សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបេីករថយន្តពោងដឹកស៊ីម៉ងត៍ក្រោយ ហេីយពេលទម្លាក់សុីម៉ងត៍ដាក់ក្នុងរោងចក្រលាយបេតុងរួចរាល់ក៏មកឈប់ចតនៅមាត់ច្រកទ្វារចេញចូល ហេីយចុះពីលើរថយន្តដោយមិនបានពន្លត់ម៉ាសុីននិងដាក់ហ្វ្រ័ងដៃ ធ្វេីឱ្យរថយន្តរអិលចុះចំណោតឆ្លងផ្លូវទៅបុករះម៉ូតូ រថយន្តនិងរបងរោងចក្រកាត់ដេរខូចខាតយ៉ាងដំណំ បង្កការភ្ញាក់ផ្អេីលកាលពីវេលាម៉ោង១១និង១៥នាទីព្រឹកថ្ងៃទី២៨ ខែធ្នូ ឆ្នាំ២០២៣ ស្ថិតនៅចំណុចរោងចក្រកាត់ដេរ ផ្លូវបេតុង ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
បេីតាមសម្ដីតៃកុងរថយន្តបង្កបានឱ្យដឹងថា មុនពេលកើតហេតុ រូបគាត់បានបើករថយន្តពោងដឹកស៊ីម៉ងត៍ក្រុមហ៊ុនខេស៊ីមែនមួយគ្រឿងចូលទៅទម្លាក់សុីម៉ងត៍ក្នុងរោងចក្រលាយបេតុង រួចហើយក៏បានបើកចេញមកវិញនិងបានឈប់នៅខាងមុខក្បែរច្រកចេញចូលដោយចុះពីលើរថយន្តភ្លេចពន្លត់ម៉ាសុីននិងដាក់ហ្វ្រ័ងដៃ ទេីបរថយន្តបង្កបានរអិលទៅមុខធ្លាក់ចុះចំណោតឆ្លងផ្លូវទៅបុករះម៉ូតូ១គ្រឿង រថយន្ត២គ្រឿង រួចបន្តទៅបុកផ្ទប់របងរោងចក្រកាត់ដេរបន្ថែមទៀតទើបអស់ល្បឿនទៅមុខលែងរួច ។ ក្នុងហេតុការណ៍នេះបានធ្វេីឱ្យអ្នកលក់ម្ហូបអាហារនៅមុខរោងចក្រនិងអ្នកដំណេីរមានការភ្ញាក់ផ្អេីលយ៉ាងខ្លាំង តែមិនបង្កឱ្យមានអ្នករងរបួសនោះទេ។
ក្រោយកើតហេតុ កម្លាំងសមត្ថកិច្ចមូលដ្ឋានបានចុះទៅដល់និងទុកពេលឱ្យភាគីទាំងអស់ធ្វើការសម្របសម្រួលគ្នាដោយភាគីខាងរថយន្តពោងដឹកស៊ីម៉ងត៍ព្រមចេញថ្លៃខូចខាតនិងជួសជុលទាំងអស់ឱ្យទៅភាគីរងគ្រោះដើម្បីបញ្ចប់រឿង ៕
ដោយ ៖ ភារ៉ា ដង្កោ
