សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ ជនសង្ស័យមួយក្រុមបានធ្វេីសកម្មភាពគាស់ទម្លុះទម្លាយចូលលួចសម្ភារក្នុងផ្ទះប្រជាពលរដ្ឋមួយកន្លែងតែមិនបានសម្រេចខណៈម្ចាស់ដឹងទាន់ហេីយគេចខ្លួនបាត់កាលពីវេលាម៉ោង១អធ្រាត្រឈានចូលថ្ងៃទី២៤ ខែធ្នូឆ្នាំ២០២៣ នៅចំណុចកន្លែងវេរលុយវីង ស្ថិតក្នុងភូមិធ្នង់រលើង ឃុំលាយបូរ ស្រុកត្រាំកក់ ខេត្តតាកែវ។ រហូតមកដល់វេលាម៉ោង៥ល្ងាចថ្ងៃទី២៤ ខែឆ្នាំដដែលត្រូវបានកម្លាំងសមត្ថកិច្ចឃាត់ខ្លួនបានម្នាក់យកទៅសួរនាំ។
ម្ចាស់ផ្ទះរងគ្រោះឈ្មោះ ញ៉ិល សុភកញ្ញា ភេទស្រី អាយុ៣១ឆ្នាំ នៅភូមិធ្នង់រលើង ឃុំលាយបូរ ស្រុកត្រាំកក់ ខេត្តតាកែវ ។
ចំណែកជនសង្ស័យ០១នាក់ដែលចាប់ឃាត់ខ្លួនបានឈ្មោះវ័ន ទិ ភេទប្រុសអាយុ២២ឆ្នាំ នៅភូមិទន្លេនាម ឃុំចំប៉ី ស្រុកអង្គរជ័យ ខេត្តកំពត ។
តាមរបាយការណ៍របស់សមត្ថកិច្ចបានឱ្យដឹងថា ក្រោយពីបានទទួលពាក្យបណ្ដឹងរបស់ជនគ្រោះសមត្ថកិច្ចបានចុះធ្វើការស្រាវជ្រាវកសាងសំណុំរឿងទៅតាមនីតិវិធី។
បន្ទាប់ពីទទួលបានពាក្យបណ្ដឹងនិងធ្វើការស្រាវជ្រាវយ៉ាងយកចិត្តទុកដាក់របស់ ផ្នែកជំនាញនៃអធិការដ្ឋាននគរបាលស្រុកត្រាំកក់ដែលដឹកនាំបញ្ជាដោយលោកវរសេនីយ៍ឯកឌុក ធីយ៉ា អធិការនៃអធិការដ្ឋាននគរបាលស្រុកត្រាំកក់ទេីបយើងកំណត់មុខសញ្ញាបាន។
ដោយមានបទបញ្ជាពីលោកឧត្តមសេនីយ៍ទោស្នងការព្រមទាំងដឹកនាំសម្របសម្រួលនីតិវិធីដោយលោកព្រះរាជអាជ្ញា នៅថ្ងៃទី២៤ខែធ្នូ ឆ្នាំ ២០២៣ វេលាម៉ោង៥ល្ងាច សមត្ថកិច្ចបានធ្វើការឃាត់ខ្លួនជនសង្ស័យនៅចំណុចខាងក្រោយផ្ទះជនសង្ស័យស្ថិតក្នុងភូមិទន្លេនាម ឃុំចំប៉ី ស្រុកអង្គរជ័យ រួមនឹងវត្ថុតាងម៉ូតូហុងដាឌ្រីម c125 ពណ៌ខ្មៅ០១គ្រឿង ដើម្បីយកមកធ្វើការសាកសួរ។ បន្ទាប់ពីធ្វើការសាកសួរជនសង្ស័យឈ្មោះវ័ន ទិ បានឆ្លើយសារភាពថាខ្លួននិងបក្សពួកចំនួនពីរនាក់ទៀតមានឈ្មោះហាក់ វាយោ ភេទប្រុសអាយុ១៦ឆ្នាំនិងឈ្មោះហាក់ វេហាភេទប្រុស អាយុ២០ឆ្នាំនៅភូមិទន្លេនាម ឃុំចំប៉ី ស្រុកអង្គរជ័យ ខេត្តកំពតបានធ្វើសកម្មភាពយកទុលល្វីសនិងដែកកងសម្រាប់ដាក់កូនសោគាស់និងឆ្កឹះសោចូលលួចសម្ភារតាមកន្លែងវេរលុយវីងនិងតាមផ្ទះនៅទីប្រជុំជនបានចំនួន០៨ករណីរួមមាន÷
