រថយន្តបើកបុកម៉ូតូពីក្រោយបណ្តាលឱ្យស្រ្តីម្នាក់រងរបួសធ្ងន់

ភ្នំពេញ ៖ ស្ត្រីម្នាក់បានរងរបួសធ្ងន់ ត្រូវបានរថយន្តសាមុយដឹកយកទៅសង្គ្រោះបន្ទាន់ភ្លាម ខណៈបើកម៉ូតូត្រូវរថយន្ត បើកបុកពីក្រោយពេញទំហឹង អូសម៉ូតូជាប់រថយន្តនៅខាងមុខរថយន្ត។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីម៉ោង ៨យប់ថ្ងៃទី ១២ខែតុលាឆ្នាំ២០២២ ស្ថិតនៅតាមបុរីអង្គរក្នុងសង្កាត់ទួលសង្កែ ២ ខណ្ឌឬស្សីកែវ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញស្ត្រីរងគ្រោះម្នាក់ បើកម៉ូតូម៉ាកហុងដាឌ្រីមC១២៥ ពណ៌ក្រហមមួយគ្រឿងពាក់ស្លាកលេខភ្នំពេញ1AC-5517 ជិះតាមបណ្ដោយផ្លូវបុរីអង្គរ ក្នុងទិសដៅពីជើងមកត្បូង ខណៈពេលមកដល់ចំណុចកើតហេតុ ស្រាប់តែមានរថយន្តបង្កម៉ាក toyota prius ពណ៌សពាក់ស្លាកលេខភ្នំពេញ 2BK-6425 បើកបរដោយបុរសម្នាក់ធ្វើដំណើរតាមបណ្តោយផ្លូវបុរីអង្គរ ស្របទិសគ្នាពីជើងមកត្បូងក្នុងល្បឿនយ៉ាងលឿន បានជ្រុលទៅបុកម៉ូតូឌ្រីមសង់ពីក្រោយពេញទំហឹង បណ្ដាលឱ្យស្ត្រីរងគ្រោះប៉ើងទៅបោកផ្ទប់នឹងកញ្ចក់រថយន្ត ធ្លាក់មកបោកនឹងថ្នល់រងរបួសធ្ងន់ ត្រូវបានរថយន្តសាមុយ ដឹកយកទៅសង្រ្គោះបន្ទាន់ភ្លាមៗ ចំណែករថយន្តបន្តបើកអូសម៉ូតូទៅមុខជាច្រើនម៉ែត្រ ហើយភ្លាមនោះដែរ ប្រជាពលរដ្ឋជិតខាងបានជួយដេញពីក្រោយ ឃាត់បានអ្នកបើកបរនិងរថយន្តប្រគល់ឲ្យសមត្ថកិច្ច។

បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់វាស់វែងយករថយន្តនឹងម៉ូតូទៅរក្សាទុករង់ចាំដោះស្រាយគ្នានៅពេលក្រោយ៕

ដោយ៖ជ្រោយពេជ្រ