សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជាសន្តិសុខម្នាក់បានស្លាប់នៅនឹងកន្លែងកើតហេតុភ្លាមៗ ខណៈជិះម៉ូតូលឿនមិនប្រយ័ត្នធ្លាក់ជង្ហុក រេចង្កូតទៅបុកពីក្រោយរ៉ឺម៉កដឹកផ្លែឈើឈប់លក់នៅលើចិញ្ចើមផ្លូវ។
ហេតុការណ៍គ្រោះថ្នាក់ចរាចរណ៍នេះបង្កឱ្យមានការភ្ញាក់ផ្អើលឡើងកាលពីយប់ថ្ងៃទី៣១ ខែមីនា ឆ្នាំ២០២៤ ស្ថិតនៅតាមបណ្តោយផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
សមត្ថកិច្ចបានឱ្យដឹងថា សពជនរងគ្រោះ មានឈ្មោះ ស៊ីប ស៊ី អាយុ៤៥ឆ្នាំ មុខរបរ ជាសន្តិសុខ បច្ចុប្បន្នស្នាក់នៅបន្ទប់ជួល ក្នុងសង្កាត់ចាក់អង្រែក្រោម ខណ្ឌមានជ័យ មានស្រុកកំណើតនៅភូមិអណ្តូងខ្ពស់ ស្រុកបុរីជលសារ ខេត្តតាកែវ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញបុរសរងគ្រោះជិះម៉ូតូមួយគ្រឿងម៉ាកហុងដា PCX ពណ៌សពាក់ស្លាកលេខ ភ្នំពេញ 1JA-3113 តាបណ្ដោយផ្លូវជាតិលេខ២ ក្នុងទិសដៅពីជើងមកត្បូងដោយល្បឿនលឿន ខណៈជិះមកដល់ចំណុចកើត
ហេតុបានធ្លាក់ជង្ហុកហើយរេចង្កូតទៅបុកពីក្រោយរ៉ឺម៉កដឹកផ្លែឈើ ដែលចតលក់នៅលើចិញ្ចើមផ្លូវពេញទំហឹងបណ្ដាលឱ្យជនរងគ្រោះដួលអូសទៅមុខបោកក្បាលនៅនឹងផ្លូវស្លាប់ភ្លាមៗ ពេលនោះដែរអ្នកបើករ៉ឺម៉កដឹកផ្លែឈើក៏បានបើករត់គេចពីកន្លែងកើតហេតុបាត់ស្រមោលតែម្តង។
បន្ទាប់ពីកើតហេតុសមត្ថកិច្ចមូលដ្ឋានសហការជាមួយនឹងជំនាញចរាចរណ៍ ចុះមកដល់ធ្វើកំណត់ហេតុយកម៉ូតូជនរងគ្រោះទៅរក្សាទុក ចំណែកសពសមត្ថកិច្ចប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណី៕
ដោយ៖ ជ្រោយពេជ្រ
