សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អគ្គនាយកដ្ឋានគយ និងរដ្ឋាករ បានឲ្យដឹងថា កម្ពុជា នាំចេញសម្លៀកបំពាក់ ស្បែកជើង និងទំនិញធ្វើដំណើរ បានកើនឡើង ២០,៦៩ ភាគរយក្នុងរយៈ ពេល៥ ខែ ឆ្នាំ២០២៤នេះ បើប្រៀបធៀបនឹងរយៈពេលដូចគ្នាកាលពីឆ្នាំមុន ដែលរកចំណូលបាន ៤,៨៩ ពាន់លានដុល្លារ។
យោងតាមទិន្នន័យខាងលើបានឲ្យដឹងថាក្នុងអំឡុងខែមករាដល់ខែឧសភា ឆ្នាំ២០២៤ ផ្នែកទាំងអស់ ដែលស្ថិតនៅក្រោមវិស័យសម្លៀកបំពាក់ ស្បែកជើង និងទំនិញធ្វើដំណើរ មានដំណើរការល្អដោយបានបង្កើនការនាំចេញ បើប្រៀបធៀបនឹងរយៈពេលដូចគ្នាកាលពីឆ្នាំមុន។
របាយការណ៍នេះបានបន្ថែមថា ការនាំចេញសម្លៀកបំពាក់ប៉ាក់ និងគ្រឿងសម្លៀកបំពាក់រកចំណូលបាន ២,១៨ ពាន់លានដុល្លារ កើនឡើង ១៧,៩ ភាគរយ បើធៀបនឹងខែមករា ដល់ខែឧសភា ឆ្នាំ ២០២៣។ សម្លៀកបំពាក់ដែលមិនមែនជាប៉ាក់រកចំណូលបាន ១,២៤ ពាន់លានដុល្លារ កើនឡើង៣២,២ ភាគរយធៀបនឹងឆ្នាំមុន។
ការនាំចេញស្បែកជើង រកចំណូលបាន ៦១៥ លានដុល្លារ ក្នុងរយៈពេល៥ ខែដំបូង ក្នុងឆ្នាំនេះ កើនឡើង ១០,១ ភាគរយ បើប្រៀបធៀបនឹងឆ្នាំមុន និងផលិតផលស្បែក និងទំនិញធ្វើដំណើរចំនួន ៧៦២ លានដុល្លារ ជាមួយនឹងកំណើន ១៩,៤ ភាគរយ ក្នុងរយៈពេលដូចគ្នា។ ផលិតផលវាយនភ័ណ្ឌផ្សេងទៀតរកចំណូលបាន ៨៧ លានដុល្លារពីខែមករាដល់ខែឧសភាឆ្នាំ២០២៤ ដោយបានចុះបញ្ជីកំណើន ៣៨,៨ ភាគរយបើធៀបនឹងរយៈពេលដូចគ្នាកាលពីឆ្នាំមុន។ នៅក្នុងខែឧសភា ឆ្នាំ2024 ការនាំចេញយសម្លៀកបំពាក់ ស្បែកជើង និងទំនិញធ្វើដំណើររកចំណូលបាន១,១៩ ពាន់លានដុល្លារ កើនឡើង៣១,៨៤ ភាគរយ បើធៀបនឹងខែឧសភា ឆ្នាំ២០២៣។
លោក ខេន លូ អគ្គលេខាធិការសមាគមវាយនភណ្ឌសម្លៀកបំពាក់ ស្បែកជើង និងទំនិញធ្វើដំណើរនៅកម្ពុជា (TAFTAC) បានប្រាប់បណ្តាញព័ត៌មានថា៖ កាលពីឆ្នាំមុន យើងទទួលរងផលប៉ះពាល់ខ្លាំង ប៉ុន្តែវិស័យនេះ ក៏កំពុងងើបឡើងវិញហើយ ខណៈដែលតម្រូវការសកល កំពុងកើនឡើងផងដែរ។
គួរំលឹកថា ការនាំចេញយសម្លៀកបំពាក់ ស្បែកជើង និងទំនិញធ្វើដំណើររបស់កម្ពុជា បានធ្លាក់ចុះ ១៣,៣១ ភាគរយ កាលពីឆ្នាំ២០២៣ ពី ១២,៨០ ពាន់លានដុល្លារ ដល់ ១១,០៩ ពាន់លានដុល្លារ ក្នុងឆ្នាំ២០២២ ដែលនាំឲ្យមានការព្យួរការងាររបស់កម្មករជាច្រើន។
បើយោងតាមអង្គការពលកម្មអន្តរជាតិខាងការងារ (ILO) បានឲ្យដឹងថា វិស័យសម្លៀកបំពាក់ ស្បែកជើង និងទំនិញធ្វើដំណើរ បានបង្កើតឱកាសការងារជាច្រើននៅក្នុងប្រទេសកម្ពុជា។ វិស័យនេះ មាន១១ ភាគរយនៃសេដ្ឋកិច្ច និងបានរួមចំណែកប្រហែល ៥០ភាគរយនៃកំណើនផលិតផលក្នុងស្រុកសរុប(GDP) របស់កម្ពុជា ក្នុងឆ្នាំ២០២១ ៕
ដោយ៖ សូរិយា
