សារព័ត៌មាន នគរវត្ត តែងតែនាំមុខគេជានិច្ច
ប្រធានក្លិបលោក Nasser Al-Khelaifi បាននិយាយថា KylianMbappe ត្រូវតែចុះកុងត្រាថ្មី ប្រសិនបើគាត់ចង់បន្តនៅ Paris St-Germain។ លោក Al-Khelaifi បាននិយាយនៅក្នុងសន្និសីទសារព័ត៌មានមួយដើម្បីណែនាំលោក Luis Enrique ជាអ្នកចាត់ការថ្មីរបស់ PSG បន្ទាប់ពីការបណ្តេញលោក Christophe Galtier ។ខ្សែប្រយុទ្ធបារាំង Mbappe វ័យ២៤ឆ្នាំបានប្រាប់ PSG ថា គាត់នឹងមិនបន្តកុងត្រារបស់គាត់ជាមួយពួកគេលើសពីឆ្នាំ២០២៤។ Mbappe មានជម្រើស១ឆ្នាំបន្ថែមទៀតនៅពេលដែលកិច្ចសន្យារបស់គាត់ផុតកំណត់បន្ទាប់ពីរដូវកាលក្រោយ ប៉ុន្តែបាននិយាយថា ខណៈដែលគាត់គ្រោងនឹងបន្តនៅជាមួយក្រុមជើងឯកបារាំងសម្រាប់យុទ្ធនាការ២០២៣–២០២៤ គាត់មិនមានបំណងធ្វើឱ្យមានការបន្តកិច្ចសន្យានោះទេ។ បើដូច្នោះគាត់នឹងអាចចាកចេញដោយមិនមានតម្លៃផ្ទេរនៅរដូវក្តៅក្រោយ។Mbappe ដែលបានចូលរួមជាមួយ PSG ក្នុងឆ្នាំ២០១៧ ដំបូងក្នុងលក្ខខណ្ឌខ្ចីជើងពី Monaco មុនពេលផ្ទេរ១៨០លានអឺរ៉ូ ស៊ុតបញ្ចូលទីបាន២១២គ្រាប់ក្នុង២៦០ប្រកួតសម្រាប់ក្លិប។ គាត់បានបញ្ចប់ជាអ្នកស៊ុតបញ្ចូលទីច្រើនជាងគេនៅ Ligue 1 ក្នុងមួយរដូវកាលចុងក្រោយ និងបានឈ្នះពានរង្វាន់លីកចំនួន៥ដងក្នុង៦រដូវកាលរបស់គាត់នៅ PSG ។
អតីតអ្នកចាត់ការសញ្ជាតិអេស្ប៉ាញ និង Barcelona លោក Luis Enrique បានចុះហត្ថលេខាលើកិច្ចសន្យារយៈពេល២ឆ្នាំជាមួយ PSG បន្ទាប់ពីការចាកចេញរបស់លោក Galtier ដែលត្រូវបានបណ្តេញចេញពីតំណែងបើទោះបីជាឈ្នះពានរង្វាន់ Ligue 1 ក្នុងរយៈពេលមួយរដូវកាលដែលគាត់កាន់កាប់ក៏ដោយ។
វាជាតួនាទីដំបូងរបស់គាត់ ចាប់តាំងពីគាត់បានលាលែងពីតំណែងជាអ្នកចាត់ការអេស្ប៉ាញកាលពីខែធ្នូ បន្ទាប់ពីចាញ់ម៉ារ៉ុកដោយបាល់ប៉េណាល់ទីក្នុងវគ្គ១៦ក្រុមចុងក្រោយនៃ World Cup។
ការងារចុងក្រោយរបស់គាត់ក្នុងការគ្រប់គ្រងក្លិបគឺនៅ Barcelona ជាកន្លែងដែលគាត់បានឈ្នះពានរង្វាន់ចំនួន៩ក្នុងរយៈពេល៣រដូវកាលរវាងឆ្នាំ២០១៤និង២០១៧ រួមទាំង Champions League, La Liga និង Copa del Rey Treble នៅក្នុងយុទ្ធនាការដំបូងរបស់គាត់ដែលគ្រប់គ្រង។
គាត់បានបន្តជំនួសតំណែងលោក Fernando Hierro ជាគ្រូបង្វឹកអេស្ប៉ាញក្នុងឆ្នាំ២០១៨ ហើយបានដឹកនាំប្រទេសរបស់គាត់ទៅវគ្គផ្តាច់ព្រ័ត្រនៃ Nations League និងវគ្គពាក់កណ្តាលផ្តាច់ព្រ័ត្រនៃជើងឯកអឺរ៉ុបនៅឆ្នាំ២០២១។
ភាពមិនច្បាស់លាស់អំពីអនាគតរបស់ខ្សែប្រយុទ្ធ Mbappe ក៏មានចម្ងល់អំពីអនាគតរបស់ខ្សែប្រយុទ្ធប្រេស៊ីល Neymar បន្ទាប់ពីការចាកចេញរបស់ប្រធានក្រុមអាហ្សង់ទីន Lionel Messi ទៅ Inter Miami ។ ម្ចាស់ក្លិបកាតារមានបំណងចង់បង្កើតក្រុមជាជាងបន្តគោលការណ៍ចុះហត្ថលេខាលើកីឡាករដែលមានកេរ្តិ៍ឈ្មោះ ដែលរហូតមកដល់ពេលនេះមិនបានជោគជ័យក្នុងការប្រកួត Champions League ដែលពួកគេចង់បាននោះទេ។
សញ្ញាដំបូងត្រូវបានសន្យាក្រោមការដឹកនាំរបស់លោក Galtier បន្ទាប់ពីគាត់បានជំនួសលោក Mauricio Pochettino កាលពីរដូវក្តៅមុន។ PSG បានចាប់ផ្តើមរដូវកាលមុនយ៉ាងខ្លាំងជាមួយនឹងការប្រកួតមិនដែលចាញ់២២ប្រកួត ប៉ុន្តែចាញ់៩ដងក្នុងការប្រកួតទាំងអស់បន្ទាប់ពីការចាប់ផ្តើមឡើងវិញបន្ទាប់ពីការប្រកួត World Cup។
ការចាញ់ ២–១ ក្រោមថ្វីជើងក្រុម Marseille ក្នុងវគ្គ១៦ក្រុមចុងក្រោយនៃពានរង្វាន់ French Cup ក្នុងខែកុម្ភៈ ត្រូវបានបន្តដោយការចាញ់ជាមួយនឹងក្រុម Bayern Munich នៅដំណាក់កាលដូចគ្នានៃក្របខ័ណ្ឌ Champions League។ ទម្រង់លេងក្នុងលីករបស់ PSG ក៏ធ្លាក់ចុះផងដែរ ខណៈដែលពួកគេបានឈានទៅប្រកួតដណ្តើមពាន Ligue 1 ដោយបានបញ្ចប់ត្រឹមមួយពិន្ទុពីលើក្រុមជើងឯករង Lens ៕
ដោយ៖ ភារៈ(រូបភាព ៖ BBC Sport)
