សម្តេចធិបតី ហ៊ុន ម៉ាណែត អរគុណចំពោះថ្នាក់ដឹកនាំ, កងកម្លាំងគ្រប់ប្រភេទ និងអាជ្ញាធរដែនដីគ្រប់លំដាប់ថ្នាក់ ដែលបានសហការគ្នាយ៉ាងសស្រាក់សស្រាំ ក្នុងការអន្តរាគមន៍សង្គ្រោះ និងនាំប្រជាពលរដ្ឋទៅកាន់ទីទួលសុវត្ថិភាព

ចែករំលែក៖

ភ្នំពេញ ៖ នៅព្រលប់ថ្ងៃទី៣០ ខែកញ្ញា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានបង្ហោះ លើប្រព័ន្ធ Telegram យ៉ាងដូច្នេះថា ៖

សូមថ្លែងអំណរគុណចំពោះថ្នាក់ដឹកនាំ, កងកម្លាំងគ្រប់ប្រភេទ និងអាជ្ញាធរដែនដីគ្រប់លំដាប់ថ្នាក់ ដែលបានសហការគ្នាយ៉ាងសស្រាក់សស្រាំ ក្នុងការអន្តរាគមន៍សង្គ្រោះ និងនាំប្រជាពលរដ្ឋទៅកាន់ទីទួលសុវត្ថិភាព ព្រមទាំងបានជួយដោះស្រាយការលំបាកចំពោះមុខផ្សេងៗក្នុងស្ថានភាពគ្រោះធម្មជាតិជំនន់ទឹកភ្លៀងនេះ។

សម្តេចធិបតី នាយករដ្ឋមន្ត្រី ក៏សូមបងប្អូន អ៊ំពូមីង លោកយាយលោកតា មេត្តាចូលរួមសហការ និងចាកចេញពីទីកន្លែងជន់លិចទៅកាន់ទីទួលសុវត្ថិភាព ហើយក៏សូមមេីលថែទាំសមាជិកគ្រួសារ ជាពិសេសកូនចៅតូចៗឱ្យនៅឆ្ងាយពីទឹក ឬទីកន្លែងហានិភ័យនានា។

សូមជូនពរសុខសុវត្ថិភាព និងសុខភាពល្អ។

សូមបញ្ជាក់ថា៖ ស្របពេលដែលជំនន់ទឹកភ្លៀងត្រូវបានវាយលុក ប៉ះពាល់លំនៅដ្ឋាន ស្រែ ចំការ សត្វពាហនះ ។ល។ ជាដើម គឺ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានចេញសារជាបន្ទាន់មួយ ដល់អាជ្ញាធរ ថ្នាក់ដឹកនាំ គ្រប់ជាន់ថ្នាក់ យកចិត្តទុកដាក់ ប្រើគ្រប់មធ្យោបាយ ដើម្បី ត្រៀម និងចុះ ជួយអន្តរាគមន៍ជួយប្រជាពលរដ្ឋ អោយបានទាន់ពេលវេលា ៕