🔴បន្ទាប់ពីតុលាការសម្រេចឃុំខ្លួនចិន៥នាក់ ដែលចាប់ជម្រិតចិនដូចគ្នាទារប្រាក់ជាង១០លានដុល្លារអាមេរិក មានលេចឮថា កំពុងមានអ្នករត់ការដើម្បីដោះលែង ?

ភ្នំពេញ ៖ លេចឮល្ហៀងៗថា, ក្រុមឧក្រិដ្ឋជន ជាជនជាតិចិន៥ នាក់ ពាក់ព័ន្ធករណីចាប់ជម្រិតទារប្រាក់ពីជនជាតិចិន ដូចគ្នាប្រមាណ១០លានដុល្លារអាមេរិក ហើយចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួន កាលពីថ្ងៃទី២១ ខែមេសា ឆ្នាំ២០២៣ ថ្មីៗនេះ កំពុងមានអ្នកកំពុងរត់ការ ដើម្បីអោយមានការដោះលែង ហើយហ៊ានចំណាយប្រាក់ដល់ខ្ទង់លានដុល្លារ ប៉ុន្តែត្រូវពិចារណាផង រឿងបទឧក្រិដ្ឋ យ៉ាងកក្រើកល្បីពេញផ្ទៃប្រទេស ជាសិទ្ធ ជាឆន្ទានុសិទ្ធិរបស់ តំណាងអយ្យការ , ចៅក្រមស៊ើបសួរសាលាដំបូងរាជធានីភ្នំពេញ បើគាត់បំពេញនីតិវិធី តាមផ្លូវច្បាប់ហើយ ! តើមានជើងខ្លាំងចេញពីប្រភពណា ធានារត់ការដោះលែងបាន  ។

សូមបញ្ជាក់ថា ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី២១ ខែមេសា ឆ្នាំ២០២៣ បានសម្រេចចេញដីកាឃុំខ្លួនជនត្រូវចោទ ជាជនជាតិចិន៥ នាក់ ពាក់ព័ន្ធករណីចាប់ជម្រិតទារប្រាក់ពីជនជាតិចិនដូចគ្នាប្រមាណ១០លានដុល្លារអាមេរិក ដាក់ពន្ធនាគារជាបណ្តោះអាសន្ន ។ 

ការសម្រេចឃុំខ្លួនជនត្រូវចោទទាំង៥ នាក់ ខាងលើនេះបន្ទាប់ពីតំណាងអយ្យការ បានធ្វើការចោទប្រកាន់ពួកគេពីបទ.បង្ខាំងមនុស្សដោយខុសច្បាប់ បទ. ធ្វើទារុណកម្មដើម្បីជម្រិតទារប្រាក់ និងបទ.កាន់កាប់អាវុធដោយគ្មានការអនុញ្ញាត ។ 

សំណុំរឿងបទឧក្រឹដ្ឋខាងលើនេះត្រូវបានលោក ម៉ុត ដារ៉ា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានបើកការស៊ើបសួរលើជនសង្ស័យជាជនជាតិចិនទាំង៥ នាក់ កាលពីថ្ងៃទី១៧ ខែមេសា ឆ្នាំ២០២៣ ពាក់ព័ន្ធករណីចាប់ជនជាតិចិនដូចគ្នាជម្រិតទារ ប្រាក់ប្រមាណ១០លានដុល្លារអាមេរិកនោះ ។ ក្រោយពីសាកសួរត្រូវបានបញ្ចប់តំណាងអយ្យការសម្រេចធ្វើការចោទប្រកាន់ជាផ្លូវការ រួចបានចាត់បញ្ជូនទៅខាងចៅក្រមស៊ើបសួរ បន្តនីតិវិធី សាកសួរ  ដើម្បីឃុំខ្លួនជនត្រូវចោទដាក់ពន្ធនាគារជាបណ្តោះអាសន្ន ដោយរង់ចាំបើកសវនាការផ្តន្ទាទោសតាមផ្លូវច្បាប់ បន្ទាប់ពីបិទការស៊ើបសួរ  ។

