សារព័ត៌មាន នគរវត្ត តែងតែនាំមុខគេជានិច្ច
លោក Hansi Flick នឹងបន្តធ្វើជាអ្នកចាត់ការក្រុមជម្រើសជាតិឥន្ទ្រីដែកអាល្លឺម៉ង់ បើទោះបីក្រុមរបស់លោកធ្លាក់ចេញពីវគ្គចែកពូលនៅ World Cup ឆ្នាំ២០២២ ក្នុងប្រទេសកាតាក៏ដោយ។
ការបញ្ចប់ចំណាត់ថ្នាក់លេខ៣របស់ពួកគេក្នុងពូល E គឺជាការប្រកួតបាល់ទាត់ពិភពលោកជាលើកទី២ជាប់ៗគ្នាដែលអាល្លឺម៉ង់បានបរាជ័យត្រឹមវគ្គចែកពូលមិនអាចឈានទៅវគ្គបន្ត។
កាលពីដើមសប្តាហ៍នេះ នាយកបច្ចេកទេសលោក Oliver Bierhoff បានបញ្ចប់កិច្ចសន្យារបស់គាត់ ប៉ុន្តែសមាគមបាល់ទាត់អាល្លឺម៉ង់ (DFB) បានជ្រើសរើសរក្សាលោក Flick ជាអ្នកគ្រប់គ្រងមុនពេលការប្រកួតជម្រុះ និងប្រជែងជើងឯកអឺរ៉ុប (យូរ៉ូ) នៅផ្ទះនៅឆ្នាំ២០២៤ខាងមុខ។
លោក Flick បាននិយាយថា “បុគ្គលិកគ្រូបង្វឹករបស់ខ្ញុំ និងខ្ញុំមានសុទិដ្ឋិនិយមចំពោះការប្រកួតជើងឯកអឺរ៉ុបនៅក្នុងប្រទេសរបស់យើង។ក្នុងនាមជាក្រុម យើងអាចសម្រេចបានច្រើនជាងអ្វីដែលយើងបានបង្ហាញនៅកាតា។ យើងបានខកខានឱកាសដ៏ល្អនៅទីនោះ យើងនឹងរៀនមេរៀនរបស់យើងពីវា” ។
ប្រធាន DFB លោក Bernd Neuendorf បាននិយាយថា “យើងមានទំនុកចិត្តពេញទំហឹងចំពោះលោក Hansi Flick ថាគាត់នឹងធ្វើជាម្ចាស់នៃការប្រកួតប្រជែងនេះរួមគ្នាជាមួយក្រុមរបស់គាត់” ៕
ដោយ៖ ភារៈ(រូបភាព ៖ BBC Sport)
