សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅព្រឹកថ្ងៃព្រហស្បតិ៍ ១៣ រោច ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៤ ខែកក្កដា ឆ្នាំ២០២៤ នៅវិមានព្រឹទ្ធសភា រាជធានីភ្នំពេញ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា អនុញ្ញាតឱ្យ លោក STEFAN MESSERER ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសហព័ន្ធអាល្លឺម៉ង់ ប្រចាំព្រះរាជាណាចក្រកម្ពុជា ចូលសម្ដែងការគួរសម និងពិភាក្សាការងារ។
ជាកិច្ចចាប់ផ្ដើម សម្ដេចតេជោប្រធានព្រឹទ្ធសភា បានសម្តែងការរីករាយដែលបានជួប លោក ឯកអគ្គរដ្ឋទូត សាជាថ្មីម្ដងទៀតបន្ទាប់ពីការជំនួបលើកមុន ក្រោយពេល ឯកឧត្តមឯកអគ្គរដ្ឋទូត បានថ្វាយសារតាំងចំពោះ ព្រះករុណា ព្រះមហាក្សត្រ។ ជាមួយនេះដែរ សម្ដេចតេជោប្រធានព្រឹទ្ធសភា ក៏បានអបអរសាទររដ្ឋាភិបាលអាល្លឺម៉ង់ ចំពោះការរៀបចំការប្រកួត EURO Cup 2024 បានល្អប្រសើរ និងអបអរសាទរក្រុមបាល់ទាត់អាល្លឺម៉ង់ដែលទទួលបានជោគជ័យក្នុងការប្រកួតរហូតមកដល់ពេលនេះ។លោក ឯកអគ្គរដ្ឋទូត អាល្លឺម៉ង បានសម្ដែងការអរគុណចំពោះ សម្ដេចតេជោ ដែលបានអនុញ្ញាតឱ្យ ឯកឧត្តម បានចូលជួបសម្ដែងការគួរសម និងពិភាក្សា ក្នុងឋានៈសម្ដេចជាប្រធានព្រឹទ្ធសភា។ ឯកឧត្តម ឯកអគ្គរដ្ឋទូតបានធ្វើការកត់សម្គាល់ថា ក្នុងរយៈពេលពីរឆ្នាំនៃការបំពេញការងារនៅកម្ពុជា ឯកឧត្តមបានឃើញថា ប្រទេសកម្ពុជាមានការរីកចម្រើន ជាពិសេស រាជធានីភ្នំពេញមានការអភិវឌ្ឍន៍យ៉ាងលឿន និងរស់រវើកគួរជាទីចាប់អារម្មណ៍យ៉ាងក្រៃលែង។ លោកក៏បានសម្ដែងការរីករាយផងដែរ ដោយឃើញថា ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ កម្ពុជានិងអាល្លឺម៉ង់ មានការរីកចម្រើនរឹងមាំជាបន្តបន្ទាប់ ពិសេស បានពង្រឹងការផ្លាស់ប្ដូរទស្សនកិច្ច និង ការផ្លាស់ប្តូររវាងប្រជាជន និងប្រជាជន។ ក្នុងរយៈពេល២ឆ្នាំកន្លងមកនេះ ១៧គណៈប្រតិភូរួចហើយ បានមកបំពេញទស្សនកិច្ចនៅកម្ពុជា រួមទាំង ឯកឧត្តមប្រធានាធិបតី និងលោកជំទាវ។ ចំនួននេះច្រើនជាងរយៈពេល១០ឆ្នាំកន្លងមក។
គណៈប្រតិភូជាន់ខ្ពស់កម្ពុជា ដឹកនាំដោយ លោកឧបនាយករដ្ឋមន្ត្រី ស៊ុន ចាន់ថុល ដើម្បីផ្សព្វផ្សាយទាក់ទាញការវិនិយោគនិងពាណិជ្ជកម្ម និង លោកឧបនាយករដ្ឋមន្រ្តី ស សុខា បានធ្វើទស្សនកិច្ចនៅប្រទេសអាល្លឺម៉ង់ ដែលបង្ហាញពីការ បង្កើនការយល់ដឹងគ្នាកាន់តែច្រើនថែមទៀតរវាងប្រទេសទាំងពីរ។ នៅពេលខាងមុខនេះ គណៈប្រតិភូធុរកិច្ចចំនួន៣ របស់អាល្លឺម៉ង់ នឹងមកកាន់កម្ពុជា ហើយ លោកឯកអគ្គរដ្ឋទូត សង្ឃឹមថាការវិនិយោគផ្ទាល់ពីអាល្លឺម៉ង់នឹងត្រូវបានពង្រីកថែមទៀតនៅកម្ពុជា។
