ព័ត៌មានទាន់ហេតុការណ៍៖

អាវុធហត្ថឃាត់ខ្លួនក្រុមជនទំនើងកាប់លើអ្នកដទៃ បានចំនួន០២នាក់ក្នុងចំណោមបក្ខពួកប្រហែល១០នាក់ទៀត កំពុងរត់គេចខ្លួន

ចែករំលែក៖

  ខេត្តបាត់ដំបង ៖ កម្លាំងកងរាជអាវុធហត្ថស្រុកមោងឫស្សី ខេត្តបាត់ដំបង បានធ្វើការឃាត់ខ្លួនជនសង្ស័យចំនួន០២នាក់ ខណៈដែលបក្ខពួកជាច្រើននាក់ផ្សេងទៀតកំពុងរត់គេចខ្លួន ក្រោយធ្វើសកម្មភាពកាប់ទៅលើភាគីម្ខាងអោយរងរបួសជាច្រើនកន្លែង។

ក្នុងកិច្ចប្រតិបត្តិការឃាត់ខ្លួននេះធ្វើឡើងនៅវេលាម៉ោង ០០និង១០នាទី រំលងអធ្រាត្រ ឈានចូលថ្ងៃទី ២៦ ខែឧសភា ឆ្នាំ២០២៤ នៅចំណុចក្នុងវត្តពោធិ៍ ស្ថិតក្នុងភូមិពោធិ៍១ ឃុំគារ ស្រុកមោងឫស្សី ខេត្តបាត់ដំបង ។

សមត្ថកិច្ចបានឱ្យដឹងថា ៖ ជនសង្ស័យត្រូវបានឃាត់ខ្លួនរួមមាន ៖ 

ទី១-ឈ្មោះ ព្រួញ រតនា ភេទប្រុស អាយុ២២ឆ្នាំ មុខរបរធ្វើចំការ ។

ទី២-ឈ្មោះ គ្រឿម មិថុនា ភេទប្រុស អាយុ២៣ឆ្នាំ មុខរបរធ្វើស្រែ ទាំងពីរនាក់មានទីលំនៅភូមិចុងសំណាយ ឃុំជ្រៃ ស្រុកមោងឫស្សី ខេត្តបាត់ដំបង។

សមត្ថកិច្ចបានបញ្ជាក់ថា ៖ ជនសង្ស័យទាំង០២នាក់ខាងលើ ក្នុងចំណោមបក្សពួកប្រហែល១០នាក់ កាលពីវេលាម៉ោង ២២និង០០នាទី ថ្ងៃទី២៥ ខែឧសភា ឆ្នាំ២០២៤ នៅចំណុចអនុវិទ្យាល័យមោង ស្ថិតក្នុងភូមិពោធិ៍១ ឃុំគារ ស្រុកមោងឫស្សី ពួកគេប្រដាប់ដោយដាវសាំម៉ារ៉ៃ និង កាំបិត បានធ្វើ សកម្មភាពកាប់ទៅលើជនរងគ្រោះមួយក្រុមផ្សេងទៀតមានគ្នាប្រហែល១០នាក់ ខណៈ ពេលដែលទៅមើលការប្រគំតន្ត្រី បណ្តាលឲ្យជនរងគ្រោះឈ្មោះ វាសនា វណ្ណះ ភេទប្រុស អាយុ ២១ឆ្នាំ រស់នៅភូមិចកតូច ឃុំកកោះ ស្រុកមោងឫស្សី ខេត្តបាត់ដំបង អោយរងរបួសត្រង់ប្រអប់ជើង និងក្បាលជង្គង់ខាងឆ្វេង។

ជាមួយការឃាត់ខ្លួនជនសង្ស័យ០២នាក់ខាងលើនេះដែរ សមត្ថកិច្ចចាប់យកវត្ថុតាងរួមមាន ៖ ,កាំបិតកាចែត ចំនួន០១ដើម ,ទូរស័ព្ទដៃ ចំនួន០១គ្រឿង និងម៉ូតូចំនួន០៥គ្រឿង។

ក្រោយពីឃាត់ខ្លួន បច្ចុប្បន្នជនសង្ស័យនិងវត្ថុតាង ត្រូវបានសមត្ថកិច្ចបញ្ជូនមកការិយាល័យជំនាញ ដើម្បីចាត់ការបន្តតាមនីតិវិធីនៅទីបញ្ជាការដ្ឋានកងរាជអាវុធហត្ថខេត្ត ៕

ដោយ ៖ សិលា


ចែករំលែក៖