បារាំងនឹងជំនួសរដ្ឋមន្ត្រី១១រូបក្នុងជួររដ្ឋាភិបាល

ប្រធានាធិបតីបារាំងលោក Emmanuel Macron កាលពីថ្ងៃទី 20 ខែកក្កដា បានធ្វើការរុះរើគណៈរដ្ឋមន្ត្រី ដោយបន្តតែងតាំងលោកស្រី Elisabeth Borne ជានាយករដ្ឋមន្ត្រី ប៉ុន្តែផ្លាស់ប្តូរតំណែងរដ្ឋមន្ត្រីចំនួន 11 រូបរួមទាំងរដ្ឋមន្ត្រីក្រសួងសំខាន់ៗដូចជា សុខាភិបាល និងអប់រំ។
ប្រធានាធិបតីបារាំងលោក Emmanuel Macron បានផ្លាស់ប្តូររដ្ឋមន្ត្រី និងរដ្ឋមន្ត្រីរដ្ឋចំនួន 11 នាក់នៅក្នុងរដ្ឋាភិបាលចាស់ជាមួយនឹងមុខតំណែងថ្មីចំនួន 8 និងផ្ទេរមុខតំណែងចាស់ចំនួន 3 ទៅកាន់មុខតំណែងថ្មី។
ការផ្លាស់ប្តូរគួរឱ្យកត់សម្គាល់បំផុតចំនួនពីរក្នុងការកែតម្រូវនេះគឺការចាកចេញរបស់រដ្ឋមន្ត្រីសុខាភិបាល Francois Braun ដោយសារតែបរាជ័យក្នុងការដោះស្រាយភាពចង្អៀតណែនក្នុងមន្ទីរពេទ្យ កង្វះឱសថ និងរដ្ឋមន្ត្រីក្រសួងអប់រំ Pap Ndiaye សម្រាប់ការចាកចេញដោយគ្មានដានក្នុងរយៈពេលជាង 14 ខែនៅក្នុងអំណាច។
ការជំនួសតំណែងទាំងពីរនេះគឺ លោកAurélien Rousseau អតីតប្រធានបុគ្គលិករបស់នាយករដ្ឋមន្ត្រី Elisabeth Borne និង Gabriel Attal អតីតមន្ត្រីហិរញ្ញវត្ថុ និងជាមិត្តជិតស្និទ្ធរបស់ប្រធានាធិបតី Macron ។
មុខតំណែងរដ្ឋមន្ត្រីសំខាន់ៗដូចជា កិច្ចការបរទេស កងទ័ព សេដ្ឋកិច្ច ឬកិច្ចការផ្ទៃក្នុង នៅតែមាននៅក្នុងរដ្ឋាភិបាលថ្មីដែលមានសមាជិក 41 រូបដែលបន្តដឹកនាំដោយនាយករដ្ឋមន្ត្រីស្ត្រី Elisabeth Borne ។
លោកស្រី Elisabeth Borne បានយកឈ្នះលើពាក្យចចាមអារ៉ាមអំពីការចាកចេញមុនកាលកំណត់ និងការពារកៅអីនាយករដ្ឋមន្ត្រី ដោយសារការប្តេជ្ញាចិត្តរបស់លោកស្រីក្នុងការអនុវត្តច្បាប់កំណែទម្រង់សោធននិវត្តន៍ ដែលជាអាទិភាពមួយក្នុងចំណោមអាទិភាពនៃអាណត្តិដែលប្រធានាធិបតី Emmanuel Macron បានកំណត់៕

ដោយ៖ ធីរីណា