សារព័ត៌មាន នគរវត្ត តែងតែនាំមុខគេជានិច្ច
មន្ត្រីអ៊ុយក្រែនបាននិយាយកាលពីថ្ងៃទី 16 ខែសីហាថា ប្រទេសរុស្ស៊ីបានបន្តកំណត់គោលដៅលើហេដ្ឋារចនាសម្ព័ន្ធគ្រាប់ធញ្ញជាតិនៅក្នុងតំបន់ Odesa នៃភាគខាងត្បូងអ៊ុយក្រែន ដោយប្រើប្រាស់យន្តហោះគ្មានមនុស្សបើកក្នុងការវាយប្រហារលើកន្លែងស្តុកទុក និងកំពង់ផែតាមបណ្តោយទន្លេ Danube ដែលទីក្រុង Kiev ធ្លាប់ដឹកជញ្ជូនគ្រាប់ធញ្ញជាតិទៅកាន់អឺរ៉ុប។
អភិបាលក្រុង Odesa លោក Oleh Kiper បាននិយាយថា គោលដៅសំខាន់ៗនៃការទម្លាក់គ្រាប់បែកពីយន្តហោះគ្មានមនុស្សបើកនៅពេលយប់របស់រុស្ស៊ី គឺកំពង់ផែ និងឃ្លាំងគ្រាប់ធញ្ញជាតិ រួមទាំងនៅកំពង់ផែនៅតំបន់ដីសណ្ដ Danube ផងដែរ។ យោងតាមលោក Kiper ការការពារដែនអាកាសរបស់អ៊ុយក្រែនបានស្ទាក់ចាប់យន្តហោះគ្មានមនុស្សបើកចំនួន ១៣ គ្រឿងរបស់រុស្ស៊ី។
ទន្ទឹមនឹងនេះដែរ កប៉ាល់កុងតឺន័រមួយ ដែលមានឈ្មោះថា Joseph Schulte ដែលផ្ទុកទំនិញពេញ ដែលត្រូវបានជាប់គាំងនៅកំពង់ផែ Odesa ចាប់តាំងពីសង្គ្រាមបានចាប់ផ្តើមក្នុងខែកុម្ភៈ ឆ្នាំ 2022 បានបើកតាំងពីថ្ងៃទី 16 ខែកក្កដា នេះបើយោងតាមឧបនាយករដ្ឋមន្ត្រី Oleksandr នៃប្រទេសអ៊ុយក្រែន។ កប៉ាល់បានបើកឆ្លងកាត់សមុទ្រខ្មៅទៅកាន់គោលដៅ យោងតាមលោក Kubrakov នាវា Joseph Schulte កំពុងផ្ទុកទំនិញជាង 30.000 តោន ជាមួយនឹងកុងតឺន័រចំនួន 2.114 រួមទាំងអាហារផងដែរ។
កាលពីសប្តាហ៍មុន នាវាចម្បាំងរុស្ស៊ីបានបាញ់ព្រមានទៅលើកប៉ាល់ដឹកទំនិញដែលមានទង់ជាតិ Palau នៅសមុទ្រខ្មៅភាគខាងត្បូង។ យោងតាមក្រសួងការពារជាតិរុស្ស៊ី នាវានោះមានឈ្មោះ Sukru Okan កំពុងធ្វើដំណើរទៅភាគខាងជើងឆ្ពោះទៅកាន់កំពង់ផែ Izmail របស់អ៊ុយក្រែន តាមដងទន្លេ Danube ។
នៅជួរមុខនៃសង្រ្គាម មន្ត្រីអ៊ុយក្រែនបានប្រកាសពីចំណុចសំខាន់មួយទៀតក្នុងការវាយបកយ៉ាងខ្លាំងក្លារបស់គៀវ។ អនុរដ្ឋមន្ត្រីការពារជាតិអ៊ុយក្រែន Hanna Maliar បាននិយាយថា កងទ័ពអ៊ុយក្រែនបានដណ្តើមយកភូមិមួយក្នុងតំបន់ Donetsk មកវិញ៕ ដោយ៖ ធីរីណា
រូបថត៖ AP