លោក ឯកអគ្គរដ្ឋទូត បានជម្រាបសម្ដេចតេជោ ពីការបើកស្ថានកុងស៊ុលកិត្តិយសរបស់អាល្លឺម៉ង់ប្រចាំទីក្រុងសៀមរាប នៅខែមិថុនាកន្លងទៅ ដែលដឹកនាំដោយកុងស៊ុលកិត្តិយសម្នាក់មានជំនាញខាងពាណិជ្ជកម្ម និងទេសចរណ៍ ។ លោកជឿជាក់ថា ស្ថានកុងស៊ុលកិត្តិយសនេះ នឹងអាចជួយជំរុញការទាក់ទាញទេសចរអាល្លឺម៉ង់និងបណ្ដាប្រទេសនៅអឺរ៉ុបមួយចំនួនទៀត មកបំពេញទស្សនកិច្ចនៅខេត្តសៀមរាបដែលសម្បូរទៅដោយសម្បត្តិបេតិកភណ្ឌវប្បធម៌។
លោក ឯកអគ្គរដ្ឋទូតអាល្លឺម៉ង់ បានបន្ថែមថា លោកនឹងប្រឹងប្រែងបន្តទៀតដើម្បីគាំទ្រដល់កិច្ចប្រឹងប្រែងរបស់រាជរដ្ឋាភិបាលអាណត្តិទី៧ ក្នុងការអភិវឌ្ឍនូវយុទ្ធសាស្ត្របញ្ចកោណរបស់ខ្លួន។ លោក ឯកអគ្គរដ្ឋទូត បានបញ្ជាក់ថាក្រុមហ៊ុនអាល្លឺម៉ង់មួយដែលកំពុងធ្វើការវិនិយោគនៅវៀតណាមកំពុងពិនិត្យលទ្ធភាព វិនិយោគនៅកម្ពុជា ហើយគេកំពុងតែធ្វើការសិក្សាបន្ថែមទៀតនៅលើបរិយាកាសសម្រាប់ការវិនិយោគ រួមមាននីតិវិធី ពន្ធដារជាដើម។
បន្ថែមលើទំានាក់ទំនងទ្វេភាគី លោកឯកអគ្គរដ្ឋទូតអាល្លឺម៉ង់ លើកឡើងថា កម្ពុជានិងអាល្លឺម៉ង់ មានកិច្ចសហប្រតិបត្តិការល្អនៅលើវេទិកាអន្តរជាតិ។ កម្ពុជា និងអាល្លឺម៉ង់បានការគាំទ្រគ្នាទៅវិញទៅមក ចំពោះបេក្ខភាពស្នើដោយប្រទេសនីមួយៗ។ លោក បានអរគុណ កម្ពុជាបានបន្តគាំទ្រ ក្នុងការហ្វឹកហ្វឺនអ្នកដោះមីនអ៊ុយក្រែន ដោយឯកឧត្តម យល់ច្បាស់ពីកម្ពុជាដែលបានឆ្លងកាត់ការលំបាកច្រើន។ អាល្លឺម៉ង់ ចង់ឱ្យកម្ពុជាបន្តការងារអាចជួយពង្រីកការងារបណ្ដុះបណ្ដាលនេះបន្ថែមទៀត។
ទាក់ទងនឹងបញ្ហាដោះមីនផងដែរ លោកឯកអគ្គរដ្ឋទូត បានសន្យាថានឹងបន្តធ្វើការជាមួយនឹងអង្គការ NGO នានា បន្តការងារដោះមីនដើម្បីឱ្យកម្ពុជាសម្រេចគោលដៅក្លាយជាប្រទេសគ្មានមីននៅក្នុងឆ្នាំ២០២៥ខាងមុខ។ ជាមួយនេះដែរ អាល្លឺម៉ង់ក៏ប្ដេជ្ញាបន្តគម្រោងអាល្លឺម៉ង់ជួយឧបត្ថម្ភគាំទ្រដល់ការអភិរក្សប្រាសាទអង្គរ ប្រាសាទនានា ដែលជាបេតិកភ័ណ្ឌវប្បធម៌ដ៏សម្បូរបែប ដែលគម្រោងនេះមានរយៈពេលវែងជាងគេលើពិភពលោក។
ជាកិច្ចឆ្លើយតប សម្ដេចតេជោ ប្រធានព្រឹទ្ធសភា បានសម្តែងការរីករាយដោយសម្ដេចបានធ្វើការជាបន្តបន្ទាប់ជាមួយនឹងថ្នាក់ដឹកនាំ អាល្លឺម៉ង់ ជាពិសេសក្នុងជំនួបជាមួយ ប្រធានាធិបតីអាល្លឺម៉ង់ ក្នុងទីក្រុងព្រុចសែលពេលកន្លងមកនេះ ហើយថ្នាក់ដឹកនាំទាំងពីរបានឯកភាពគ្នានិងធ្វើការជាមួយគ្នាបន្តទៀត។
