សារព័ត៌មាន នគរវត្ត តែងតែនាំមុខគេជានិច្ច
នៅពេលនេះប្រទេសលោកខាងលិចបានផ្តោតសំខាន់ទៅលើការជួយដល់ប្រទេសអុីស្រាអែល នៅក្នុងសង្គ្រាមវាយប្រហារក្រុមហាម៉ាស់ និងហេបូឡាស។ ជាមួយគ្នានេះដែរ ក៏បានបង្កើតប្រព័ន្ធការពារដែនអាកាសទប់ស្កាត់ការវាយប្រហារដោយមីស៊ីលពីប្រទេសអុីរ៉ង់ ។ ទាំងនោះហើយ អាវុធទំនើបៗគឺបានសម្រុកទៅអុីស្រាអែល ចំណែកអ៊ុយក្រែនមិនមានទៀតឡើយ។
សារព័ត៌មាន AFP បានផ្សាយថា ប្រមុខទីភ្នាក់ងារស៊ើបការណ៍សម្ងាត់អាមេរិក CIA លោក William Burns បានព្រមានថា អ៊ុយក្រែនអាចនឹងចាញ់នៅក្នុងសង្រ្គាមជាមួយរុស្ស៉ី នៅចុងឆ្នាំ២០២៤នេះ ប្រសិនបើមិនមានជំនួយយោធាបន្ថែមពីសហរដ្ឋអាមេរិកទេនោះ។
លោក William Burns ធ្វើការព្រមានបែបនេះនៅក្នុងសុន្ទរកថាមួយនៅឯមជ្ឈមណ្ឌល George W. Bush Center កាលពីថ្ងៃព្រហស្បតិ៍ ទី១៩ ខែមេសា និងចំពេលរដ្ឋសភាអាមេរិកគ្រោងនឹងបោះឆ្នោតនៅថ្ងៃសៅរ៍ចុងសប្ដាហ៍នេះ លើកញ្ចប់ជំនួយយោធាថ្មីទំហំ ៦១ពាន់លានដុល្លារសម្រាប់អ៊ុយក្រែន ដែលបានជាប់គាំងជាច្រើនខែមកហើយដោយសារតែការជំទាស់ពីសមាជិករដ្ឋសភាមកពីគណបក្សសាធារណរដ្ឋមួយចំនួនដែលមានទំនាក់ទំនងជិតស្និទ្ធជាមួយលោក ដូណាល់ ត្រាំ។
តាមលោកប្រមុខ CIA ប្រសិនបើគ្មានជំនួយយោធាថ្មីទេ អ៊ុយក្រែនអាចនឹងចាញ់នៅលើសមរភូមិនៅចុងឆ្នាំ២០២៤នេះ ឬក៏អាចជួយឱ្យលោក ពូទីន ស្ថិតនៅលើ គោលជំហរមួយដែលអាចឱ្យលោកទាញយកផលប្រយោជន៍ ឬសម្បទាននយោបាយ។ ប៉ុន្តែលោក Burns មិនបានបញ្ជាក់លម្អិតពីនិយមន័យពាក្យចាញ់សង្រ្គាមដែល លោកបានលើកឡើងនោះទេ។
នៅថ្ងៃសៅរ៍ចុងសប្ដាហ៍នេះ (ម៉ោងនៅវ៉ាស៊ីនតោន) រដ្ឋសភាអាមេរិកត្រូវបានគេរំពឹងថានឹងធ្វើការបោះឆ្នោតឆ្នោតលើកញ្ចប់ជំនួយដាច់ដោយឡែកពីគ្នាសម្រាប់ អ៊ុយក្រែន តៃវ៉ាន់ និងអ៉ីស្រាអែលផងដែរ៕
ដោយ៖ ធីរីណា(រូបថត៖ TTXVN)
