តារាកំប្លែង ជុំ រស្មី ហៅ ស្រី ទូច និងតារាចម្រៀង ស៊ូ ស៊ីរីកា អំពាវនាវដល់ប្រព័ន្ធតុលាការជួយផ្តល់ភាពយុត្តិធម៌ ពាក់ព័ន្ធរឿនក្តីមរតក , គ្មាននរណាប្រាថ្នាទេ តែជួបហើយ ដោះស្រាយ !

ភ្នំពេញ ៖ ឱរឿងរ៉ាវក្នុងជីវិត មិនដូចគ្នាទេនៅលើលោកយើងនេះ សេចក្តីសុខ រស់នៅលាយឡំជាមួយទុក្ខកង្វល់ ស្នេហា មានជួប មានព្រាត់ មានសុភមង្គល មានកង្វល់ ពិតជាមិនដូចគ្នាទេ ក្នុងរង្វង់គ្រួសារនីមួយៗ ។ ដូច្នេះបើមានអ្វីកើតឡើង ក្នុងរង្វង់គ្រួសារ យ៉ាងហោចណាស់ក៏ចូលរួមក្នុងការដោះស្រាយ ទទួលខុសត្រូវ ដោយកម្រិតណាមួយក្នុងឆន្ទៈ ។ 

មើលករណីនេះ ! តារាកំប្លែងអ្នកស្រី ជុំ រស្មី ហៅ ស្រី ទូច និងតារាចម្រៀង ស្រីវ័យក្មេងល្បីឈ្មោះកញ្ញា ស៊ូ ស៊ីរីកា ព្រមទាំងបងប្អូន ១១នាក់ដែលជាកូន ជាចៅៗរបស់លោកស្រី កែវ មន្ថា ហៅ យិន សុខុម តារាភាពយន្ត និងចម្រៀងជំនាន់ ទសវត្សរ៍៦០ជាថ្មីម្ដងទៀតបានទទូចស្នើសុំនូវភាពយុត្តិធម៌ពីតុលាការពាក់ព័ន្ធរឿនមរតក។

ប្រភពគេហទំព័រក្នុងស្រុក បានដកស្រង់ បើយោងតាមការអះអាងរបស់តារាកំប្លែងអ្នកស្រី ស្រី ទូច បាន បញ្ជាក់ប្រាប់ថា គិតមកទល់ពេលនេះ រយ:ពេល ជាង២ឆ្នាំមកហើយដែលអ្នកស្រី និងបងប្អូនកូនចៅ ចំនួន១១នាក់ត្រូវជាកូន ជាចៅ និងចៅទួតរបស់វីរៈសិល្បការិនីលោកស្រី កែវ មន្ថា បាននឹងកំពុងជួបរឿងដ៏ អយុត្តិធម៌ខ្លាំងណាស់ពីសំណាក់ប្តីក្រោយ និងកូនៗក្រោយ របស់លោកស្រី កែវ មន្ថា ដែលបានបំពានយកទ្រព្យសម្បត្តិដែលជាកេរបណ្តាំមរតករួមចំណែកបន្សល់ទុកពីអ្នក ម្តាយរបស់ខ្លួនដើម្បីបែងចែកសម្រាប់កូនៗនិងចៅ។

អ្នកស្រី ស្រី ទូច បន្តទៀតថា “ខ្ញុំព្រមទាំងបងប្អូនចំនួន១១នាក់ ខាងលើត្រូវជាកូនជាចៅ និងចៅទូតរបស់អ្នកម្តាយ កែវ មន្ថា ហៅ យិន សុខុម ជាតារាភាពយន្ត និងចម្រៀង ជំនាន់ទសវត្សរ៍៦០ ពេលនេះពួកខ្ញុំ និងបងប្អូនកូនក្មួយទាំង អស់កំពុងរងនូវភាពអយុត្តិធម៌ពីសំណាក់ប្តីក្រោយម្តាយខ្ញុំ រួមជាមួយកូនក្រោយមិនបានធ្វើតាមបណ្តាំមរតករបស់អ្នក ម្ដាយខ្ញុំទេ ទោះបណ្តាំមរតកនោះកែប្រែយ៉ាងមិចក៏ដោយ ក៏ជាឆន្ទៈរបស់អ្នកម្តាយរបស់ខ្ញុំក្នុងការចែកឲ្យកូន និងថៅ ដែរ”។