សូមជម្រាបថា មុនថ្ងៃចូលឆ្នាំប្រពៃណីខ្មែរ២ ថ្ងៃ មានករណីចាប់បង្ខាំងជនជាតិចិនម្នាក់ ដើម្បីជំរិតទារប្រាក់ប្រមាណ១០លានដុល្លារអាមេរិក នៅចំណុចចំណតរថយន្តនៃអគារស្នាក់នៅស្កាយវីឡា ដែលមានអាសយដ្ឋានអគារលេខ១៩២ ផ្លូវ១៦៣ សង្កាត់វាលវង់ ខណ្ឌ៧មករា រាជធានីភ្នំពេញ ហើយត្រូវកម្លាំងនគរបាលស្រាវ ជ្រាវបង្ក្រាបបានឧក្រិដ្ឋជនជនជាតិចិនដូចគ្នាចំនួន៧ នាក់ នៅពីរគោលដៅផ្សេងគ្នា ក្នុងខណ្ឌដង្កោ ខណៈក្រុមគ្រួសារជនរង គ្រោះ សូមស្នើឲ្យតុលាការផ្តន្ទាទោសជនសង្ស័យតាមច្បាប់ ។ យោងតាមរបាយការណ៍របស់សមត្ថកិច្ចឲ្យបណ្ដាញព័ត៌មាននៅព្រឹកថ្ងៃទី១៨ ខែមេសា ឆ្នាំ២០២៣ នេះ ឲ្យដឹងថា ករណីចាប់បង្ខាំងដើម្បីជំរិតទារប្រាក់១០លានដុល្លារអាមេរិករនេះ បានកើតឡើងនៅម៉ោង២យប់រំលងអធ្រាត្រឈាន ចូលថ្ងៃទី១២ ខែមេសា ឆ្នាំ២០២៣ ។

ពេលនោះក្រុមជនសង្ស័យមានគ្នាចំនួន៣នាក់ បានប្រើប្រាស់រថយន្តម៉ាក Vellfire ពាក់ផ្លាកលេខភ្នំពេញ 2BQ-0560 (ផ្លាកលេខក្លែងក្លាយ) និងផ្លាកលេខភ្នំពេញ 2BT-1768 ប្រដាប់ដោយអាវុធគ្រប់ដៃ។

បន្ទាប់ពីបានទទួលបណ្ដឹងពីក្រុមគ្រួសារជនរងគ្រោះ សមត្ថកិច្ចជំនាញរបស់នាយកដ្ឋានចារកម្ម និងនាយកដ្ឋានកណ្ដាលសន្តិសុខ នៃអគ្គស្នងការដ្ឋាននគរបាលជាតិ សហការជាមួយសមត្ថកិច្ចពាក់ព័ន្ធ បានប្រតិបត្តិការបង្ក្រាបករណីនេះនៅយប់ថ្ងៃទី១៣ ខែមេសា ឆ្នាំ២០២៣ នៅចំណុចពីគោលដៅផ្សេងពីរគ្នា រួមមាន ៖

គោលដៅទី១.បុរីមួយកន្លែង នៅផ្លូវ៦០ម៉ែត្រ ផ្ទះលេខ ផ្លូវសង្កាត់បឹងទំពុន ខណ្ឌមានជ័យ រាជធានីភ្នំពេញ ។

គោលដៅទី២.បុរីមួយកន្លែង នៅផ្លូវ៥០ម៉ែត្រ ផ្ទះលេខ១៨ ផ្លូវលេខM26 សង្កាត់ ខណ្ឌដង្កោ រាជធានីភ្នំពេញ ។

សមត្ថកិច្ចបានបញ្ជាក់ទៀតថា នៅក្នុងប្រតិបតិ្តការនេះ កម្លាំងជំនាញបានធ្វើការឃាត់ខ្លួនជនសង្ស័យបានចំនួន៧នាក់ វត្ថុតាងចាប់យក ៖

