សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅថ្ងៃទី៣ ខែមេសា ឆ្នាំ២០២៤ នៅបន្ទប់ប្រជុំព្រះវិហារ នាទីស្ដីការក្រសួងវប្បធម៌ និងវិចិត្រសិល្បៈ មានកិច្ចប្រជុំគណៈកម្មការសម្របសម្រួលរៀបចំការបោះឆ្នោតជ្រើសរើសប្រធានសមាគមសិល្បករខ្មែរ ក្រោមអធិបតីភាព លោក ទិត ថាវរិទ្ធ រដ្ឋលេខាធិការ និងលោក គឹម ពីនន់ អនុរដ្ឋលេខាធិការ រួមជាមួយ លោកស្រី ចនច័ន្ទ លក្ខិណា ប្រធានសមាគមសិល្បករខ្មែរ និងសមាសភាពដែលអញ្ជើញមកពីអង្គភាពពាក់ព័ន្ធមួយចំនួនទៀត។
គោលបំណងសំខាន់នៃកិច្ចប្រជុំ គឺដើម្បីពិគ្រោះពិភាក្សាផ្ដោតសំខាន់លើរបៀបវារៈចំនួន ៣ ដូចខាងក្រោម៖
១-បង្កើតគណៈកម្មការរៀបចំការបោះឆ្នោត
២-ពិនិត្យខ្លឹមសារ លក្ខន្តិកៈសម្រាប់ការឈរឈ្មោះបោះឆ្នោត និងពិភាក្សាលម្អិតអំពីនីតិវិធី
៣-ពេលវេលា ទីកន្លែង និងសមាសភាពនៃអង្គបោះឆ្នោត។
សូមជម្រាបជូនថា ៖ សមាគមសិល្បករខ្មែរ គឺជាសមាគមដែលដើរតួនាទីយ៉ាងសំខាន់ក្នុងការស្រាវជ្រាវ បង្រួបបង្រួម រវាងសិល្បករ សិល្បការិនីដែលមានអាជីពជាសិល្ប: គ្រប់ជំនាញ គ្រប់ជំនាន់និងចំណាស់ ដោយជួយជំរុញនិងលើកស្ទួយគ្រប់ទម្រង់សិល្ប: រកទីផ្សារត្រឹមត្រូវស្របតាមច្បាប់ ការពារសិទ្ធិស្របច្បាប់និងផលប្រយោជន៍សិល្បករ ព្រមទាំងរួមគ្នាការពារ កែលម្អ និងថែរក្សាអត្តសញ្ញាណជាតិ៕
ដោយ ៖ សិលា
