សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក កើត រិទ្ធិ រដ្ឋមន្ត្រីក្រសួងយុត្តិធម៌ បានថ្លែងថា ការគោរពវិន័យ វិជ្ជាជីវៈមេធាវី គឺជាការលើកកម្ពស់ គុណតម្លៃ កិត្យានុភាព ឧត្តមភាព និងកិត្តិយសចំពោះជីវីតមេធាវីខ្លួនឯងផ្ទាល់។ ផ្ទុយទៅវិញបើមេធាវីមិនបានបំពេញតួនាទីអោយបានត្រឹមត្រូវនោះទេ គឺនឹងដូចពាក្យស្លោកខ្មែរពោលថា “ត្រីមួយកន្ត្រក់ស្អុយមួយ គឺស្អុយទាំងអស់” ។ សូមបញ្ជាក់ថា, លោក កើត រិទ្ធិ រដ្ឋមន្ត្រីក្រសួងយុត្តិធម៌ បានថ្លែងបែបនេះ ក្នុងពិធីបិទសន្និបាតលើកទី២៧ របស់គណៈមេធាវីនៃព្រះរាជាណាចក្រកម្ពុជា។
សូមជម្រាបជូនថា : លោក លី ច័ន្ទតុលា ប្រធានគណៈមេធាវីកម្ពុជា អាណត្តិទី១៣ បានបន្តជាប់ឆ្នោតជាប្រធានគណៈមេធាវីកម្ពុជា អាណត្តិទី១៤ ក្រោយការបោះឆ្នោតត្រូវបានធ្វើឡើង នៅថ្ងៃទី១៦ ខែតុលា ឆ្នាំ២០២២ ចាប់ពីម៉ោងប្រមាណ ៩៖៣០ព្រឹក ដល់ម៉ោងប្រមាណ ១២៖៣០នាទីថ្ងៃត្រង់។
យោងតាមលទ្ធផលដែលត្រូវបានប្រកាសនៅរសៀលម៉ោង ៣៖០០នេះ ក្រោយការបិទការរាប់សន្លឹកឆ្នោតទៅឃើញថា លោក លី ច័ន្ទតុលា ទទួលបានសំឡេងឆ្នោតសរុបដ៏ច្រើនលើសលប់រហូតដល់ទៅ ២០១៦ ឬស្មើនឹង ៩៨.៥៨% ។
ការបោះឆ្នោតមានមេធាវីទៅបោះឆ្នោតចំនួន ២០៤៥រូប ក្នុងនោះអ្នកទៅបោះឆ្នោតផ្ទាល់ ១២៤០រូប និងអ្នកបោះឆ្នោតតាមរយៈការប្រគល់សិទ្ធិ ៤០៥រូប។ ក្នុងចំណោមសន្លឹកឆ្នោតទាំងអស់ មានសន្លឹកឆ្នោតបានការ ២០១៦សន្លឹក ខណៈ ២៩សន្លឹក ជាសន្លឹកឆ្នោតមិនបានការ។
ការបោះឆ្នោតនេះ គ្មានបណ្តឹងតវ៉ា និងមិនមានបាតុភាពមិនប្រក្រតីកើតឡើងនោះឡើយ។ ដូច្នេះ លោក លី ច័ន្ទតុលា ក្លាយជាប្រធានគណៈមេធាវី នៃព្រះរាជាណាចក្រកម្ពុជា សម្រាប់អាណត្ដិទី១៤ បន្តទៀត ។
ការបោះឆ្នោតមាន ១៤ការិយាល័យ ហើយមាន១ការិយាល័យ ហៅថា, ការិយាល័យទី១៥ សម្រាប់អ្នកដែលមានកម្តៅខុសពីធម្មតា ប៉ុន្តែមិនមានអ្វីកើតឡើងចំពោះបញ្ហាសុខភាព ដល់មេធាវី ដែលបានអញ្ជើញទៅចូលរួមបោះឆ្នោតនោះឡើយ ៕
ដោយ ៖ សហការី
