សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសម្នាក់បានចងកបញ្ចប់ជីវិតខ្លួនឯងទៅនឹងដើមស្វាយ ដោយពុំដឹងថាមានវិបត្តិអ្វីនោះទេ។ ករណីនេះបង្កការភ្ញាក់ផ្អើលឡើងនៅថ្ងៃទី១៣ ខែកុម្ភៈ ឆ្នាំ២០២៣ វេលាម៉ោង ៦និង៣០នាទីព្រឹកនៅចំណុចរោងចក្រម៉ាស៉ីនកិនស្រូវ យូនៀន រ៉ាយស៍ ក្នុងតំបន់7NG ភូមិសន្លុង ឃុំសន្លុង ស្រុកខ្សាច់កណ្ដាល ខេត្តកណ្ដាល។
មន្ត្រីនគរបាលស្រុកខ្សាច់កណ្ដាលបានឱ្យដឹងថា ជនរងគ្រោះឈ្មោះ ឃុត ឃាន ភេទប្រុស អាយុ៤៤ឆ្នាំ ជនជាតិខ្មែរ សញ្ជាតិខ្មែរ កាន់សាសនាព្រះពុទ្ធ មុខរបរ កម្មកររោងម៉ាស៉ីនកិនស្រូវ មានទីលំនៅ ភូមិនគរភាស២ ឃុំនគរភាស ស្រុកអង្គរជុំ ខេត្តសៀមរាប (ស្លាប់)។
ប្រភពដដែលបន្តថា រយៈពេលជិត០១ឆ្នាំមកហើយ ជនរងគ្រោះបានមកធ្វេីការជាកម្មករក្នុងរោងចក្រម៉ាស៉ីនកិនស្រូវ នៅក្នុងតំបន់ក្រុមហ៊ុន 7NG ភូមិសន្លុង ឃុំសន្លុង ស្រុកខ្សាច់កណ្តាល ខេត្តកណ្តាល ហេីយស្នាក់នៅទីនេះ ។ កាលពីថ្ងៃទី១២ ខែកុម្ភៈ ឆ្នាំ២០២៣ ជនរងគ្រោះបាននិយាយប្រាប់ឈ្មោះ ទ្រី ចាន់គ្រឹស្នា ភេទប្រុស ជាកម្មករដូចគ្នាថា មិនសូវស្រួលខ្លួនទេ ឈ្មោះ ទ្រី ចាន់គ្រឹស្នា បានប្រាប់ឱ្យទៅពេទ្យដែរ តែជនរងគ្រោះមិនព្រមទៅ ចេះតែនិយាយថា សំពាយយេីងប៉ុនណា យកប៉ណ្ណឹងទៅ រហូតដល់វេលាម៉ោង ២២និង០០នាទី យប់ថ្ងៃដដែល ជនរងគ្រោះក៏ចូលដេកនៅក្នុងបន្ទប់របស់ខ្លួនតែម្នាក់ឯង ចំណែកឈ្មោះ ទ្រី ចាន់គ្រឹស្នា ទៅដេកនៅផ្ទះរបស់ខ្លួននៅភូមិតាកែវទី២ ឃុំវិហារសួគ៌ ។ លុះដល់ថ្ងៃទី១៣ ខែកុម្ភៈ ឆ្នាំ២០២៣ វេលាម៉ោង៦និង៣០នាទីព្រឹក ឈ្មោះ ទ្រី ចាន់គ្រឹស្នា បានចូលមកកន្លែងធ្វេីការ ហេីយចូលរកជនរងគ្រោះនៅក្នុងបន្ទប់តែមិនឃេីញ ក៏ដេីររកនៅខាងក្រោយបន្ទប់ ឃេីញជនរងគ្រោះស្លាប់ដោយចងកនៅនឹងដេីមស្វាយទៅហេីយ ទើបរាយការណ៍ជូនសមត្តិកិច្ចនគរបាលប៉ុស្តិ៍សន្លុង។ បន្ទាប់មកសមត្ថកិច្ចនគរបាលជំនាញពិនិត្យហេតុ សហការជាមួយកម្លាំងប៉ុស្តិ៍នគរបាលរដ្ឋបាលសន្លុង គ្រូពេទ្យ ក្រុមប្រឹក្សាឃុំ លោកមេភូមិ និងក្រុមគ្រួសារសពបានពិពិត្យសាកសព រួចសន្និដ្ឋានថា៖ ជនរងគ្រោះស្លាប់ដោយសារ ចងកធ្វេីអត្តឃាតប្រាកដមែន ហើយបានប្រគល់សពជូនក្រុមគ្រួសារធ្វើបុណ្យតាមប្រពៃណី៕
ដោយ៖ ស្អាងជ័យ
