សារព័ត៌មាន នគរវត្ត តែងតែនាំមុខគេជានិច្ច
កាសែត Messenger បានដកស្រង់សម្តីមន្ត្រីស៊ើបការណ៍សម្ងាត់អាមេរិកម្នាក់ដែលមិនបញ្ចេញឈ្មោះដែលលាតត្រដាងថា ផែនការជម្លៀសពលរដ្ឋចេញពីកោះតៃវ៉ាន់ត្រូវបានពិភាក្សាដោយក្រុងវ៉ាស៊ីនតោនក្នុងប៉ុន្មានខែថ្មីៗនេះ ស្របពេលដែលភាពតានតឹងរវាងភាគីទាំងពីរនៃច្រកសមុទ្រតៃវ៉ាន់កំពុងឡើងកម្តៅជាបន្តបន្ទាប់។
យោងតាម Messenger ប្រសិនបើជម្លោះផ្ទុះឡើង ជនជាតិអាមេរិករាប់ម៉ឺននាក់អាចជាប់គាំងនៅលើកោះនេះ។ ប្រភពដដែលបានឱ្យដឹងទៀតថា ដំណើរការនៃការរៀបចំផែនការជម្លៀសខ្លួនចេញពីកោះតៃវ៉ាន់ត្រូវបានដំណើរការដោយសហរដ្ឋអាមេរិកយ៉ាងហោចណាស់ក្នុងរយៈពេលប្រាំមួយខែកន្លងមកនេះ រួមជាមួយនឹងភាពតានតឹងជាមួយប្រទេសចិនក៏បានកើនឡើងផងដែរក្នុងរយៈពេលពីរខែចុងក្រោយនេះ។ កម្រិតនៃភាពតានតឹងរវាងអាមេរិក និងចិនកំពុងខ្លាំងឡើងៗ។
ប្រភពមួយផ្សេងទៀតបាននិយាយថា សកម្មភាពយោធារបស់រុស្ស៊ីនៅអ៊ុយក្រែនបានបង្ខំឱ្យសហរដ្ឋអាមេរិកពិចារណាលើផែនការជម្លៀសខ្លួននៅតៃវ៉ាន់ ពីព្រោះកោះនេះអាចជាចំណុចមួយសម្រាប់ការប្រឈមមុខដាក់គ្នាណាមួយរវាងសហរដ្ឋអាមេរិក និងប្រទេសចិន។
សហរដ្ឋអាមេរិកបានជម្លៀសបុគ្គលិកស្ថានទូតរបស់ខ្លួនភាគច្រើនចេញពីទីក្រុងគៀវ ពីរសប្តាហ៍មុនពេលកងទ័ពរុស្ស៊ីចូលអ៊ុយក្រែន បន្ទាប់ពីបានព្រមានពលរដ្ឋអាមេរិកជាច្រើនខែឱ្យចាកចេញពីប្រទេសអឺរ៉ុបខាងកើត។
ក្រសួងការបរទេសសហរដ្ឋអាមេរិកមិនទាន់បានចេញការព្រមានដល់ពលរដ្ឋរបស់ខ្លួនអំពីការធ្វើដំណើរទៅកាន់កោះតៃវ៉ាន់នៅឡើយទេ ហើយបច្ចុប្បន្នបានកំណត់កោះនេះនូវកម្រិតណែនាំការធ្វើដំណើរទាបបំផុតចំនួនបួន។ យោងតាមប្រភព Messenger ផែនការជម្លៀសកំពុងត្រូវបានរក្សាជាសម្ងាត់ “ព្រោះវាជាប្រធានបទដ៏រសើបសម្រាប់អាជ្ញាធរតៃវ៉ាន់”៕ ដោយ៖ ធីរីណា
រូបថត ៖ AP
