🔴Update ៖ ក្រុមឧកញ៉ា ជា សារ៉ន និងបក្សពួកដែលបានឆបោកប្រជាពលរដ្ឋរាប់ពាន់នាក់ត្រូវបានចៅក្រមស៊ើបសួរសម្រេចឃុំខ្លួន បញ្ជូនដាក់ពន្ធនាគារខេត្តពីបទឆបោកមានស្ថានទម្ងន់ទោស

ខេត្តកំពត ៖ ក្រុមឧកញ៉ា ជា សារ៉ន និងបក្សពួកដែលបានឆបោកប្រជាពលរដ្ឋរាប់ពាន់នាក់ត្រូវបានចៅក្រមស៊ើបសួរសម្រេចឃុំខ្លួនបណ្ដោះអាសន្ន បន្ទាប់ពីតំណាងអយ្យការចោទប្រកាន់ពីបទឆបោកមានស្ថានទម្ងន់ទោស និងត្រូវបានបញ្ជូនដល់ពន្ធនាគារខេត្តកំពតនៅរសៀលថ្ងៃទី ២៧ ខែមេសា ឆ្នាំ២០២៣នេះរួចរាល់ តុលាការនឹងបន្តនីតិវិធីជាមួយតំណាងក្រុមហ៊ុនពាក់ព័ន្ធសំណងជូនប្រជាពលរដ្ឋ ។ នេះបើតាមការបញ្ជាក់ឱ្យដឹងពីលោកឧត្តមសេនីយ៍ទោស្នងការនគរបាលខេត្ត នៅរសៀលថ្ងៃទី២៧ ខែមេសា ឆ្នាំ២០២៣។ 

ចៅក្រមស៊ើបសួរសាលាដំបូងខេត្តកំពត បង្គាប់៖

១-ភ្នាក់ងារមានសមត្ថកិច្ចនៃកងកម្លាំងសាធារណៈធ្វើការនាំខ្លួនជនត្រូវចោទដែលមានឈ្មោះ ជា សារ៉ន ភេទប្រុស អាយុ៣៨ឆ្នាំ ជនជាតិខ្មែរដែលមានសាវតារជាតិខាងលើ ទៅពន្ធនាគារខេត្តកំពត ដោយអនុវត្តឱ្យបានត្រឹមត្រូវតាមច្បាប់។

២ -ប្រធានពន្ធនាគារខេត្តកំពតទទួលឃុំខ្លួនជននេះរហូតដល់មានបទបញ្ជាថ្មីសម្រេចផ្សេងពីនេះ។

៣ – គ្រប់ភ្នាក់ងារ នៃកងកម្លាំងសាធារណៈទាំងអស់សហការអនុវត្តឱ្យបានល្អ នៅពេលដីកានេះត្រូវបានបង្ហាញក្នុងករណីចាំបាច់ ៕

ដោយ ៖ សុខ ខេមរា