សារព័ត៌មាន នគរវត្ត តែងតែនាំមុខគេជានិច្ច
ក្រុមម្ចាស់ផ្ទះ Crystal Palace បានបញ្ចប់ការប្រកួតលីកជាលើកទី១លើក្រុម Manchester United ជាមួយនឹងការទទួលជ័យជម្នះដ៏ត្រចះត្រចង់ ៤ទល់០នៅទឹកដី Selhurst Park កាលពីរំលងអធ្រាត្រឈានចូលថ្ងៃទី៧ ឧសភានេះ។
Michael Olise រកបានគ្រាប់បាល់ដំបូងពីការស៊ុតពីចម្ងាយ ដើម្បីឱ្យក្រុមរបស់លោក Oliver Glasner នាំមុខបន្ទាប់ពីលេងបាន១២នាទី។ កីឡាករ Jean-Philippe Mateta បានបំប៉ោងសំណាញ់ទីគ្រាប់ទី២ នៅនាទីទី៤០ ដើម្បីបញ្ចប់ការស៊ុតបាល់បញ្ចូលទីគ្រាប់ទី៦របស់គាត់ជាប់ៗគ្នា។
Tyrick Mitchell ស៊ុតពីចម្ងាយរកបានគ្រាប់បាល់ទី៣ បន្ទាប់ពីការបញ្ជូនបាល់យ៉ាងល្អដោយ Adam Wharton នៅនាទីទី៥៨ ហើយកីឡាករវ័យក្មេងសញ្ជាតិបារាំង Olise បានសម្រេចគ្រាប់បាល់ទី៤ក្នុងការប្រកួតនេះ បន្ទាប់ពីការបង្កកំហុសដោយ Casemiro ដើម្បីបញ្ជូនបាល់ឱ្យអ្នកចាំទី Onana ហើយត្រូវបាន Olise ឆក់យកបាល់បានស៊ុតបំប៉ោងសំណាញ់ទីតែម្តងនៅនាទីទី៦៦។
ក្រុមបិសាចក្រហមបច្ចុប្បន្ននេះបានដាក់ក្នុងទម្រង់លេងដ៏អាក្រក់បំផុតមួយនៃរដូវកាល ដោយបានបរាជ័យជាមួយនឹងការធ្លាយគ្រាប់បាល់ចាប់ពី២គ្រាប់ឡើងទៅ ហើយសម្រាប់លទ្ធផលដ៏អាក្រក់នេះ បានធ្វើឲ្យក្រុម Man Utd ពិបាកក្នុងការប្រជែងយកតំណែង Top 5 ដែលជាតំណែងក្នុងការកក់កៅអីនៅ Europa League រដូវកាលក្រោយ។
ជាមួយនឹងការប្រកួតបន្ទាប់ជាមួយក្រុមខ្លាំង Arsenal ក្រុម Man Utd ត្រូវតែធ្វើឱ្យប្រសើរឡើងដើម្បីចៀសវាងការវាយបកផ្សេងទៀត។ នៅដំណាក់កាលមួយក្នុងរដូវកាលនេះ ក្រុមរបស់លោក Ten Hag មើលទៅហាក់ដូចជាកាន់តែឆ្ងាយជាមួយនឹងការប្រជែងក្នុងក្រុមកំពូលតារាងទាំង៤ ដែល Aston Villa ស្ថិតនៅលេខ៤ សម្រាប់កៅអីក្នុងក្របខ័ណ្ឌ Champions League ហើយក្តីស្រមៃនេះកាន់តែខ្សត់ទៅៗ ដោយបន្តចាញ់រហូតដល់១៣ពិន្ទុឯណោះ។
Man Utd ត្រូវតែបញ្ចប់ក្នុងចំណាត់ថ្នាក់លេខ៧ក្នុងក្របខ័ណ្ឌ Premier League ដើម្បីធានាបាននូវការប្រកួតបាល់ទាត់ក្របខ័ណ្ឌ Europa Conference League ឬផ្តួលក្រុម Manchester City នៅវគ្គផ្តាច់ព្រ័ត្រ FA Cup ដើម្បីដណ្តើមបានកៅអីក្នុងក្របខ័ណ្ឌ Europa League ។
ជ័យជម្នះមួយលើកក្នុងចំណោមប្រាំពីរបានធ្វើឱ្យ Man United ធ្លាក់ពីតារាងទៅចំណាត់ថ្នាក់ទី៨ ហើយការប្រកួតរបស់ពួកគេមិនងាយស្រួលជាមួយ Arsenal ទៅលេង Old Trafford នៅថ្ងៃអាទិត្យនេះ ៕
ដោយ៖ ភារៈ(រូបភាព ៖ BBC Sport)
