រលកកំដៅគ្របដណ្តប់អាស៊ីអាគ្នេយ៍ បង្ខំឱ្យសាលារៀនជាច្រើនត្រូវបិទទ្វារ

ចែករំលែក៖

បាតុភូតអាកាសធាតុ El Nino បាននាំមកនូវអាកាសធាតុកាន់តែក្តៅ និងកាន់តែខ្លាំងនៅក្នុងតំបន់អាស៊ីអាគ្នេយ៍ ដែលបង្កើនហានិភ័យនៃអគ្គិភ័យ ដីស្ងួត និងបង្ខំសិស្ស ខកខានទៅសាលារៀន។អង្គការឧតុនិយមពិភពលោកបាននិយាយថា បាតុភូតនេះបានចាប់ផ្តើមចុះខ្សោយ ប៉ុន្តែវានឹងបន្តបណ្តាលឱ្យមានសីតុណ្ហភាពលើសពីមធ្យមនៅទូទាំងពិភពលោក។
សីតុណ្ហភាពបានឡើងដល់៤០អង្សាសេនៅផ្នែកខ្លះនៃប្រទេសថៃ កម្ពុជា ឡាវ និងមីយ៉ាន់ម៉ា ខណៈកម្រិតទាបបំផុត៣៥អង្សាសេនៅម៉ាឡេស៊ី ឥណ្ឌូណេស៊ី និងហ្វីលីពីន។ ដោយសារតែកំដៅដែលមិនអាចទ្រាំបាន នាយកដ្ឋានអប់រំហ្វីលីពីនបានអនុញ្ញាតឱ្យសាលារៀនរៀបចំការបង្រៀនពីចម្ងាយ ឬលុបចោលថ្នាក់រៀន។
ក្មេងប្រុស Daryl Siongco (អាយុ 7 ឆ្នាំ) នៅទីក្រុង Quezon ជិតរដ្ឋធានីម៉ានីល ប្រទេសហ្វីលីពីន បានឈប់សម្រាកមួយថ្ងៃពីសាលារៀន ដោយសារសាលារបស់គាត់ត្រូវបានបិទ ដោយសារសីតុណ្ហភាពបានឡើងដល់ 35 អង្សារសេ។ ថ្នាក់រៀនរបស់ Daryl Siongco មានសិស្សចំនួន 40 នាក់ ប៉ុន្តែមានតែ 2 នាក់ប៉ុណ្ណោះមកសាលា។
នៅប្រទេសសិង្ហបុរី សាលារៀនមួយចំនួនអនុញ្ញាតឱ្យសិស្សស្លៀកសម្លៀកបំពាក់ហាត់ប្រាណរហូតដល់មានការជូនដំណឹងបន្ថែម។
កំដៅខ្លាំងបានបណ្តាលឱ្យមនុស្សស្លាប់ជាច្រើននាក់ក្នុងប្រទេសម៉ាឡេស៊ី។ ក្នុងរយៈពេលត្រឹមតែបីខែដំបូងនៃឆ្នាំ 2024 ប្រទេសនេះបានរាយការណ៍ថាមានអ្នកស្លាប់ដោយសារកំដៅសរុបចំនួន 27 នាក់។
ភ្លើងឆេះព្រៃកើតឡើងដដែលៗក៏ត្រូវបានកត់ត្រានៅក្នុងរដ្ឋ Selangor, Johor និង Sarawak ផងដែរ។ ទីភ្នាក់ងារគ្រប់គ្រងគ្រោះមហន្តរាយបាននិយាយថា នាយកដ្ឋានពន្លត់អគ្គិភ័យគ្រោងនឹងផ្តោតទៅលើចំណុចក្តៅជាង 650 នៅទូទាំងប្រទេស ដើម្បីការពារភ្លើងបន្ថែមទៀតពីការផ្ទុះឡើង។
នៅប្រទេសថៃ នៅថ្ងៃទី១ ខែមេសា សីតុណ្ហភាពពេលខ្លះឡើងដល់ ៤៣ – ៤៤.៥ អង្សារសេ ដែលមានការធ្លាក់ចុះបន្តិចម្តងៗ ដោយសារភ្លៀងធ្លាក់នៅរដូវក្តៅ។ ទោះជាយ៉ាងណាក៏ដោយ នាយកដ្ឋានឧតុនិយមថៃព្រមានថា សីតុណ្ហភាពនឹងកើនឡើងប្រហែល 30% ខ្ពស់ជាងធម្មតាក្នុងរយៈពេលប៉ុន្មានថ្ងៃខាងមុខនេះ។
នៅល្ងាចថ្ងៃទី 3 ខែមេសា រដ្ឋាភិបាលហ្វីលីពីនបាននិយាយថា អាកាសធាតុក្តៅបានបង្ខំឱ្យសាលារៀនចំនួន 3,954 នៅទូទាំងប្រទេសប្តូរទៅការរៀនតាមអ៊ីនធឺណិត ហើយសិស្សប្រហែល 1.3 លាននាក់នឹងអាចរៀននៅផ្ទះជំនួសឱ្យការទៅសាលារៀន៕ ដោយ៖ ធីរីណា