សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី បានថ្លែងឱ្យដឹងនៅព្រឹកថ្ងៃទី០៧ ខែវិច្ឆិកា ឆ្នាំ២០២៣នេះថា៖ ករណីបាតុភូតគ្រោះធម្មជាតិ ខ្យល់កន្ត្រាក់បានកើតឡើងជិត ២៨០លើក បណ្ដាលឱ្យមនុស្សស្លាប់ និងរបួសជិត ២០០នាក់ ខណៈផ្ទះសម្បែងរបស់ប្រជាពលរដ្ឋជិត ១៥០០០ខ្នង និងហេដ្ឋារចនាសម្ព័ន្ធមួយចំនួនទៀត បានរងផលប៉ះពាល់ ,នេះបេីគិតត្រឹមរយៈពេល ១០ខែ ក្នុងឆ្នាំ២០២៣។
អ្នកនាំពាក្យរូបនេះ បានគូសបញ្ជាក់ថា ករណីខ្យល់កន្ត្រាក់កើតឡើងចំនួន ២៧៩លើក បណ្ដាលឱ្យរលំផ្ទះចំនួន ២០០២ខ្នង របើកដំបូលផ្ទះ ១២៧៥២ខ្នង របើកដំបូលសាលារៀន ៩២ខ្នង តូបផ្សារ ១៧៨តូប អគាររដ្ឋបាល ៣៩កន្លែង ស្លាប់មនុស្ស ៩នាក់ និងរបួស ១៧០នាក់។
បន្ថែមពីនេះ លោក សុទ្ធ គឹមកុលមុនី បន្តថា ក្នុងចំណោមផ្ទះរលំ និងរបើកដំបូលជិត ១៥០០០ខ្នង ក្នុងនោះនៅខេត្តឧត្តរមានជ័យប៉ះពាល់ជាង ១៣៧០ខ្នង ខេត្តបន្ទាយមានជ័យជាង ១២០០ខ្នង ខេត្តបាត់ដំបងជាង ១៨៦០ខ្នង ខេត្តកំពង់ស្ពឺជាង ៩០០ខ្នង ខេត្តក្រចេះជាង ១០០០ខ្នង ខេត្តកំពង់ចាមជិត ៧០០ខ្នង និងខេត្តតាកែវជាង ៦០០ខ្នង៕
ដោយ៖ សហការី
