សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង ៖ ខេត្តព្រៃវែងឆ្នាំ២០២២នេះ តាមការវាយតម្លៃបឋមបានបង្ហាញថាបរិមាណផលស្រូវប្រចាំឆ្នាំសម្រេចបានចំនួន ១,៥៤៦, ៨១៦ តោន ហើយតម្លៃមធ្យម ២៥០ដុល្លាក្នុង១តោន។ នេះបើតាមការបញ្ជាក់ពីប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង លោក អ៊ុក សំណាង បានថ្លែងឱ្យដឹងនៅថ្ងៃសុក្រទី០៩ ខែធ្នូ ឆ្នាំ២០២២។
លោកប្រធានមន្ទីរកសិកម្មខេត្តរូបនេះ បានថ្លែងបញ្ជាក់ថា បើគិតការចំណាយថវិកាដើម្បីទិញស្រូវវិញ ត្រូវការថវិការប្រមាណចំនួន ៣៨៦,៧០៤,០០០ដុល្លា ឯណ្ណោះ ទើបអាចប្រមូលទិញស្រូវអស់ ប៉ុន្តែចំពោះមុខនេះស្រូវទាំងនោះ បានលក់ក្រៅផ្លូវការទៅកាន់ប្រទេស វៀតណាមជារៀងរាល់ថ្ងៃស្ទើអស់ទាំងស្រុងហើយ។
លោក អ៊ុក សំណាង បន្តថា ខេត្តព្រៃវែង ដាំដុះស្រូវចំនួន៣ប្រភេទគឺ ស្រូវស្រាលមិនប្រកាន់រដូវ ស្រូវកណ្ដាល និងស្រូវធ្ងន់ប្រកាន់រដូវ ហើយរដ្ឋាភិបាលក៏បានជំរុញឲ្យពលរដ្ឋដាំដុះស្រូវស្រាលនេះឱ្យបានច្រើនជាងស្រូវធ្ងន់ ព្រោះប្រើរយៈពេលខ្លី ស្រូវស្រាលខេត្តព្រៃវែងភាគច្រើននាំចេញទៅប្រទេសវៀតណាមដោយសារខេត្តព្រៃវែង មានព្រំប្រទល់នៅជិតប្រទេសវៀតណាម និងក៏ព្រោះតម្រូវការទីផ្សារ ប្រទេសវៀតណាមមានលទ្ធភាព ក្នុងការប្រមូលទិញផងដែរ។
បន្ថែមពីនេះ លោកប្រធានមន្ទីរ បានគូសបញ្ជាក់ថា៖ ចំពោះស្រូវដែលប្រជាពលរដ្ឋក៏ដូចជាឈ្មួញនាំទៅលក់នៅប្រទេសវៀតណាម តាមច្រកសំខាន់ចំនួនពីរ គឺច្រកទ្វារអន្តរជាតិកោះរកា ស្រុកពាមជរ និងច្រកទ្វារអន្តរជាតិបន្ទាយចក្រី ស្រុកព្រះស្តេច៕
ដោយ៖សហការី
