សារព័ត៌មាន នគរវត្ត តែងតែនាំមុខគេជានិច្ច
ក្លិបទាំង២បានប្រកាសកាលពីថ្ងៃសុក្រថា ខ្សែប្រយុទ្ធវ័យ២១ឆ្នាំ Mason Greenwood របស់ Manchester United បានចូលរួមជាមួយក្លិប Getafe របស់ La Liga នៅលីកកំពូលអេស្ប៉ាញក្នុងលក្ខខ័ណ្ឌខ្ចីជើងរហូតដល់ចប់រដូវកាល។
ក្លិប Man United បាននិយាយកាលពីខែមុនថា Greenwood នឹងចាកចេញពី Old Trafford ដើម្បីកុំឱ្យក្លាយជាការរំខានទោះបីជាត្រូវបានជម្រះពីការចោទប្រកាន់ពីបទរំលោភ និងការប៉ុនប៉ងរំលោភក៏ដោយ។Greenwood ត្រូវបានព្យួរដោយ Man United ក្នុងខែមករា ឆ្នាំ២០២២នៅពេលដែលការចោទប្រកាន់ប្រឆាំងនឹងគាត់បានលេចឡើងនៅលើប្រព័ន្ធផ្សព្វផ្សាយសង្គម។ការចោទប្រកាន់ព្រហ្មទណ្ឌទាំងអស់ប្រឆាំងនឹងគាត់ត្រូវបានទម្លាក់ចោលកាលពីខែកុម្ភៈ ដោយសេវាអយ្យការក្រុងបាននិយាយថា វាគឺដោយសារតែការដកសាក្សីសំខាន់ៗ និងសម្ភារៈថ្មីដែលបានកើតឡើង។
នៅក្នុងសេចក្តីថ្លែងការណ៍មួយទៅកាន់ប្រព័ន្ធផ្សព្វផ្សាយរបស់ចក្រភពអង់គ្លេស Greenwood បាននិយាយថាគាត់មានកំហុស ប៉ុន្តែបានបន្ថែមថា “ខ្ញុំមិនបានធ្វើអ្វីដែលខ្ញុំត្រូវបានគេចោទប្រកាន់នោះទេ”។ បន្ទាប់ពីបានប្រកាសពីកិច្ចព្រមព្រៀងខ្ចីជើងជាមួយ Getafe កាលពីថ្ងៃសុក្រ Man Utd បានប្រកាសនៅក្នុងសេចក្តីថ្លែងការណ៍មួយថា ការផ្លាស់ប្តូរនេះអនុញ្ញាតឱ្យ Greenwood ចាប់ផ្តើមកសាងអាជីពរបស់គាត់ឡើងវិញនៅឆ្ងាយពី Manchester United។ ក្លិបនឹងបន្តផ្តល់ការគាំទ្រដល់ Mason និងគ្រួសាររបស់គាត់ក្នុងអំឡុងពេលនៃការផ្លាស់ប្តូរនេះ” ៕
ដោយ៖ ភារៈ(រូបភាព ៖ Reuters/CNA)
