សម្តេចធិបតី ហ៊ុន ម៉ាណែត៖ ក្នុងរយៈពេល៣ខែនេះ រាជរដ្ឋាភិបាលបានដាក់ចេញនូវកម្មវិធីនយោបាយជាអាទិភាពចំនួន៥ ឱ្យអនុវត្តសម្រាប់អាណត្តិទី៧

ចែករំលែក៖

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ក្នុងរយៈពេល៣ខែមកនេះ រាជរដ្ឋាភិបាលបានដាក់ចេញនូវកម្មវិធីនយោបាយជាអាទិភាពចំនួន៥ ឱ្យអនុវត្តសម្រាប់អាណត្តិទី៧នេះ ដោយកម្មវិធីនយោបាយទាំង៥នេះ គឺដើម្បីលើកសេដ្ឋកិច្ច សុខុមាលភាព វិស័យអប់រំ នៅកម្ពុជាឲ្យកាន់តែល្អប្រើសើរបន្ថែមទៀត។ ការថ្លែងបែបនេះរបស់សម្ដេចធិបតី នៅក្នុងឱកាសអញ្ជើញជាអធិបតីភាពក្នុងសន្និសីទចក្ខុវិស័យប្រទេសកម្ពុជា ឆ្នាំ២០២៣ ស្តីពី «ចក្ខុវិស័យប្រទេសកម្ពុជា ឆ្នាំ២០៣០ និងឆ្នាំបន្តបន្ទាប់ទៀត៖ ការកំណត់មាគ៌ាសម្រាប់វិបុលភាពប្រកបដោយភាពធន់ និរន្តរភាពនិងបរិយាប័ន្ន» នាព្រឹកថ្ងៃទី២៣ ខែវិច្ឆិកា ឆ្នាំ២០២៣នេះ ។

សម្តេចធិបតី ហ៊ុន ម៉ាណែត ថ្លែងបន្តថា កម្មវិធីនយោបាយជាអាទិភាពចំនួន៥ ដែលឱ្យអនុវត្តសម្រាប់អាណត្តិទី៧នេះ គឺធ្វើឡើងតាមរយៈការពង្រឹង វិសាលភាពមូលនិធិសមធម៌ សុខាភិបាល ការបណ្តុះបណ្តាលជំនាញវិជ្ជាជីវៈដល់ក្រុមគ្រួសារក្រីក្រ និងការពង្រីកវិសាលភាពមន្រ្តីជំនាញផ្នែកកសិកម្មនៅតាមមូលដ្ឋានពោលគឺនៅតាមឃុំ-សង្កាត់ជាដើម។

សម្ដេចធិបតី ថ្លែងថា រាជរដ្ឋាភិបាល ក៏បានដាក់ចេញនូវការរៀបចំ នៃកិច្ចដំណើរការរបស់អាជ្ញាធរជាតិដោះស្រាយវិវាទនៅក្រៅប្រព័ន្ធតុលាការ។

ជាមួយគ្នានេះ សម្ដេចធិបតី ថ្លែងថា រាជរដ្ឋាភិបាលក៏បាន រៀបចំគណៈកម្មការជាតិមួយចំនួនផងដែរ ក្នុងនោះគណៈកម្មការជាតិជំរុញការកែទម្រង់សេវាសាធារណៈ, គណៈកម្មការជាតិជំរុញការអនុវត្តវិធានគន្លឹះក្នុងវិស័យអប់រំ, និងគណៈកម្មការជាតិជំរុញការអនុវត្តវិស័យគន្លឹះក្នុងវិស័យសុខាភិបាល៕