនិញហូបចុក ដើម្បីបន្តធានាឱ្យបាននូវការការពារសុខុមាលភាពជូនប្រជាពលរដ្ឋក្នុងមូលដ្ឋានឱ្យបានទាន់ពេលវេលា៕
ដោយ៖សហការី
