សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានឱ្យដឹងនៅរសៀលថ្ងៃព្រហស្បតិ៍ទី០៣ ខែវិច្ឆិកា ឆ្នាំ២០២២នេះថា៖ ការប្រកបអាជីវកម្មដោយសុចរិត គឺជាសសរគ្រឹះទំនុកចិត្តយូរអង្វែងពីសំណាក់អតិថិជនដែលជាអ្នកប្រើប្រាស់។
មន្រ្តីជំនាញ ក.ប.ប. តាមបណ្ដាសាខារាជធានី-ខេត្ត បានបន្តអនុវត្តច្បាប់លើម្ចាស់អាជីវកម្មប្រេងឥន្ធនៈប្រសិនមន្រ្តីជំនាញរកឃើញថាមានបទល្មើស ដែលប្រកបអាជីវកម្មមិនសុចរិតតាមរយៈផ្ដល់ផលិតផលប្រេងឥន្ធនៈមិនមានអនុលោមភាព។ ជាក់ស្ដែងថ្ងៃទី០១-០២ ខែវិច្ឆិកា ឆ្នាំ២០២២ មន្រ្តីជំនាញ ក.ប.ប. រាជធានី-ខេត្តចំនួន ១០ បានចុះអនុវត្តតួនាទីភារកិច្ចរបស់ខ្លួនក្នុងការបង្រ្កាប និងទប់ស្កាត់អំពើមិនសុចរិតភាពក្នុងវិស័យប្រេងឥន្ធនៈនៅក្នុងព្រះរាជាណាចក្រកម្ពុជា។
តាមលទ្ធផលមន្រ្តីជំនាញបានត្រួតពិនិត្យលើស្ថានីយ/ដេប៉ូប្រេងឥន្ធនៈចំនួន ៣៩ទីតាំងផ្សេងគ្នា ក្នុងនោះមាន ១១ទីតាំង មិនមានអនុលោមភាព និងពិន័យអន្តរការណ៍រួមទាំងធ្វើកិច្ចសន្យាកែតម្រូវស្របតាមច្បាប់៕
ដោយ៖សហការី
