សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ស្នងការដ្ឋាននគរបាលខេត្តបាត់ដំបង បានបង្ហាញមុនក្រុមចោរពីរនាក់ ដែលបានធ្វេីសកម្មភាពគាស់តូបលក់គ្រឿងអលង្ការ និងលក់សម្លៀកបំពាក់ លួចយកចិញ្ជៀនចំនួន៥៤វង់ និងខោអាវមួយចំនួន នៅស្រុកបាណន់ ជាសាធារណៈ និងត្រៀមខ្លួនបញ្ជូនទៅកាន់តុលាការខេត្ត ដេីម្បីចាត់ការតាមច្បាប់ ក្រោយឃាត់ខ្លួនយកមកសាកសួររហូតបញ្ចប់នីតិវិធី នៅថ្ងៃទី២៨ ខែធ្នូ ឆ្នាំ២០២៣នេះ។
ប្រភពដដែលបន្តថា ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង កាលពីថ្ងៃទី២៦ ខែធ្នូឆ្នាំ២០២៣លោកវរសេនីយ៍ទោ សំ វីរៈ អធិការនគរបាលស្រុកបាណន់ បានដឹកនាំកម្លាំងជាមួយកម្លាំងប៉ុស្តិ៍នគរ បាលរដ្ឋបាលឈេីទាល បានចុះធ្វេីការស្រាវជ្រាវបង្ក្រាបឃាត់ខ្លួនជនសង្ស័យឈ្មោះយ៉ាន់ ច័ន្ទថន ភេទប្រុស អាយុ ២០ឆ្នាំ និងឈ្មោះ សុត ពិសី ភេទប្រុស អាយុ២០ឆ្នាំ អ្នកទាំងពីរនាក់មានទីលំនៅភូមិឈើទាល ឃុំឈេីទាល ស្រុកបាណន់ ខេត្តបាត់ដំបង។
ចំណែកវត្ថុតាងចាប់យកពីជនសង្ស័យរួមមាន៖
-ចិញ្ជៀន(លោហៈធាតុពណ៌ទង់ដែង)ចំនួន៥៤វង់
-ទូរឺវីសមានដងពណ៌ខ្មៅលាយពណ៌លឿងចំនួន០១
-ខោខាវប៊យជើងវែងចំនួន១៧
-ខោក្រណាត់ជើងវែងចំនួន០១
-អាវក្រណាត់ដៃវែងចំនួន០៨។
សូមជម្រាបជូនថា មូលហេតុនៃការឃាត់ខ្លួននេះគឺកាលពីយប់ ថ្ងៃទី២៥ខែធ្នូឆ្នាំ២០២៣នៅចំណុចផ្សារឈេីទាលស្ថិតក្នុងឃុំឈេីទាលស្រុកបាណន់ មានករណីលួចដោយមានស្ថានទម្ងន់ទោសដោយសារការប្រព្រឹត្តអំពើ ហិង្សា ដែលករណីនេះប្រព្រឹត្តិដោយជនសង្ស័យមិនស្គាល់អត្តសញ្ញាណបានធ្វេីសកម្មភាពប្រេីប្រាស់ទូរឺវីសដោះវី សជញ្ជាំងបាំងស័ង្កសីតូបលក់គ្រឿងអលង្ការ និងសំលៀក បំពាក់របស់ជនរងគ្រោះឈ្មោះ លឹម ចាន់ថន ហៅ ប៉ាង ភេទប្រុស អាយុ៣៦ឆ្នាំ មានទីលំនៅភូមិ-ឃុំកើតហេតុខាងលើ លួចយកគ្រឿងអលង្ការ(ចិញ្ជៀនលោហធាតុពណ៌ទង់ដែង)ចំនួន៥៤វង់ និងសំលៀកបំពាក់មួយចំនួន ក្នុងពេលម្ចាស់បិទទ្វារចាក់សោរមិនបាននៅ ។
ក្រោយពេលកេីតហេតុ ជនរងគ្រោះបានប្តឹងមកសមត្ថកិច្ចនគរបាលហេីយផ្តេីមពីបញ្ហានេះបានធ្វេីការស្រាវជ្រាវរហូតកំណត់មុខសញ្ញានិងឈានដល់ការឃាត់ខ្លួនបាននិងដកហូតវត្ថុតាងតែម្តង។ បច្ចុប្បន្នជនសង្ស័យខាងលេី ត្រូវបង្ហាញមុខជាសាធារណៈ មុននិងបញ្ជូនខ្លួនទៅតុលាការ ដេីម្បីអនុវត្តតាមនីតិវិធីបន្ត រីឯវត្ថុតាងរបស់ជនរងគ្រោះបានប្រគល់ជូនម្ចាស់វិញ៕
ដោយ៖ អ្នកបាត់ដំបង
