សារព័ត៌មាន នគរវត្ត តែងតែនាំមុខគេជានិច្ច
លោក Erik ten Hag អ្នកចាត់ការទូទៅរបស់ក្រុមបិសាចក្រហមManchester United និយាយថា ក្លិប “ត្រូវការកីឡាករដែលមានគុណភាព” បន្ទាប់ពីទទួលស្គាល់ពីទម្រង់លេងរបស់ក្រុមគឺមិនល្អគ្រប់គ្រាន់។
ក្រុម Man United បានរងបរាជ័យក្នុងលទ្ធផល ៤–០ នៅលើទឹកដី Brentford ដោយការរបូតគ្រាប់បាល់៤គ្រាប់ក្នុងរយៈពេលតែ៣៥នាទីដំបូង ហើយមិនមានពិន្ទុបន្ទាប់ពីការប្រកួត Premier League ចំនួន២លើកមកនេះ។
បុរសសញ្ជាតិហូឡង់លោក Ten Hag ដែលបានចូលកាន់តំណែងនៅ Old Trafford កាលពីខែឧសភា បានប្រាប់ Sky Sports ថា “ស្ថានភាពគឺជា ដំណើរការដ៏លំបាក។ យើងត្រូវផ្តល់ស្តង់ដារខ្ពស់ជាងអ្វីដែលយើងបានធ្វើនៅថ្ងៃនេះ។ ពួកយើងជាក្រុមមួយនៅក្នុងដំណើរការដ៏លំបាកមួយ។ អ្នករំពឹងថា នឹងមានការចាប់ផ្តើមខុសគ្នា វាមិនមែនជាអ្វីដែលយើងរំពឹងទុកនោះទេ។ យើងត្រូវការកីឡាករថ្មី យើងត្រូវការកីឡាករដែលមានគុណភាព យើងកំពុងធ្វើការលើរឿងនោះ ហើយយើងនឹងធ្វើគ្រប់យ៉ាងដើម្បីបញ្ចុះបញ្ចូលពួកគេឱ្យមក”។
ក្រម Man United បានចូលរួមក្នុងការស្វែងរកកីឡាករចំណូលថ្មីអស់រយៈពេលជាយូរចាប់តាំងពីទីផ្សារដោះដូរកីឡាករបានបើក បន្ទាប់ពីយុទ្ធនាការដ៏ខកចិត្តកាលពីឆ្នាំមុន និងការបរាជ័យដ៏គួរឱ្យភ្ញាក់ផ្អើលនៅឯផ្ទះក្រោមស្នាដៃក្រុម Brighton កាលពីថ្ងៃអាទិត្យមុន។
ខ្សែបម្រើ Frenkie de Jong របស់ Barcelona គឺជាគោលដៅសំខាន់សម្រាប់លោក Ten Hag ប៉ុន្តែកីឡាករវ័យ២៥ឆ្នាំរូបនេះត្រូវបានគេរាយការណ៍ថា គាត់ចង់ចូលរួមជាមួយ Chelsea ប្រសិនបើគាត់ចាកចេញពី Nou Camp ។
ការផ្លាស់ប្តូរសម្រាប់អតីតខ្សែប្រយុទ្ធ Stoke និង West Ham កីឡាករMarko Arnautovic បានទាក់ទាញប្រតិកម្មអវិជ្ជមានពីអ្នកគាំទ្រ ហើយត្រូវបានបោះបង់ចោល ក៏ដូចជាការចាប់អារម្មណ៍លើខ្សែបម្រើក្រុម Juventus កីឡាករ Adrien Rabiot ដែលជាការផ្ទេរដែលជិតមកដល់ បើទោះបីជាមានការមិនពេញចិត្តយ៉ាងខ្លាំងពីការគាំទ្ររបស់ United ក៏ដោយ។
លោក Ten Hag បាននិយាយថា “ក្រុមត្រូវតែទទួលខុសត្រូវ ខ្ញុំពិតជាសោកស្តាយចំពោះអ្នកគាំទ្រ ពួកគេបានធ្វើអ្វីគ្រប់យ៉ាងដើម្បីគាំទ្រពួកយើង ប៉ុន្តែពួកយើងបានបោះបង់ចោលពួកគេ។ អ្នកត្រូវតែទទួលខុសត្រូវលើទីលានជាក្រុម និងជាបុគ្គល នោះជាអ្វីដែលយើងមិនបានធ្វើ។ អ្វីដែលខ្ញុំបានសុំឱ្យពួកគេធ្វើគឺលេងដោយមានជំនឿ និងទទួលខុសត្រូវចំពោះការលេង យើងត្រូវធ្វើការលើនោះ។ អ្នកគ្រប់គ្រងក៏មានទំនួលខុសត្រូវផងដែរ។ គាត់មានទំនួលខុសត្រូវសំខាន់ ហើយខ្ញុំនឹងទទួលយកវា ធ្វើការលើវា”។
ខណៈដែលលោក Ten Hag មានអារម្មណ៍ថា ក្រុមទាំងមូលត្រូវតែទទួលការស្តីបន្ទោសចំពោះការបង្ហាញដ៏អាម៉ាស់ប្រឆាំងនឹងក្រុមរបស់លោក Thomas Frank អ្នកចាំទី David de Gea របស់ក្រុម Man United បានចង្អុលម្រាមដៃដាក់ខ្លួនឯងពីកំហុស។ អ្នកចាំទីសញ្ជាតិអេស្ប៉ាញរូបនេះបានភ្លាត់ស្នៀតផ្តល់ឱកាសឱ្យការស៊ុតរបស់កីឡាករ Josh Dasilva ពីការចាប់បាល់រអិលរបស់គាត់។
ឥឡូវនេះក្រុម Manchester United បានចាញ់ការប្រកួតលីគចំនួន៤ជាប់ៗគ្នា ដែលជាការរាប់បញ្ចូលទាំងការបញ្ចប់កាលពីរដូវកាលមុន និងការប្រកួតក្រៅដីចំនួន៧ជាប់ៗគ្នានៅក្នុងក្របខ័ណ្ឌកំពូល ៕
ដោយ៖ ភារៈ(រូបភាព ៖ Sky Sport/BBC Sport)
