សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ប្រសិនបើវិទ្យុអាសុីសេរី ចង់ទទួលបានការផ្ដល់កិច្ចសម្ភាសពីអ្នកនាំពាក្យរាជរដ្ឋាភិបាលមែននោះ លោក ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងដែលកំពុងកាន់តួនាទីជាប្រធានអង្គភាពអ្នកនាំពាក្យរាជរដ្ឋាភិបាល បានផ្ដល់គន្លឹះងាយៗ៥ចំណុច។ តាមរយៈបណ្ដាញទំនាក់ទំនងសង្គមហ្វេសប៊ុក នៅល្ងាចថ្ងៃទី២ ខែវិច្ឆិកា ឆ្នាំ២០២៣នេះ លោក ប៉ែន បូណា បានគូសបញ្ជាក់ក្នុងន័យឆ្លើយតបទៅនឹងព័ត៌មានបែបវាយប្រហាររបស់វិទ្យុមួយនេះថា«បើចង់ឱ្យអ្នកនាំពាក្យផ្ដល់បទសម្ភាស មិនពិបាកទេ»។
បើតាមលោក ប៉ែន បូណា គន្លឹះទាំង៥ដែលជួយបើកផ្លូវឱ្យអាសុីសេរី អាចសម្ភាសបាននោះ រួមមាន ៖
ទី១-ត្រូវគោរពច្បាប់កម្ពុជា ។
ទី២-ត្រូវគោរពវិជ្ជាជីវៈសារព័ត៌មាន ។
ទី៣-ត្រូវមានក្រមសីលធម៌ក្នុងការផ្សាយព័ត៌មាន ។
ទី៤-កុំនិយាយបំផ្លើស បំភ្លៃ តាមទំនើងចិត្ត ។
និងទី៥-ឈប់ផ្សាយព័ត៌មានបែបញុះញង់ និងបន្ទាបបន្ថោកប្រទេសជាតិខ្លួនឯងតទៅទៀត។ ឯកឧត្តក៏បានសង្កត់ធ្ងន់ទៀតថា«ចំណុចទាំង ៥ ដូចបានលើកឡើងខាងលើនេះមិនពិបាកធ្វើទេ ប្រសិនបើយើងជាអ្នកសារព័ត៌មានវិជ្ជាជីវៈ និងមានបេះដូងជាខ្មែរ»។
ប្រតិកម្មពីប្រធានអង្គភាពអ្នកនាំពាក្យរាជរដ្ឋាភិបាល បានធ្វើឡើងបន្ទាប់ពីវិទ្យុអាសុីសេរី ចេញផ្សាយព័ត៌មានមួយក្រោមចំណងជើងថា«មន្ត្រីនាំពាក្យរដ្ឋាភិបាលអាណត្តិថ្មីរងការរិះគន់ថា ខ្វះការទទួលខុសត្រូវក្នុងការបំពេញតួនាទី»។
បើតាម លោក ប៉ែន បូណា ដែលមានបទពិសោធន៍ចាស់វស្សាក្នុងវិស័យសារព័ត៌មាន និងធ្លាប់កាន់តួនាទីជាប្រធានក្លិបអ្នកកាសែតផងនោះ ព័ត៌មានរបៀបដូចដែលអាសុីសេរីបានផ្សាយខាងលើនេះ មិនបានឆ្លុះបញ្ចាំងពីវិជ្ជាជីវៈត្រឹមត្រូវរបស់អ្នកកាសែតឡើយ ដោយឯកឧត្តមបានគូសបញ្ជាក់ត្រឡប់ទៅវិញថា«បានប្រើពាក្យសុទ្ធតែ <ក្រុមអ្នកសារព័ត៌មាន> តែរកអ្នកសារព័ត៌មានពិតប្រាកដមកសម្ភាសមិនបាន។ នៅកម្ពុជាមានអ្នកសារព័ត៌មានរាប់ពាន់នាក់ឯណោះ ហើយពួកគេគ្មានបញ្ហាដូចពួកលោកទេ សូមកុំយកឈ្មោះពួកគេទៅប្រើ»។
សូមបញ្ជាក់ថា គិតចាប់ពីថ្ងៃដែលរាជរដ្ឋាភិបាលនីតិកាលទី៧ ក្រោមការដឹកនាំរបស់សម្ដេចធិបតី ហ៊ុន ម៉ាណែត ចេញដំណើរបម្រើជាតិមាតុភូមិ និងប្រជាជនមកនោះ ភាពមមាញឹកប្រចាំថ្ងៃ របស់លោក ប៉ែន បូណា ទាំងថ្ងៃសៅរ៍ ថ្ងៃអាទិត្យ រួមទាំងថ្ងៃសំរាកបុណ្យជាតិ និងអន្តរជាតិ គឺផ្ដល់បទសម្ភាសជូនអ្នកកាសែត ទាំងតាមទូរសព្ទ តាមបណ្ដាញសង្គម និងកិច្ចសម្ភាសផ្ទាល់៕
ដោយ ៖ សហការី
