សារព័ត៌មាន នគរវត្ត តែងតែនាំមុខគេជានិច្ច
គ្រូបង្វឹកក្រុម Barcelona លោក Xavi នឹងបន្តនៅក្លិបរហូតដល់យ៉ាងហោចណាស់បញ្ចប់កិច្ចសន្យារបស់គាត់ក្នុងខែមិថុនា ឆ្នាំ២០២៥ បន្ទាប់ពីគាត់បានផ្លាស់ប្តូរចិត្តថា នេះនឹងក្លាយជារដូវកាលចុងក្រោយរបស់គាត់។
បុរសវ័យ៤៤ឆ្នាំរូបនេះបានប្រកាសកាលពីខែមករាថា គាត់នឹងលាលែងពីតំណែងជាគ្រូបង្វឹកនៅរដូវក្តៅនេះ ប៉ុន្តែដោយប្រធាន Joan Laporta ចង់ឲ្យគាត់នៅដដែល អតីតខ្សែបម្រើរបស់ Barcelona និងអេស្ប៉ាញបានធ្វើដំណើរត្រឡប់មកវិញ។
លោក Laporta បាននិយាយថា “យើងដឹងថាគាត់បានធ្វើសេចក្តីថ្លែងការណ៍ខ្លះនៅពាក់កណ្តាលរដូវកាល ប៉ុន្តែថ្ងៃនេះយើងមានដំណឹងល្អថាគាត់នឹងស្នាក់នៅ ហើយគាត់បានបង្ហាញពីភាពរីករាយ និងទំនុកចិត្តដែលគាត់មាននៅក្នុងគម្រោងនេះមកខ្ញុំ”។
លោក Xavi បានចូលកាន់តំណែងក្នុងខែវិច្ឆិកា ឆ្នាំ២០២១ បន្ទាប់ពីចាកចេញពីក្លិប Al Sadd ប្រទេសកាតា ហើយបានដឹកនាំ Barcelona ឱ្យឈ្នះជើងឯកអេស្ប៉ាញក្នុងការដឹកនាំពេញមួយរដូវកាលដំបូងរបស់គាត់ក្នុងឆ្នាំ២០២២–២០២៣។
ទោះបីជាយ៉ាងណាក៏ដោយ Barcelona ចាញ់១១ពិន្ទុតាមពីក្រោយក្រុមកំពូលតារាង La Liga អធិរាជស Real Madrid ជាមួយនឹងការប្រកួតចំនួន៦ទៀតដែលត្រូវលេងក្នុងយុទ្ធនាការបច្ចុប្បន្ន។ Barcelona បានធ្លាក់ចេញពីក្របខណ្ឌ Champions League កាលពីសប្តាហ៍មុន បន្ទាប់ពីចាញ់ Paris St-Germain ក្នុងវគ្គ៨ក្រុមចុងក្រោយ។
លោក Xavi ដែលបានជួយក្រុមឈ្នះពានរង្វាន់កិត្តិយសចំនួន២៥ក្នុងអំឡុងពេលអាជីពជាកីឡាករដ៏ល្បីនៅ Barcelona បាននិយាយថា គាត់មានអារម្មណ៍ថាត្រូវបានរំដោះ បន្ទាប់ពីមានការប្រកាសថា គាត់នឹងលាលែងពីតួនាទីនៅចុងបញ្ចប់នៃរដូវកាលនេះ។
នៅពេលដែលគាត់បានប្រកាសថា គាត់នឹងចាកចេញបន្ទាប់ពីចាញ់ Villarreal គាត់មានអារម្មណ៍ថាគាត់មិនត្រូវបានការពារដោយក្លិប ហើយមិនមានទិសដៅច្បាស់លាស់ ប៉ុន្តែចាប់តាំងពីពេលនោះមក ពេលដែលលោក Xavi មានអារម្មណ៍ថា អាចទទួលយកវិធីបន្ធូរអារម្មណ៍ជាងមុន លទ្ធផលរបស់ក្រុមបានប្រសើរឡើង។ ក្រុម Barcelona បានលេង១០ប្រកួតមិនដែលចាញ់ក្នុងលីក មុនពេលចាញ់ Real Madrid ៣-២ កាលពីថ្ងៃអាទិត្យកន្លងទៅ។
កិច្ចប្រជុំមួយបានធ្វើឡើងនៅក្នុងផ្ទះរបស់លោក Laporta កាលពីថ្ងៃសុក្រ ហើយសម្ពាធពីក្លិបដើម្បីឱ្យគាត់ស្នាក់នៅគឺជាក់ស្តែង។ ប្រសិនបើលោកXavi មិនអាចកែលម្អក្រុមនៅចុងរដូវកាល២០២៤–២០២៥ នោះ Barcelona នឹងសម្លឹងរកការបញ្ចុះបញ្ចូលអ្នកចាត់ការជាន់ខ្ពស់ម្នាក់ដែលផុតកុងត្រានៅពេលនោះ រួមទាំងលោក Pep Guardiola, លោក Luis Enrique និងលោក Mikel Arteta ៕
ដោយ៖ ភារៈ(រូបភាព ៖ BBC Sport)