តារាកំប្លែងរូបនេះបន្ថែមថា សម្រាប់ពេលនេះ អ្វីដែលចង់ បាននោះអ្នកស្រីរួមនឹងបងប្អូនកូនថៅដែលក្នុងនោះក៏មាន តារាចម្រៀងកញ្ញា ស៊ូ សុីរីកា គឺចង់បានឲ្យមានការផ្ដល់ ភាពយុត្តិធម៌ចំពោះពួកគាត់ដូចដែលមានសរសេរនៅក្នុង លិខិតបណ្តាំមរតករបស់លោកស្រី កែវ មន្ថា ដែលជា ម្ដាយ។ ដូច្នេះហើយអ្នកស្រី ស្រី ទូច ក៏បានស្នើ និងអំពាវនាវ យ៉ាងទទូចដល់ប្រព័ន្ធច្បាប់មេត្តាជួយរកយុត្តិធម៌ និង ពន្លឿនរឿងក្ដីនេះដើម្បីស្វែងរកយុត្តិធម៌ចំពោះពួកគាត់ដែល ជាកូនជាចៅ។

យ៉ាងណាមិញពាក់ព័ន្ធនឹងរឿងរ៉ាវនៃបណ្តាំមរតកខាងលើ យើងមិនទាន់អាចស្វែងរកការបកស្រាយពីភាគីម្ខាងទៀត ដែលជាស្វាមីក្រោយរបស់លោកស្រី កែវ មន្ថា បានទេជុំ វិញបញ្ហានេះ។ 

គូររម្លឹកដែរថា កាលពីថ្មីៗកន្លងទៅនេះ ក្រុមគ្រួសាររបស់ តារាកំប្លែងអ្នកស្រី ស្រី ទូច ក៏ធ្លាប់បានចេញមកទម្លាយភាព អយុត្តិធម៌ជាមួយបងប្អូនចំនួន១១នាក់ ពាក់ព័ន្ធរឿងទំនាស់ មរតកដែលលោកស្រី កែវ មន្ថា បានសរសេរបណ្តាំទុកឲ្យ កូនៗចៅៗព្រមជាមួយនឹងប្តីក្រោយរបស់លោកយាយ កែវ មន្ថា ជាបន្តបន្ទាប់ផង។ ដោយឡែកសម្រាប់តារាចម្រៀង ល្បីឈ្មោះកញ្ញា ស៊ូ ស៊ីរីកា ដែលជាចៅរបស់លោក ស្រី កែវ មន្ថា ក៏ស្នើសុំដល់តុលាការជួយរកយុត្តិធម៌ដល់ ក្រុមគ្រួសារគាត់ខាងលើនេះផងដែរ។

ការលើកឡើងខាងលើនេះ ! គឺជារឿងរ៉ាវនៅក្នុងក្រុមគ្រួសារសិល្បៈ ពួកគាត់ទាមទារយុត្តិធម៌ដូចគ្នា អ្វីដែលជា អ្នកដែលសម្រេច ផ្ដល់ភាពយុត្តិធម៌ឱ្យគូភាគីទាំងអស់។ មានតែស្ថាប័នតុលាការប៉ុណ្ណោះ មានឆន្ទានុសិទ្ធិ ផ្ដល់ភាពយុត្តិធម៌ឲ្យគ្រប់គូភាគី។ ដូច្នេះ យើងទាំងអស់គ្នា ក្នុងនាមជាតិខ្មែរ ចង់ឱ្យតែគ្រួសារនីមួយៗ ជួបតែសេចក្តីសុខ សុខភាព សុភមង្គលរុងរឿង មិនប្រាថ្នាឲ្យ បែកបាក់ ឈ្លោះប្រកែក ចែកទ្រព្យសម្បត្តិ នោះឡើយ ៕

ដោយ ៖ សហការី