សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ថ្ងៃទី២១ មេសា ឆ្នាំ២០២៣នេះ គឺនៅសល់តែ១៤ថ្ងៃទៀតប៉ុន្នោះ នឹងឈានដល់ព្រឹត្តិការណ៍ស៊ីហ្គេមលើកទី៣២(32nd SEA Games) និងអាស៊ានប៉ារ៉ាហ្គេមលើកទី១២ (12th ASEAN Para Games) ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣នេះ។
សូមជម្រាបជូនថា អនុវត្តតាមអនុសាសន៍ណែនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងការអំពាវនាវឱ្យប្រជាពលរដ្ឋខ្មែរដែលរស់នៅក្រៅប្រទេសមកលេងស្រុកកំណើត ដើម្បីបានឃើញពីការអភិវឌ្ឍជាក់ស្ដែងនៅកម្ពុជា និងយោងតាមស្មារតីនៃវិធានការគោលនយោបាយអនុវត្តយុទ្ធនាការ «ឆ្នាំទស្សនាកម្ពុជា២០២៣» គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ (គ.ជ.ប.អ.) នឹងរៀបចំផ្តល់ជូននូវសំបុត្រឥតគិតថ្លៃសម្រាប់ប្រជាពលរដ្ឋខ្មែររស់នៅក្រៅប្រទេសចំនួន៣០០០សំបុត្រ ដើម្បីអាចចូលទស្សនាពិធីបើកព្រឹត្តិការណ៍កីឡាស៊ីហ្គេមលើកទី៣២ នៅថ្ងៃទី៥ ខែឧសភា ឆ្នាំ២០២៣ និងពិធីបិទនៅថ្ងៃទី១៧ ខែឧសភា ឆ្នាំ២០២៣។
ក្រោយពេលបានចុះឈ្មោះរួចរាល់ ប្រជាពលរដ្ឋខ្មែរដែលរស់នៅក្រៅប្រទេសអាចមកទទួលយកសំបុត្រដោយផ្ទាល់ ឬអាចស្នើសុំឱ្យបងប្អូន សាច់ញាតិ ឬមិត្តភក្ដិដែលរស់នៅក្នុងប្រទេសកម្ពុជាមកទទួលយកជំនួសបានពីបញ្ជរផ្តល់ជូនសំបុត្រឥតគិតថ្លៃ ដែលមានទីតាំងនៅពហុកីឡដ្ឋានជាតិមរតកតេជោ រាជធានីភ្នំពេញ ចាប់ពីថ្ងៃចន្ទ ទី២៤ ខែមេសា ឆ្នាំ២០២៣ រហូតដល់ថ្ងៃចន្ទ ទី១ ខែឧសភា ឆ្នាំ២០២៣ នៅរៀងរាល់ថ្ងៃ និងម៉ោងធ្វើការ ពេលព្រឹក ចាប់ពីម៉ោង៨៖៣០នាទី ដល់១១៖៣០នាទីព្រឹក និងពេលរសៀល ចាប់ពីម៉ោង២៖៣០នាទី ដល់៥៖៣០នាទីល្ងាច៕
ដោយ៖ សហការី
