សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ នៅព្រឹកថ្ងៃសុក្រ ៧រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៦ ខែតុលា ឆ្នាំ២០២៣ លោក ភួន ចន្ថា នាយករងខុទ្ទកាល័យ តំណាងលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បាននាំយកអំណោយថវិកាចំនួន ២០ ០០០ ០០០ រៀល និងគ្រឿងឧបភោគបរិភោគមួយចំនួនដូចជា អង្គរ៦តោន មី៥០កេស ត្រីខ៥០កេស ទឹកត្រី២០យួរ ទឹកស៊ីអ៊ីវ២០យួរ ស្រាបៀរ៥០កេស និងទឹកក្រូច៥០កេស ជូនបញ្ជាការដ្ឋានតំបន់ប្រតិបត្តិការសឹករងខេត្តឧត្តរមានជ័យ ដែលជាសម្ព័ន្ធមេត្រីរបស់ក្រសួងធនធានទឹក និងឧតុនិយម ប្រើប្រាស់ក្នុងឱកាសបុណ្យភ្ជុំបិណ្ឌប្រពៃណីជាតិ។
តាមរយៈលោកនាយករងខុទ្ទកាល័យ លោករដ្ឋមន្ត្រីក៏បានផ្តាំផ្ញើការសាកសួរសុខទុក្ខ និងក្តីនឹករលឹកដ៏ស្មោះអស់ពីចិត្តជូនចំពោះ លោកមេបញ្ជាការ មេបញ្ជាការរង ពលទាហាន ពលទាហានរងទាំងអស់ ដែលកំពុងតែឈរជើងនៅក្នុងឃុំគោកខ្ពស់ ស្រុកបន្ទាយអំពិល ខេត្តឧត្តរមានជ័យ ដែលតែងប្រកាន់ខ្ជាប់នូវគោលជំហរការពារបូរណភាពទឹកដីគ្រប់ពេលវេលា។
ក្នុងឱកាសនោះ លោក តន់ ញាណ មេបញ្ជាការនៃតំបន់ប្រតិបត្តិការសឹករងខេត្តឧត្តរមានជ័យបានថ្លែងអំណរគុណយ៉ាងជ្រាលជ្រៅ ជូនចំពោះ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ដែលបានចាត់គណៈប្រតិភូនាំយកថវិកា ព្រមទាំងគ្រឿងឧបភោគបរិភោគមកឧបត្ថម្ភដល់ទីបញ្ជាការផ្ទាល់ ដែលនេះជាការឆ្លុះបញ្ចាំងពីការយកចិត្តទុកដាក់ខ្ពស់ចំពោះសុខទុក្ខ និងការរស់នៅប្រចាំថ្ងៃរបស់កងទ័ព ជាពិសេសនៅបញ្ជាការដ្ឋានរបស់លោក៕
ដោយ ៖ សហការី