គោលដៅទី១.រថយន្ដម៉ាក Alphard ពណ៌ស ផ្លាកលេខភ្នំពេញ 2BZ-9995 ចំនួន១គ្រឿង.រថយន្ដម៉ាក Alphard ពណ៌ខ្មៅ ផ្លាកលេខតាកែវ 2D-8888 ចំនួន១គ្រឿង. ផ្លាកលេខរថយន្ដ (មុខក្រោយ) ១គូលេខ ភ្នំពេញ 2BQ-0560. កាំភ្លើងវែង១ដើម មានបង់២. កាំភ្លើងខ្លី ១ដើម មានបំពាក់ឧបករណ៍ខ្ទប់សំលេង, បង់ចំនួន១. គ្រាប់កាំភ្លើងវែងខ្លីមួយចំនួន គ្រាប់បែក១ (ប្រគល់ជូនCMAC). កូនកាំបិត២.ខ្នោះដៃ៣គូ, វិទ្យុទាក់ទងចំនួន៣គ្រឿង.ទូរដែកចំនួន១.ទូរស័ព្ទដៃ២គ្រឿង. កាតសម្គាល់ខ្លួន២. អាវការពារគ្រាប់ចំនួន១ និងឯកសារមួយចំនួនទៀត ។

តាមការបញ្ជាក់ពីមន្ត្រីនគរបាល បានប្រាប់អោយដឹងថា,  ក្នុងចំណោមជនសង្ស័យទាំង៧នាក់ដែលត្រូវបានសមត្ថកិច្ចឃាត់ខ្លួន ។ ខណៈ សមត្ថកិច្ចជំនាញរបស់នាយកដ្ឋានចារកម្ម និងនាយកដ្ឋានកណ្ដាលសន្តិសុខ នៃអគ្គស្នងការដ្ឋាននគរបាលជាតិ បានស៊ើបអង្កេត និងសួរចម្លើយ មានជនសង្ស័យ២នាក់ដែលមិនពាក់ព័ន្ធបទល្មើសខាងលើនេះទេ គ្រាន់តែជាអ្នកស្គាល់គ្នាជាមួយក្រុមជនត្រូវចោទដែលត្រូវបានចៅក្រមសម្រេចឃុំខ្លួន លក្ខណៈមិត្តភក្តិ ហើយពួកគេទាំង២នាក់កំពុងស្ថិតនៅជាមួយក្រុមជនល្មើស ខណៈសមត្ថកិច្ចកំពុងចុះបង្រ្កាប។

ពាក់ព័ន្ធករណីនេះ បែរជាលេចឮថា , មានអ្នកកំពុងរត់ការដើម្បីឲ្យមានការដោះលែងក្រុមឧក្រិដ្ឋជន។ ប៉ុន្តែគេទទួលស្គាល់ថា, នេះជាបទឧក្រិដ្ឋ ទាំងតំណាងអយ្យការ, ទាំងចៅក្រមស៊ើបសួរសាលាដំបូងរាជធានីភ្នំពេញ បានបំពេញនីតិវិធី រួចរាល់ហើយ ក្នុងការឃុំខ្លួនជនត្រូវចោទ ទាំង៥នាក់ ដាក់ពន្ធនាគារបណ្តោះអាសន្ន  ។ ដូច្នេះបើមានករណី រត់ការដើម្បីធ្វើការដោះលែង តើគេត្រូវដើរដោយរបៀបណា ! បើប្រទេសកម្ពុជាគ្រប់គ្រងដោយច្បាប់ ។

