លោក Erik ten Hag ដែលជាអ្នកចាត់ការទូទៅរបស់ក្រុមបិសាចក្រហមManchester United កំពុងតែស្ថិតក្រោមសម្ពាធកាន់តែខ្លាំង បន្ទាប់ពីក្រុមដែលខ្វះខាតរបស់គាត់ត្រូវបានទម្លាក់ចេញពី League Cup ដោយក្រុម Newcastle United នៅកីឡដ្ឋាន Old Trafford កាលពីថ្ងៃពុធ ជាមួយនឹងចំណងជើងប្រព័ន្ធផ្សព្វផ្សាយជាច្រើនបានបង្ហាញពីស្ថានភាពរបស់គាត់។
“ការអាម៉ាស់ទាំងស្រុងរបស់លោក Ten Hag អ្នកគ្រប់គ្រង Man United ប្រឈមមុខនឹងសំណួរដ៏ធ្ងន់ធ្ងរបន្ទាប់ពី League Cup” គឺជាចំណងជើងរបស់សារព័ត៌មាន The Daily Telegraph ។
៣ថ្ងៃបន្ទាប់ពីការបរាជ័យក្នុងលទ្ធផល ៣–០ ក្នុងផ្ទះដោយក្រុម Manchester City ភាពសោកសៅនៅតែបន្តសម្រាប់ក្រុមបិសាចក្រហមដែលជួបការលំបាករបស់លោក Ten Hag នៅពេលដែលពួកគេត្រូវបានរងបរាជ័យក្នុងលទ្ធផលដូចគ្នាក្នុងការប្រកួត League Cup ជុំទី៤ ហើយបានស្រែកហ៊ោចេញពីទីលាននៅឯការប្រកួតចុងក្រោយ។
កាសែត Daily Express បានសរសេរថា Miguel Almiron របស់ Newcastle, Lewis Hall និង Joe Willock បានស៊ុតបាល់បញ្ចូលទីម្នាក់១គ្រាប់នាំឱ្យក្រុមលោក Eddie Howe យកឈ្នះក្រុមរបស់លោក Ten Hag ដល់ទឹកដីផ្ទាល់តែម្តង ដែលនេះជាភាពអាម៉ាសមួយសម្រាប់ក្រុមបិសាចក្រហមក្នុងនាមជាម្ចាស់ផ្ទះ និងក្នុងនាមជាក្រុមដែលការពារតំណែងជើងឯកLeague Cup ត្រូវបរាជ័យ។
ក្រុមដែលមានរឿងរ៉ាវច្រើនបំផុតរបស់អង់គ្លេសបានជួបនឹងការលំបាកទៅនឹងការចាប់ផ្តើមដ៏អាក្រក់បំផុតក្នុងប្រវត្តិសាស្ត្ររបស់ពួកគេ ដោយបានចាញ់៥លើកក្នុងចំណោម១០ប្រកួតក្នុងផ្ទះដំបូងរបស់ពួកគេនៅក្នុងការប្រកួតទាំងអស់ជាលើកដំបូងចាប់តាំងពីឆ្នាំ១៩៣០–១៩៣១។ បរាជ័យកាលពីថ្ងៃពុធគឺជាលើកទីមួយហើយដែល Man Utd បានចាញ់ការប្រកួតជាបន្តបន្ទាប់នៅ Old Trafford ដោយ៣គ្រាប់ឬច្រើនជាងនេះចាប់តាំងពីខែតុលា ឆ្នាំ១៩៦២។
ការជម្រុះរបស់ពួកគេគឺជាការបន្ទាបខ្លួនជាពិសេសចាប់តាំងពីឈ្នះ League Cup ជាពានមួយដែលលោក Ten Hag បានលើកឡើងក្នុងការកាន់តំណែងជាគ្រូបង្វឹក Man Utd ពេលពួកគេបានយកឈ្នះ Newcastle ២–០ ក្នុងការប្រកួតវគ្គផ្តាច់ព្រ័ត្រនៅ Wembley កាលពីរដូវកាលមុន។
ទោះជាយ៉ាងណា បុរសសញ្ជាតិហូឡង់វ័យ៥៣ឆ្នាំរូបនេះបានប្ដេជ្ញាថានឹងតស៊ូបន្តទៀត។ គាត់បានប្រាប់អ្នកយកព័ត៌មានថា “ខ្ញុំយល់ថានៅពេលដែលលទ្ធផលមិននៅទីនោះ វាសមហេតុផលដែលពួកគេកំពុងចោទសួរនោះ ប៉ុន្តែខ្ញុំជឿជាក់ថាខ្ញុំអាចធ្វើបាន។ នៅពេលនេះយើងស្ថិតនៅក្នុងកន្លែងមិនល្អ ហើយខ្ញុំទទួលខុសត្រូវចំពោះវា ខ្ញុំជាអ្នកប្រយុទ្ធ ខ្ញុំមើលឃើញថាវាជាបញ្ហាប្រឈមមួយ”។
គួរបញ្ជាក់ថា លោក Ten Hag បានចាកចេញពីក្លិប Ajax Amsterdam មកចូលរួមជាមួយ Manchester United ក្នុងខែមេសា ឆ្នាំ២០២២ ដោយបានចុះហត្ថលេខាលើកិច្ចសន្យារយៈពេល៣ឆ្នាំជាមួយនឹងជម្រើសនៃឆ្នាំបន្ថែម។ រយៈពេលដែលគាត់ស្នាក់នៅក្នុងការងារនឹងអាស្រ័យលើសមត្ថភាពរបស់គាត់ក្នុងការបង្វែរជោគវាសនារបស់ Man Utd ដោយក្រុមបិសាចក្រហមត្រូវប៉ះម្ចាស់ផ្ទះ Fulham នៅថ្ងៃសៅរ៍នេះ ៕
ដោយ៖ ភារៈ(រូបភាព ៖ Reuters/CNA)