សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានបើករថយន្តម៉ាកJeepមួយគ្រឿងបួងចង្កូតបត់មិនប្រយ័ត្នជ្រុលទៅបុកម៉ូតូម៉ាកប៊ីតជិះដោយនារី២នាក់ឈប់រង់ចាំស្តុបចំពីមុខពេញទំហឹងរងការខូចខាតយ៉ាងដំណំសំណាងល្អមិនបង្កឲ្យមានគ្រោះថ្នាក់ដល់មនុស្ស។
ហេតុការណ៍គ្រោះថ្នាក់ចរាចរណ៍ខាងលើនេះដែរបង្កការភ្ញាក់ផ្អើលកាលពីវេលាម៉ោង៩និង៣០នាទីយប់ថ្ងៃទី២០ខែកុម្ភៈ ឆ្នាំ២០២៤ ចំណុចអតីតរង្វង់មូលទួលគោកចាស់លើផ្លូវ ៥៩២ ក្នុងសង្កាត់បឹងកក់ទី២ ខណ្ឌទួលគោករាជធានីភ្នំពេញ។
ប្រភពពីកន្លែងកើតហេតុបានប្រាប់ឲ្យដឹងថា មុនកើតហេតុគេឃើញនារី២នាក់ជិះម៉ូតូម៉ាកប៊ីតមួយគ្រឿងងពាក់ផ្លាកលេខ ភ្នំពេញ 1IY-8186ជិះឌុបគ្នាតាមបណ្តោយផ្លូវ៥៩២ក្នុងទិសដៅពីលិចមកកើតខណៈពេលជិះមកដល់ចំណុចកើតហេតុខាងលើបានឈប់រង់ចាំស្តុបក្រហម ពេលនោះដែរស្រាប់តែគេឃើញមានរថយន្តស៊េរីទំនើបមួយគ្រឿងម៉ាកJeepពណ៌សពាក់ផ្លាកលេខ ភ្នំពេញ 2BO-2658 បើកដោយបុរសម្នាក់ចេញពីចំណុចស្ពានអាកាស៥មករាក្នុងទិសដៅពីត្បូងមកជើងរួចបានបត់ឆ្វេងឆ្លងស្តុបកាត់តាមបណ្តោយផ្លូវ៥៩២ក៏ជ្រុលចង្កូតបុកម៉ូតូម៉ាកប៊ីតដែលឈប់រង់ចាំស្តុបចំពីមុខពេញទំហឹងបណ្តាលឲ្យដួលខូចខាតយ៉ាងដំណំសំណាងល្អមិនបង្កឲ្យមានគ្រោះថ្នាក់ដល់មនុស្ស ខូចខាតតែសម្ភារៈតែប៉ុណ្ណោះ។
បន្ទាប់ពីកើតហេតុខាងលើសមត្ថកិច្ចមូលដ្ឋានចុះមកដល់រួចឲ្យភាគីទាំងសងខាងសម្រួលគ្នាក្រោយពីសម្រួលចប់ដោយភាគីម្ចាស់រថយន្តព្រមសំណងទៅឱ្យម្ចាស់ម៉ូតូដើម្បីបញ្ចប់រឿងនៅនឹងកន្លែងកើតហេតុតែម្ដង៕
ដោយ៖ សុខាសែនជ័យ