-នៅថ្ងៃទី១១ខែកញ្ញាឆ្នាំ២០២៣ វេលាម៉ោង១២រំលងអធ្រាត្រ ឈ្មោះវ័ន ទិ និងបក្សពួកបានយកទុលល្វីសគាស់សោចូលលួចយកសម្ភារនៅកន្លែងវីងនៅភូមិព្រៃស្រោង ឃុំអង្គតាសោមបានរង្វាន់ក្រវិលកំប៉ុងស្រាបៀរលក់បានប្រាក់ចំនួន ៥០ម៉ឺនរៀល។
-នៅថ្ងៃទី ២១ខែកញ្ញាឆ្នាំ២០២៣វេលាម៉ោងជាង១២រំលងអធ្រាត្រ នៅចំណុចផ្សារអង្គតាសោម ខ្លួននិងបក្សពួកបានធ្វើសកម្មភាពគាស់សោចូលលួចសម្ភារកន្លែងវេរលុយវីង តែយកពុំបានសម្ភារអ្វីឡើយ។
-នៅថ្ងៃទី២១ខែវិច្ឆិកាឆ្នាំ២០២៣ វេលាម៉ោងជាង១២រំលងអធ្រាត្រ ខ្លួនបានធ្វើសកម្មភាពយកទុលល្វីសគាស់តូបកន្លែងវេរលុយវីងលួចយកបានទូរស័ព្ទចំនួន០២គ្រឿងនៅភូមិត្រពាំងរំពាក់ ឃុំត្រាំកក់យកទៅលក់បានប្រាក់ចំនួន៧០ ដុល្លារ។
-នៅថ្ងៃទី ២៥ខែវិច្ឆិកាឆ្នាំ២០២៣ម៉ោង ជាង១២រំលងអធ្រាត្រ ខ្លួននិងបក្សពួកបានធ្វើសកម្មភាពយកទុលល្វីសគាស់សោកន្លែងវេរលុយវីងនៅភូមិឬស្សីស្រុកឃុំញ៉ែងញ៉ង យកបានទូរស័ព្ទចំនួន ០៩គ្រឿង។
-នៅថ្ងៃទី២៥ខែធ្នូឆ្នាំ២០២៣វេលាម៉ោង ជាង១២រំលងអធ្រាត្រ ខ្លួនបានធ្វើសកម្មភាពគាស់កន្លែងវេរលុយវីងក្នុងផ្សារអង្គតាសោមស្ថិតភូមិអង្គតាសោម ឃុំអង្គតាសោមយកបានបារីម៉ាយសេវ៉ែនចំនួន ០៨ សុងទៅលក់បានប្រាក់ចំនួន ៣០ម៉ឺនរៀល។
-នៅថ្ងៃទី ២១ ខែធ្នូ ឆ្នាំ២០២៣ វេលាម៉ោងជាង១២រំលងអធ្រាត្រ ខ្លួននិងបក្សពួកបានធ្វើសកម្មភាពគាស់ចូលលួចកន្លែងវីងនៅក្រុងដូនកែវ ខេត្តតាកែវ តែយកមិនបានសម្ភារអ្វីឡើយ។
-នៅថ្ងៃទី ២២ខែធ្នូឆ្នាំ២០២៣ វេលាម៉ោងជាង១២រំលងអធ្រាត្រ ខ្លួននិងបក្សពួកបានធ្វើសកម្មភាពគាស់សោកន្លែងលក់កុំព្យូទ័រនៅផ្សារតាកែវស្ថិតក្នុងក្រុងដូនកែវ តែលួចពុំបានសម្ភារអ្វីឡើយ។
-នៅថ្ងៃទី ២៤ ខែធ្នូ ឆ្នាំ២០២៣វេលាម៉ោង១ រំលងអធ្រាត្រខ្លួនបានធ្វើសកម្មភាពគាស់សោចូលលួចសម្ភារៈនៅកន្លែងវីងវេរលុយរបស់ឈ្មោះញ៉ិលសុភកញ្ញា ភេទស្រី អាយុ៣១ឆ្នាំស្ថិតនៅក្នុងភូមិធ្នង់រលើង ឃុំលាយបូរ ស្រុកត្រាំកក់ ខេត្តតាកែវ តែត្រូវម្ចាស់គេភ្ញាក់ទាន់ក៏រត់គេច យកពុំបានសម្ភារអ្វីឡើយ។
បច្ចុប្បន្នសមត្ថកិច្ចយើងកំពុងធ្វើការសាកសួរនិងកសាងសំណុំរឿងទៅតាមនីតិវិធី៕
ដោយ៖ សុខាសែនជ័យ
