កូរ៉េខាងជើងអះអាងថាខ្លួនមានកម្លាំងនុយក្លេអ៊ែរដ៏មានឥទ្ធិពលបំផុតរបស់ពិភពលោក

ចែករំលែក៖

ប្រព័ន្ធផ្សព្វផ្សាយកូរ៉េខាងជើងបានប្រកាសថា ប្រទេសរបស់ខ្លួនបានជោគជ័យក្នុងការកសាងកម្លាំងនុយក្លេអ៊ែរខ្លាំងបំផុតរបស់ពិភពលោកក្រោមការដឹកនាំរបស់លោក គីម ជុងអ៊ុន។
សេចក្តីថ្លែងការណ៍នេះត្រូវបានធ្វើឡើងចំពេលមានព័ត៌មានថា កូរ៉េខាងជើងកំពុងស្ថិតក្នុងដំណាក់កាលចុងក្រោយនៃការរៀបចំការបាញ់បង្ហោះផ្កាយរណបឈ្លបយកការណ៍យោធាជាលើកទី៣ បន្ទាប់ពីបរាជ័យចំនួនពីរដងក្នុងខែឧសភានិងខែសីហា។
លោក Tong Thae-gwan អ្នកនិពន្ធវិចារណកថានៃគណបក្សពលករកូរ៉េបាននិយាយថា “ជាមួយនឹងថាមពលបដិវត្តន៍ឧស្សាហកម្មរបស់គណបក្សពលករកូរ៉េ កម្លាំងនុយក្លេអ៊ែរជាតិបានកើនឡើងយ៉ាងខ្លាំង ហើយបានឈានដល់កម្រិតដ៏រឹងមាំបំផុតនៅក្នុងពិភពលោក” ។
អត្ថបទរបស់លោក Tong ក៏បានលើកឡើងពីសមិទ្ធផលដែលលោកប្រធាន Kim Jong Un សម្រេចបានក្នុងឆ្នាំនេះ រួមទាំងការបាញ់សាកល្បងមីស៊ីលផ្លោងអន្តរទ្វីប Hwasong (ICBM) និងកិច្ចប្រជុំកំពូលជាមួយប្រធានាធិបតីរុស្ស៊ី លោក Vladimir Putin នៅចុងបូព៌ាក្នុងខែកញ្ញា។
លោក Tong ត្រូវបានផ្តល់ឱ្យផ្ទះល្វែងមាត់ទន្លេថ្មីក្នុងទីក្រុងព្យុងយ៉ាងដោយលោកប្រធានាធិបតី Kim ក្នុងខែមេសា ឆ្នាំ 2022 រួមជាមួយនឹងលោកស្រី Ri Chun-hee អ្នកផ្សាយស្រីដ៏ល្បីបំផុតរបស់កូរ៉េខាងជើង។
ប្រទេសកូរ៉េខាងជើងបាននិយាយថា ខ្លួនបានជ្រើសរើសថ្ងៃទី 18 ខែវិច្ឆិកា ជារៀងរាល់ឆ្នាំជា “ទិវាឧស្សាហកម្មមីស៊ីល” ដើម្បីរំលឹកដល់ការបាញ់បង្ហោះដោយជោគជ័យនូវមីស៊ីល Hwasong-17 ICBM ក្នុងឆ្នាំ 2022៕