សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់អ្នកជិះលើម៉ូតូកង់បីសណ្តោងរ៉ឺម៉ក៣នាក់ភ័យព្រលឹងចុងសក់និងអ្នកជិះម៉ូតូ២នាក់រងរបួសធ្ងន់ស្រាលដោយសារករណីគ្រោះថ្នាក់ចរាចរណ៍ ខណះម៉ូតូកង់បីសណ្តោងរ៉ឺម៉ក របូតកង់ខាងឆ្វេងទៅបុកម៉ូតូដែលបើកទិសដៅបញ្ច្រាសគ្នាបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងព្រឹកនៅស្រុករមាសហែក។
ហេតុការណ៍នេះបានកើតឡើងនៅវេលាម៉ោង៧និង៥៥នាទីព្រឹក ថ្ងៃទី៦ខែមីនា ឆ្នាំ២០២៤ លើផ្លូវជាតិលេខ១៣ ក្រាលកៅស៊ូចន្លោះគីឡូម៉ែត្រលេខ៤៣និង៤៤ត្រង់ចំណុចភូមិអំពិល ឃុំអំពិល ស្រុករមាសហែក ខេត្តស្វាយរៀង ។
យោងតាមសមត្ថកិច្ចនគរបាលស្រុកបានអោយដឹងថា អ្នករងគ្រោះមានឈ្មោះ អន អ៊ុន អាយុ៦០ឆ្នាំ មុខរបរកសិករ និងប្រពន្ធឈ្មោះភោគ ឌឿករី អាយុ៦២ឆ្នាំ មុខរបរកសិករ រស់នៅភូមិថ្មី ឃុំអណ្ដូងពោធិ៍ ស្រុករមាសហែក ខេត្តស្វាយរៀង។ ចំណែកម៉ូតូម៉ាកហុងដា គុប50 ពណ៌ទឹកប៊ិក គ្មានស្លាកលេខ ខូចខាតយ៉ាងដំណំ។
អ្នកបើកបង្កហេតុមានឈ្មោះ ចំរើន សុីនេត ភេទប្រុស អាយុ២១ឆ្នាំ មុខរបរកសិករ រស់នៅភូមិគោរកាព្រាល ស្រុកកញ្ជ្រៀច ខេត្តព្រៃវែងនិងអ្នករួមដំណើរ៣នាក់មានឈ្មោះ ប៊ូ ម៉ៅ ភេទប្រុស អាយុ 29 ឆ្នាំ មុខរបរកសិករ រស់នៅភូមិទួល ឃុំអណ្ដូងត្របែក ស្រុករមាសហែក ខេត្តស្វាយរៀង ។ ឈ្មោះ បូរ៉ា ភារម្យ ភេទប្រុស អាយុ 28 ឆ្នាំ មុខរបរកសិករ រស់នៅ ឃុំពន្លៃ ស្រុកមេមត់ ខេត្តត្បូងឃ្មុំ និងឈ្មោះ ផេង វណ្ណា ភេទប្រុស អាយុ30ឆ្នាំ មុខរបរកសិករ រស់នៅភូមិទួល ឃុំអណ្ដូងត្របែក ស្រុករមាសហែក ខេត្តស្វាយរៀង ។
មុនកើតហេតុគេឃើញមានម៉ូតូកង់បីសណ្តោងរ៉ឺម៉កមួយគ្រឿងជិះគ្នាសរុប៤នាក់ដោយធ្ហើដំណើរពីទិសខាងជើងមកត្បូង ខណៈនោះស្រាប់តែរបូតកង់ក្រោយខាងឆ្វេងទៅបុកនឹងម៉ូតូមួយគ្រឿងម៉ាកហុងដា គុប50ពណ៌ទឹកប៊ិក គ្មានស្លាកលេខក្នុងទិសដៅបញ្ច្រាសគ្នាយ៉ាងពេញទំហឹងបង្កការភ្ញាក់ផ្អើលដល់អ្នកភូមិនិងអ្នកធ្វើដំណើររាយការណ៍ទៅសមត្ថកិច្ចចុះមកអន្តរាគមន៍និងបានបញ្ជូនអ្នករងរបួសទៅព្យាបាលនៅមន្ទីរពេទ្យង្អែកស្រុករមាសហែក។
សមត្ថកិច្ចបានបញ្ជាក់មូលហេតុដោយសារតែម៉ូតូកង់បីសណ្តោងរុឺម៉ករបូតកង់ក្រោយខាងឆ្វេងទៅបុកអ្នកជិះម៉ូតូទើបបង្កអោយមានករណីគ្រោះថ្នាក់ចរាចរណ៍បែបនេះ៕
ដោយ៖ សុថាន
