សារព័ត៌មាន នគរវត្ត តែងតែនាំមុខគេជានិច្ច
ការស្វែងរកពីសំណាក់យោធា និងប៉ូលីសដ៏សំខាន់មួយកំពុងដំណើរការនៅក្នុងប្រទេសកូឡុំប៊ីសម្រាប់ឪពុករបស់ខ្សែប្រយុទ្ធ Liverpool កីឡាករ Luis Diaz ដោយអាជ្ញាធរផ្តល់រង្វាន់៤០,០០០ផោនសម្រាប់ព័ត៌មានដែលនាំទៅដល់ការជួយសង្គ្រោះរបស់គាត់។
ទាហានជាង១២០នាក់ រួមទាំងប៉ូលីសបានស្វែងរកភាគខាងជើងប្រទេសកូឡុំប៊ីសម្រាប់លោក Luis Manuel Diaz កាលពីថ្ងៃអាទិត្យ ចំពេលមានសេចក្តីរាយការណ៍ថា បុរសប្រដាប់អាវុធបាននាំគាត់ និងប្រពន្ធរបស់គាត់។ ម្តាយរបស់កីឡាករខាងលើអ្នកស្រី Cilenis Marulanda ត្រូវបានរកឃើញនៅតំបន់Barrancas កាលពីថ្ងៃសៅរ៍។
Diaz បានអវត្តមានពីក្រុម Liverpool ដែលបានយកឈ្នះលើក្រុម Nottingham Forest កាលពីថ្ងៃអាទិត្យសប្តាហ៍មុន។
កងទ័ពបាននិយាយថា ខ្លួនបានបង្កើតការបិទផ្លូវ និងដាក់ពង្រាយកងអនុសេនាតូច២គ្រឿង យន្តហោះគ្មានមនុស្សបើក ឧទ្ធម្ភាគចក្រ និងយន្តហោះដែលមានរ៉ាដាក្នុងការស្វែងរកឪពុករបស់គាត់។
អាជ្ញាធរកូឡុំប៊ីមិនបានផ្តល់ព័ត៌មានលម្អិតអំពីការចាប់ជំរិតដែលត្រូវបានរាយការណ៍នោះទេ ប៉ុន្តែប្រព័ន្ធផ្សព្វផ្សាយក្នុងស្រុកបាននិយាយថា ម្តាយ និងឪពុករបស់ Diaz ត្រូវបានក្រុមប្រដាប់អាវុធចាប់ឡើងលើម៉ូតូនៅស្ថានីយ៍ប្រេងឥន្ធនៈមួយក្នុងទីក្រុង Barrancas ដែលជាទីក្រុងកំណើតរបស់ពួកគេ ដែលស្ថិតនៅក្នុងទីក្រុង La Guajira តំបន់ភាគខាងជើងរបស់ប្រទេស។
ប្រធានាធិបតីកូឡុំប៊ីលោក Gustavo Petro បាននិយាយថា “កងកម្លាំងសាធារណៈទាំងអស់ត្រូវបានដាក់ពង្រាយ” ដើម្បីស្វែងរកឪពុករបស់ Diaz ។ថ្លែងកាលពីថ្ងៃអាទិត្យ អគ្គស្នងការនគរបាលជាតិលោកឧត្តមសេនីយ៍ William Rene Salamanca បានប្រកាសផ្តល់រង្វាន់ “រហូតដល់២០០លានប៉េសូ” (ប្រហែល៤០,០០០ផោន) សម្រាប់ព័ត៌មានពីឪពុករបស់ Diaz។
អគ្គមេធាវី Francisco Barbosa បាននិយាយថា គាត់បានទាក់ទង Diaz ពីរដងដើម្បីផ្តល់ព័ត៌មានថ្មីៗ លើការស៊ើបអង្កេតលើបុរសវ័យ២៦ឆ្នាំរូបនេះ។ លោក Barbosa បានប្រាប់ Diaz ថា ព័ត៌មានត្រូវបានទទួលបានទាក់ទងនឹងលទ្ធភាពដែលឪពុករបស់គាត់អាចស្ថិតនៅក្នុងប្រទេស Venezuela ដែលជាស្ថានភាពមួយដែល Barbosa បាននិយាយថា នឹងតម្រូវឱ្យមានការអន្តរាគមន៍ពីប្រធានាធិបតី Petro ។
អ្នកចាត់ការក្រុម Liverpool លោក Jurgen Klopp បានឧទ្ទិសជ័យជម្នះ ៣–០ នៅ Premier League កាលពីថ្ងៃអាទិត្យលើក្រុម Nottingham Forest ទៅ Diaz ដោយនិយាយថា ពួកគេបានឈ្នះ “សម្រាប់បងប្អូនរបស់យើង”។
ជុំវិញដោយមិត្តរួមក្រុមរបស់គាត់ Diogo Jota បានលើកអាវលេខ៧របស់ Diaz បន្ទាប់ពីស៊ុតបញ្ចូលទីគ្រាប់ដំបូងឲ្យក្រុម Liverpool កាលពីថ្ងៃអាទិត្យ។ ក្លិប Liverpool បានប្រកាសមុនការប្រកួតថា ពួកគេដឹងពីស្ថានភាពដែលកំពុងបន្តដែលពាក់ព័ន្ធនឹងគ្រួសារ Diaz ហើយថា សុខុមាលភាពរបស់គាត់នឹងបន្តជាអាទិភាពរបស់យើងភ្លាមៗ ៕
ដោយ៖ ភារៈ(រូបភាព ៖ BBC Sport)
