អ្នកនាំពាក្យគ្រោះមហន្តរាយ៖ ក្នុងរាជធានីភ្នំពេញ មានករណីអគ្គិភ័យច្រើនជាងគេ និងមានមនុស្សស្លាប់ផងដែរ

ចែករំលែក៖

ភ្នំពេញ៖ អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី បានថ្លែងឱ្យដឹងនៅព្រឹកថ្ងៃទី ០៧ ខែតុលា ឆ្នាំ២០២៣នេះថា៖ គិតត្រឹមរយៈពេល៩ខែឆ្នាំ២០២៣នេះ មានករណីអគ្គិភ័យកើតឡើងចំនួន៤៧២លើកបណ្តាលឱ្យឆេះផ្ទះ ចំនួន៥២៤ខ្នង តូបផ្សារ៧៩តូបឃ្លាំងទំនិញ៩កន្លែង អគាររដ្ឋបាល១១កន្លែងសាលារៀន១ខ្នង រោងចក្រសិប្បកម្ម៩កន្លែង ស្លាប់មនុស្ស២៥នាក់និងរងរបួស៣២នាក់។

លោកអ្នកនាំពាក្យរូបនេះ បានថ្លែងបន្តថា បច្ចុប្បន្នក្នុងរាជធានីភ្នំពេញត្រូវបានគេមើលឃើញថា មានអ្នកស្លាប់ និងរងរបួសដោយសារគ្រោះអគ្គិភ័យច្រើនជាងគេ ក្នុងចំណោមរាជធានីខេត្តចំនួន៨ ដែលមានអ្នកស្លាប់ និងរបួសប្រមាណជិត៦០នាក់។

លោក សុទ្ធ គឹមកុលមុនី បានបន្ថែមទៀតថា ក្នុងចំណោមអ្នកស្លាប់ និងរបួសជិត ៦០នាក់ ក្នុងនោះរាជធានីភ្នំពេញកើត ឡើងច្រើនជាងគេ ដោយមាន៨៩លើកឆេះផ្ទះ៨២ខ្នង តូបផ្សារ២៧ តូប រោងចក្រសិប្បកម្ម៤កន្លែង ស្លាប់មនុស្ស១២នាក់និងរបួស៧នាក់។ក្រៅពីនេះខេត្តកណ្តាលស្លាន់១នាក់ ខេត្តតាកែវ៣នាក់ស្វាយរៀង២នាក់ស្ទឹងត្រែង១នាក់ក្រចេះ១នាក់កំពង់ចាម ៣នាក់និងខេត្តព្រះសីហនុ២នាក់។

លោកអ្នកនាំពាក្យ បានគូសបញ្ជាក់ថា ចំនួនករណីអគ្គិភ័យ៩ខែឆ្នាំនេះ ធៀបទៅនឹង៩ខែឆ្នាំ២០២២ ឃើញថា មានការកើនឡើង ដោយ៩ខែឆ្នាំមុន មានអគ្គិភ័យកើតឡើងចំនួនតែ ៣៥៧លើក ឆេះផ្ទះ៦១៧ខ្នង តូបផ្សារ៧៧តូបឃ្លាំងទំនិញ១៦កន្លែង សាលារៀន២ខ្នង រោងចក្រសិប្បកម្ម៩កន្លែងអគាររដ្ឋបាល២កន្លែងស្លាប់មនុស្ស១២នាក់និងរបួស៤៥នាក់។

គួររម្លឹកផងដែរថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ លោកឧត្តមសេនីយ៍ឯក នេត វ៉ាន់ថា កន្លងទៅក៏ធ្លាប់បានបញ្ជាក់ដែរថា ដើមចមដែលនាំឲ្យមានគ្រោះអគ្គិភ័យកើតឡើងគឺបណ្ដាលមកពីការឆ្លងចរន្តអគ្គិសនីចំនួន ៤១.៥៥ភាគរយ,ប្រើប្រាស់ភ្លើងចំនួន៣៨.២៤ភាគរយនិងក្ដាប់មិនបានចំនួន ២០.២១ភាគរយ៕