សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមការបញ្ជាក់ពីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» បានឱ្យដឹងថា ទំនិញខូចគុណភាពប្រមាណជិត ១០០គីឡូក្រាមបន្ថែមទៀត ត្រូវបានមន្រ្តីជំនាញ ក.ប.ប. បន្តចុះបង្រ្កាប និងដកហូតទំនិញទាំងនោះដែលបានដាក់លក់នៅលើទីផ្សារ។
ប្រភពដដែលបន្តថា ដោយមានការចង្អុលបង្ហាញពីលោក ផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. ឱ្យមន្រ្តីជំនាញនៅតាមបណ្ដាសាខារាជធានី ខេត្តយកចិត្តទុកដាក់ចំពោះការទប់ស្កាត់ទំនិញមានហានិភ័យដែលនាំឱ្យប៉ះពាល់សុខភាពអ្នកប្រើប្រាស់ តួយ៉ាងមន្រ្តីជំនាញ ក.ប.ប. សាខាខេត្តត្បូងឃ្មុំ ខេត្តឧត្តរមានជ័យ ខេត្តព្រៃវែង ខេត្តមណ្ឌលគិរី និងខេត្តសៀមរាប កាលពីថ្ងៃទី១៥ ខែវិច្ឆិកា ឆ្នាំ២០២៣ម្សិលមិញនេះ បានខិតខំស្វះស្វែងចុះត្រួតពិនិត្យទំនិញបរិភោគគ្រប់ប្រភេទទាំងនៅលើទីផ្សារ ម៉ាត រថយន្តដឹកទំនិញ និងឃ្លាំងស្ដុកនិងចែកចាយគ្រប់ប្រភេទ ក្នុងគោលបំណងស្វែងរកទំនិញដែលហានិភ័យដល់សុខភាពបងប្អូនទូទៅដែលជាអ្នកប្រើប្រាស់។
មន្រ្តីជំនាញ បានគូសបញ្ជាក់ថា ទំនិញដែលចរាចរពុំត្រឹមត្រូវនិងមានហានិភ័យទាំងនោះគឺផ្ដើមចេញពីឈ្មួញដែលប្រកបរបរមិនសុចរិត ពោលគឺព្យាយាមគេចវេសគ្រប់រូបភាពដែលអាចធ្វើបានដោយពុំគិតពីសុខភាពអ្នកប្រើប្រាស់នោះឡើយ។
តាមលទ្ធផលនៃការត្រួតពិនិត្យមន្រ្តីជំនាញបានដកហូតទំនិញដែលមានហានិភ័យចំនួន ៨៦.៤៧គីឡូក្រាម និងពិន័យទៅតាមនីតិវិធីដែលមានចែងជាធរមាន។ អគ្គនាយកដ្ឋាន ក.ប.ប. សូមលើកទឹកចិត្តបងប្អូនប្រជាពលរដ្ឋចូលរួមសហការផ្ដល់ដំណឹងមកអគ្គនាយកដ្ឋាននៅពេលណាដែលឃើញ និងដឹងថាមានករណីចរាចរលក់ទំនិញដែលពុំមានអនុលោមភាព និងមានហានិភ័យខ្ពស់ទៅលើសុខភាពបងប្អូនប្រជាពលរដ្ឋ៕
ដោយ៖ សហការី
