សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តBMW ដែលគេស្គាល់ថាជារថយន្តរបស់អ្នកនាងម៉ូនីកា ជាមេតុងទីន និងជាអ្នកលក់អនឡាញដ៏ល្បីឈ្មោះមួយរូបនៅក្នុងបណ្តាញសង្គម បានជួបគ្រោះថ្នាក់ចរាចរណ៍ដោយសារតែបើកលឿនបំពានភ្លើងស្តុបជ្រុលទៅបុករថយន្តហាយឡេនឌ័រនៅផ្លូវបំបែកជាបួន បណ្តាលឱ្យខូចខាតរថយន្តមួយកំណាត់មុខ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅម៉ោងជាង១២រំលងអធ្រាត្រឈានចូលថ្ងៃទី២ ខែវិច្ឆិកា ឆ្នាំ២០២២ ស្ថិតនៅតាមបណ្តោយផ្លូវម៉ៅសេទុង កែងនឹងផ្លូវលេខ១៨២ (ចំណុចភ្លើងស្តុបទេពផន) ក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតគេឃើញរថយន្តម៉ាកហាយឡេនឌ័រ ពណ៌ទឹកប្រាក់មួយគ្រឿងពាក់ស្លាកលេខ ភ្នំពេញ 2AJ-1503 បើកបរដោយបុរសម្នាក់ធ្វើដំណើរតាមបណ្តោយផ្លូវលេខ១៨២ក្នុងទិសដៅពីលិចទៅកើត ហើយពេលបើកមកដល់ចំណុចកើតហេតុ (ភ្លើងស្តុបទេពផន) បានបត់ឆ្វេងឆ្លងភ្លើងស្តុបពណ៌ខៀវបម្រុងជិះកាត់តាមបណ្តោយផ្លូវម៉ៅសេទុង ប៉ុន្តែបត់បានពាក់កណ្តាលផ្លូវស្រាប់តែមានរថយន្តម៉ាកBMW ពណ៌ស មិនមានស្លាកលេខ បើកបរដោយនារីម្នាក់ដែលគេស្គាល់ថាជាមេតុងទីននិងជាអ្នកលក់តាមអនឡាញដ៏ល្បីឈ្មោះមួយរូបនៅក្នុងបណ្តាញសង្គម គឺអ្នកនាងម៉ូលីការ បើកបរតាមបណ្តោយផ្លូវម៉ៅសេទុងក្នុងទិសដៅពីជើងទៅត្បូងយ៉ាងលឿនទាំងបំពានភ្លើងស្តុបពណ៌ក្រហមបានជ្រុលទៅបុករថយន្តហាយឡេនឌ័រ ចំកង់ខាងក្រោយចំហៀងខាងឆ្វេងពេញទំហឹងបណ្តាលឱ្យរថយន្តBMWខូចខាតផ្នែកខាងមុខស្ទើរទាំងស្រុង តែសំណាងល្អនៅក្នុងហេតុការណ៍គ្រោះថ្នាក់ចរាចរណ៌នេះមិនបណ្តាលឱ្យមានអ្នករងរបួសនោះទេ។ ភ្លាមៗនោះដែរនារីជាអ្នកបើកបររថយន្តម៉ាកBMW ដែលគេស្គាល់ថាអ្នកនាងម៉ូនីការបានឡើងជិះឡំប្រឺតាចេញពីកន្លែងកើតហេតុបាត់ស្រមោលទៅ។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ ហើយទំនាក់ទំនងទៅសមត្ថកិច្ចជំនាញចរាចរណ៍ឱ្យចុះមកវាស់វែង និងធ្វើកំណត់ហេតុយករថយន្តទាំង២គ្រឿងទៅរក្សាទុកនៅការិយាល័យចរាចរណ៍ផ្លូវគោករង់ចាំដោះស្រាយគ្នានៅពេលក្រោយ៕
ដោយជ្រោយពេជ្រ
