សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការ នៃស្នងការដ្ឋាននគរបាលខេត្តកំពត នៅព្រឹកថ្ងៃទី១៦ ខែមីនា ឆ្នាំ២០២៤នេះ បានថ្លែងតាមរយៈបណ្ដាញសង្គមហ្វេសប៊ុកផ្លូវការរបស់លោកយ៉ាងដូច្នេះថា៖ ខេត្តកំពត ចំពោះការត្រួតពិនិត្យជាតិអាល់កុលនិងចាប់ផ្តើមពីម៉ោង ១១យប់ ក៏ប៉ុន្តែក្នុងករណីអ្នកបើកបរដែលសមត្ថកិច្ចពិនិត្យឃើញថាបើកបរក្នុងស្ថានភាពស្រវឹងមុនម៉ោង ១១យប់ នោះសមត្ថកិច្ចក៏នឹងធ្វើការត្រួតពិនិត្យភ្លាមៗលើអ្នកបើកបរគ្រប់មធ្យោបាយធ្វើដំណើរទាំងអស់។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានបន្តថា ហើយប្រសិនបើមន្ត្រីចរាចរណ៏របស់យើងខ្ញុំអនុវត្តខុសគោលការណ៏ណែនាំ សូមតេមកលេខទូរសព្ទ័ខាងក្រោមនេះ 092937705 ។
គួរបញ្ជាក់ថា ក្នុងពេលដឹកនាំកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី១៥ មីនាម្សិលមិញនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំឱ្យកែសម្រួលម៉ោងត្រួតពិនិត្យជាតិអាល់កុល ដើម្បីកាត់បន្ថយសម្ពាធទៅលើភោជនីយដ្ឋាននានា ដែលរងផលប៉ះពាល់ជាយថាហេតុដោយសារវិធានការរឹតបន្តឹងការត្រួតពិនិត្យគ្រឿងស្រវឹងពេលយប់។
យ៉ាងណា សម្ដេចនាយករដ្ឋមន្ត្រី ក៏បានថ្លែងអំណរគុណដល់សមត្ថកិច្ចនគរបាលគ្រប់លំដាប់ថ្នាក់ ដែលបានខិតខំអនុវត្តការត្រួតពិនិត្យអ្នកបើកបរក្រោមឥទ្ធិពលគ្រឿងស្រវឹង ដើម្បីកាត់បន្ថយគ្រោះថ្នាក់ចរាចរណ៍ដែលបណ្តាលមក ពីគ្រឿងស្រវឹងនាពេលកន្លងមក។
ក្នុងកិច្ចប្រជុំនាព្រឹកថ្ងៃទី១៥ ខែមីនា ដដែលនេះ សម្តេចធិបតី ក៏បានណែនាំឱ្យបង្កើនការអប់រំពាក់ព័ន្ធនឹងគ្រោះថ្នាក់បណ្តាលមកពីគ្រឿងស្រវឹង ទន្ទឹមគ្នានឹងការពង្រឹងវិធានការច្បាប់។
ក្នុងកិច្ចប្រជុំដដែល សម្ដេចប្រមុខរាជរដ្ឋាភិបាល ក៏បានឆ្លៀតណែនាំឱ្យរដ្ឋបាលរាជធានី ខេត្ត ក៏ដូចជាក្រសួងមហាផ្ទៃ បន្តការត្រួតពិនិត្យលើល្បែង ស៊ីសង និងផ្សងសំណាងឱ្យមានប្រសិទ្ធភាព។
ជាមួយគ្នានោះ នៅមុនពិធីបុណ្យចូលឆ្នាំថ្មីប្រពៃណីជាតិខ្មែរដែលចូលមកដល់នារយៈពេលមួយខែខាងមុខទៀត សម្តេចធិបតី មិនភ្លេចណែនាំឱ្យអាជ្ញាធរមានសមត្ថកិច្ចពង្រឹងការរក្សាសន្តិសុខ សណ្តាប់ធ្នាប់ និងសុវត្ថិភាព ជូនប្រជាពលរដ្ឋនិងភ្ញៀវទេសចរក្នុងអំឡុងពេលបុណ្យចូលឆ្នាំថ្មីផងដែរ៕
ដោយ៖ តារា