សូមបញ្ជាក់ថា, ក្រុមឧក្រិដ្ឋជន ដែលកំពុងឃុំខ្លួននៅពន្ធនាគារ ហេតុអ្វីមានឱកាស លទ្ធភាពក្នុងការ ប្រើប្រាស់មធ្យោបាយផ្សេងៗ ដើម្បីធ្វើការគំរាមមកលើជនរងគ្រោះ ថាខ្លួននិងចេញក្នុងពេលឆាប់ៗ ដោយសារមានអ្នករត់ការរួចហើយ។ ជុំវិញបញ្ហានេះ គេមានជំនឿថា ស្ថាប័នតុលាការ នឹងពង្រឹងនីតិវិធី ប្រកបដោយគតិយុត្ត ដើម្បីធ្វើការផ្ដន្ទាទោស ទៅលើក្រុមឧក្រិដ្ឋជន។ ពីព្រោះថាករណីនេះ សមត្ថកិច្ចគ្រប់ជំនាញ បានខិតខំស៊ើបអង្កេត ស្រាវជ្រាវ ដោយយកចិត្តទុកដាក់បំផុត តាមជំនាញ ដើម្បីការពារ សន្តិសុខ សុវត្ថិភាព ជូនប្រជាពលរដ្ឋ ក៏ដូចជាអ្នកវិនិយោគទុន ដើម្បីឲ្យអ្នករកស៊ី អ្នកមានប្រាក់វិនិយោគទុន មានទំនុកចិត្ត មកលើរាជរដ្ឋាភិបាល ដែលរក្សាបាននូវសុខសន្តិភាព ។

សូមលំអិតថា, ជនរងគ្រោះដែលជាម្ចាស់យានដ្ឋាន ជិតវត្តសំពៅមាស ត្រូវបានក្រុមឧក្រិដ្ឋជន ជម្រិតទារ ១លានដុល្លារ ។ ពេលនោះក្រុមគ្រួសារជនរងគ្រោះ មុនដំបូងវេប្រគល់ប្រាក់ចំនួន ១០ ម៉ឺនដុល្លារ។ ក្រោយមកទៀតប្រគល់អោយក្រុម ឧក្រិដ្ឋជន ៥មុឺនដុល្លារ ដើម្បីសហការជាមួយសមត្ថកិច្ចមន្ត្រីនគរបាលយុត្តិធម៌ ប្រើពេលវេលាក្នុងការបង្ក្រាបបទឧក្រិដ្ឋ ។ 

បន្ទាប់ពីសមត្ថកិច្ចបើកប្រតិបត្តិការបង្ក្រាប ចាប់យកវត្ថុតាង បានមួយចំនួន និងប្រគល់ប្រាក់ចំនួន ១៥ ម៉ឺនដុល្លារនោះ ឱ្យទៅជនរងគ្រោះវិញ។ ប៉ុន្តែអ្វីដែល បង្ហាញពីក្តីព្រួយបារម្ភ ត្រង់ថាក្រុមឧក្រិដ្ឋជន កំពុងស្ថិតក្នុងពន្ធនាគារសោះ ហេតុអ្វីមានលទ្ធភាព ប្រើប្រាស់មធ្យោបាយ ក្នុងការគំរាមកំហែងមកលើជនរងគ្រោះ ចេញពីពន្ធនាគារ ។ ដោយពួកគេ គំរាមថានឹងចេញពីពន្ធនាគារឆាប់ៗ ដោយសារមានអ្នករត់ការ ! បើឧក្រិដ្ឋជន ពិតជាបានរួចខ្លួន ឬត្រូវបានដោះលែងដូចអ្វីដែលខ្លួនអះអាង តាមរយៈការគំរាមមកលើជនរងគ្រោះ កាន់តែធ្វើឲ្យជនរងគ្រោះ ភ័យខ្លាច ! ហើយពួកគេប្រាកដណាស់ មានអង្គការចាត់តាំង។ ដូច្នេះសូមស្ថាប័នតុលាការ ស៊ើបអង្កេត ស្រាវជ្រាវ ពិចារណា ក្នុងរឿងនេះដោយយកចិត្តទុកដាក់ ដើម្បីធានាឱ្យមានតម្លាភាព  ថាកម្ពុជា ជាប្រទេសគ្រប់គ្រងដោយច្បាប់។ មិនត្រូវបានអនុញ្ញាតឱ្យ ក្រុមឧក្រិដ្ធជន ដែលកំពុងជាប់នៅក្នុងពន្ធនាគារ មានលទ្ធភាព ប្រើពេលវេលាក្នុងការគំរាមកំហែងមកលើជនរងគ្រោះបែបនេះឡើយ ៕

https://fb.watch/k4I2QRE-aU/?mibextid=v7YzmG

ដោយ ៖ សហការី