🔴ជិះម៉ូតូប៉ះគ្នាបន្តិចសោះ​ ខ្មាន់កាំភ្លេីងបាញ់បុរសម្នាក់ចំនួន១គ្រាប់ឱ្យរងរបួសធ្ងន់​ រួចគេចខ្លួនបាត់

ភ្នំពេញ​ ៖​ បុរសម្នាក់បានរងរបួសធ្ងន់​ ហេីយត្រូវពលរដ្ឋល្អដឹកបញ្ជូនទៅសង្គ្រោះនៅឯមន្ទីរពេទ្យរុស្សុី​ បន្ទាប់ពីជិះម៉ូតូប៉ះគ្នាបន្តិចបន្តួចឈានទៅដល់ខ្មាន់កាំភ្លេីងបាញ់១គ្រាប់​រួចគេចខ្លួនបាត់​ បង្កការភ្ញាក់ផ្អើលកាលវេលាម៉ោង៩​ និង៣០នាទីយប់ថ្ងៃចន្ទ ទី១៩ ខែ ធ្នូ ឆ្នាំ២០២២​ ស្ថិតតាមបណ្ដោយផ្លូវបេតុងជាប់របងវត្តសន្សំកុសល​ ក្នុងសង្កាត់បឹងទំពុនទី១ ខណ្ឌមានជ័យ​ រាជធានីភ្នំពេញ​ ។ 

​      តាមប្រភពព័ត៌មានពីកន្លែងកើតហេតុបានឲ្យដឹងថា​ មុនពេលកើតហេតុនោះគេឃើញបុរសរងគ្រោះជិះម៉ូតូមួយគ្រឿងតាមបណ្ដោយផ្លូវបេតុង​ ទិសដៅពីត្បូងទៅជើង​ ខណៈមកដល់ចំណុចកើតហេតុខាងលើស្រាប់តែឃើញជនដៃដល់ជិះម៉ូតូមួយគ្រឿងមិនចាំស្លាកលេខ​ ធ្វើដំណើរបញ្ច្រាសគ្នាពីជើងទៅត្បូង​ និងបានទាក់ដៃចង្កូតគ្នាតែមិនបណ្ដាលឲ្យដួលនោះទេ​ ស្រាប់តែជនដៃដល់ដកកាំភ្លើងបាញ់១គ្រាប់ចំលើដោះធ្លាយមកខាងក្រោយស្មារងរបួសធ្ងន់​ ចំណែកជនដៃដល់ក្រោយពីបាញ់រួចក៏ជិះម៉ូតូគេចខ្លួនដោយសុវត្តិភាពដោយឡែកជនរងគ្រោះត្រូវបានប្រជាពលរដ្ឋដឹកតាមម៉ូតូទៅសង្គ្រោះនៅមន្ទីរពេទ្យរុស្សុី​ ។ 

​     ក្រោយកើតហេតុ​ សមត្ថកិច្ចមូលដ្ឋានបានចុះមកដល់ចំណុចកើតហេតុ​ និងយកវត្ថុតាងសំបកកាទុះទុកស្រាវជ្រាវរកជនដៃដល់ចាប់មកផ្ដន្ទាទោសតាមច្បាប់​ ៕​

IMG_0870 IMG_0872 IMG_0869 IMG_0873 IMG_0871

ដោយ​ ៖​ ភារ៉ា​ ដង្កោ