សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមរបាយការណ៍របស់នាយកដ្ឋាននគរបាលចរាចរណ៍ និងសណ្ដាប់ធ្នាប់នៃអគ្គស្នងការដ្ឋាននគរបាលជាតិ បានឱ្យដឹងនៅល្ងាចថ្ងៃសុក្រទី១៨ ខែវិច្ឆិកា ឆ្នាំ២០២២នេះថា៖ កម្លាំងនគរបាលទូទាំងប្រទេសបានត្រួតពិនិត្យ និងផាកពិន័យ យានយន្តសរុបចំនួន ២៥៦គ្រឿង នៅថ្ងៃទី១៨ ខែវិច្ឆិកានេះ។ ក្នុងនោះមានម៉ូតូ ១៩៤គ្រឿង និងរថយន្ត ៦២គ្រឿង។
របាយការណ៍ដដែលបន្តថា គិតត្រឹមថ្ងៃទី១៨ ខែវិច្ឆិកា ក្នុងឆ្នាំ២០២២នេះ នគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន ១៣៧,១៦៣គ្រឿង ក្នុងនោះមានម៉ូតូ ១១០,២៣៨គ្រឿង និងរថយន្តគ្រប់ប្រភេទ ២៦,៩២៥គ្រឿង។ ចំពោះបទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ មួក ល្មើសសញ្ញា និងអត់ស្លាកលេខជាដើម។ ដោយឡែករថយន្តរួមមាន៖ ល្មើសល្បឿន ខ្សែក្រវាត់ ឆៀក លើសចំណុះ អត់បណ្ណបើកបរ និងសញ្ញាជាដើម។
ដោយឡែកសម្រាប់ថ្ងៃទី១៨ ខែវិច្ឆិកា ឆ្នាំ២០២២នេះ គ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ០៩លើក ក្នុងនោះស្លាប់ចំនួន ០៣នាក់ របួសចំនួន ០៨នាក់ (របួសធ្ងន់ ចំនួន ០៦នាក់)។ រយៈពេល៣២២ថ្ងៃមានករណីគ្រោះថ្នាក់ចរាចរណ៍ចំនួន ២,៦២៩លើក បណ្ដាលឱ្យមនុស្សស្លាប់ ១,៥៣២នាក់ របួស ៣,៥៨៩នាក់ (របួសធ្ងន់ ២,២៧១នាក់)។
ជាមួយគ្នានេះ នាយកដ្ឋាននគរបាលចរាចរណ៍ ក៏បានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត៕
ដោយ៖សហការី(រូបភាព៖ ឯកសារ)
