សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ អគ្គិភ័យឆាបឆេះផ្ទះប្រជាពលរដ្ឋមួយកន្លែងយ៉ាងសន្ធោសន្ធៅ នាវេលាម៉ោង១ និង១០នាទីរសៀល ថ្ងៃទី១៨ ខែមករា ឆ្នាំ២០២៣ ស្ថិតនៅភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ខណៈអាជ្ញាធរមូលដ្ឋាន និងប្រជាពលរដ្ឋក៏បានជួយអន្តរាគមន៍បាញ់ទឹកពន្លត់ ។
បេីតាមប្រភពព័ត៌មានពីប្រជាពលរដ្ឋដែលរស់នៅជិតខាងកន្លែងកេីតហេតុបានដឹងឱ្យថា ផ្ទះរងគ្រោះខាងលេីគឺ មានអ្នកជួលស្នាក់នៅជាបណ្ដោះអាសន្ន និងប្រកបការងារនៅខាងក្រៅ ដោយតែងតែចាក់សោរចោលនៅពេលថ្ងៃ ។ ហេីយពេលកេីតហេតុ ក៏មានផ្សែងហុយចេញនៅខាងក្នុងផ្ទះខាងលេីបន្តិចម្ដងៗរហូតចេញជាអណ្ដាតភ្លេីងឆេះឡេីងយ៉ាងសន្ធោសន្ធៅ ។ ភ្លាមៗក៏មានបងប្អូនប្រជាពលរដ្ឋរស់នៅជិតខាងបានជួយជះទឹកពន្លត់ និងរាយការណ៍ទៅអាជ្ញាធរមូលដ្ឋានចេញរថយន្តពន្លត់អគ្គិភ័យមកជួយអន្តរាគមន៍បាញ់ទឹកពន្លត់យ៉ាងញាប់ដៃជេីងផងដែរ ។
ក្នុងករណីអគ្គិភ័យនេះ កម្លាំងអាជ្ញាធរមូលដ្ឋានបានចេញរថយន្តពន្លត់អគ្គិភ័យប្រចាំខណ្ឌចុះបាញ់ទឹកពន្លត់អស់ចំនួន២គ្រឿងក៏រលត់ទៅវិញជាស្ថាពរនៅរសៀលថ្ងៃដដែល ដោយមិនបង្កគ្រោះថ្នាក់ដល់មនុស្សណាម្នាក់នោះឡេីយ ។ ចំពោះមូលហេតុ សមត្ថកិច្ចបានឱ្យដឹងថា បណ្ដាលមកពីឆ្លងចរន្តអគ្គិសនី ៕
ដោយ ៖ ភារ៉ា ដង្កោ