សម្ដេចតេជោ បានថ្លែងអំណរគុណចំពោះរដ្ឋាភិបាលអាល្លឺម៉ង់ដែលបន្តជួយកម្ពុជានៅក្នុងការអភិវឌ្ឍសេដ្ឋកិច្ច សង្គម។ ការផ្លាស់ប្ដូរទស្សនកិច្ចរបស់គណៈប្រតិភូជាន់ខ្ពស់ បានបង្កើនកម្រិតកាន់តែខ្ពស់ថែមទៀត នូវកិច្ចសហប្រតិបត្តិការរវាងប្រទេសយើងទាំងពីរ ជាពិសេស នៅក្នុងវិស័យពាណិជ្ជកម្ម វិនិយោគ ទេសចរណ៍ដែលធ្វើឱ្យមានវឌ្ឍនភាពគួរឱ្យកត់សម្គាល់។ សម្ដេចបានបន្តថា សម្ដេចផ្ទាល់ មានមោទនភាពចំពោះសមិទ្ធផលល្អៗ ដែលសម្រេចបាន ជាមួយគ្នា។ សម្ដេច បានស្នើសុំឱ្យ លោកឯកអគ្គរដ្ឋទូត បន្តការងារ ជាពិសេស ការជំរុញនៅក្នុងវិស័យសេដ្ឋកិច្ច ការវិនិយោគ និង ការអភិវឌ្ឍធនធានមនុស្ស។
សម្ដេចតេជោប្រធានព្រឹទ្ធសភា បានមានប្រសាសន៍ថា កម្ពុជាគ្រោងនឹងបញ្ចប់ការដោះមីនទាំងអស់ នៅក្នុងឆ្នាំ២០២៥ ក៏ប៉ុន្តែ សម្ដេច មានការព្រួយបារម្ភថា គោលដៅនេះ អាចមិនសម្រេចបានទាំងស្រុង ដោយសារយើងនៅមានជនរងគ្រោះដោយសារគ្រាប់មីនជាបន្តបន្ទាប់។ សម្តេចសង្ឃឹមថា អាល្លឺម៉ង់នឹងបន្តជួយលើការដោះមីននេះ។
សម្ដេចតេជោ បានវាយតម្លៃថាការវិនិយោគតាមរូបមន្ត១បូក ដែលសម្ដេចចង់បាននោះ គឺជាការត្រឹមត្រូវ ដោយសម្ដេចបានលើកឡើងនូវករណី ក្រុមហ៊ុនជប៉ុន Minebea ដែលបាននិងកំពុងវិនិយោគនៅប្រទេសជិតខាងកម្ពុជា ហើយបានបើករោងចក្ររបស់ខ្លួនផងដែរនៅកម្ពុជា ដែលធ្វើឱ្យចង្វាក់ផ្គត់ផ្គង់មានភាពរលូនមិនរអាក់រអួល។ ទាក់ទងនឹងបរិយាកាសវិនិយោគនៅកម្ពុជា សម្ដេចតេជោប្រធានព្រឹទ្ធសភា បានអះអាងថារាជរដ្ឋាភិបាលថ្មីក្រោមការដឹកនាំរបស់ សម្ដេចធិបតីនាយករដ្ឋមន្រ្តី កំពុងបន្តខិតខំយ៉ាងសកម្មក្នុងការសម្របសម្រួលធ្វើឱ្យបរិយាកាសវិនិយោគកាន់តែប្រសើរឡើង។
សម្ដេចតេជោក៏បានអរគុណផងដែរចំពោះភាគីអាល្លឺម៉ង់ដែលបានយកចិត្តទុកដាក់ និងជួយក្នុងការថែរក្សាប្រាង្គប្រាសាទរបស់កម្ពុជា។ ដោយកម្ពុជាមានប្រាង្គប្រាសាទច្រើន សម្តេចសូមអំពាវនាវឱ្យរដ្ឋាភិបាលអាល្លឺម៉ង់និងមិត្តភក្កិដទៃទៀតបន្តជួយការពារ ថែទាំនិងអភិរក្សកេរដំណែលដូនតារបស់យើងនេះ។ សម្ដេច បានចាត់ទុកថា បើសិនជាពុំមានជំងឺរាតត្បាតកូវីដ-១៩ មកយាយីដល់យើង ប្រហែលកម្ពុជាអាចនឹងឆ្លងដកខ្លួនចេញពីប្រទេសដែលមានការអភិវឌ្ឍតិចតួចបានលឿន។ តែទោះជាយ៉ាងណាក៏ដោយ ដោយមានការគាំទ្រពីបណ្ដាប្រទេសជាមិត្តភក្ដិ និងការខិតខំប្រឹងប្រែងដោយខ្លួនឯងផង កម្ពុជាបានបើកប្រទេសឡើងវិញ ចាប់ផ្ដើមមានកំណើនសេដ្ឋកិច្ចឡើងខ្ពស់ជាបន្តបន្ទាប់ ។ កម្ពុជា កំពុងតែជំរុញការនាំចេញទៅកាន់បណ្ដាប្រទេសផ្សេងៗ នៅអឺរ៉ុប នៅអាមេរិក និង ប្រទេសជប៉ុន កូរ៉េ ចិន ឱ្យកាន់តែធំថែមទៀត នៅក្នុងក្របខ័ណ្ឌ នៃ RCEP ដែលបានចូលជាធរមាន AFTA កិច្ចព្រមព្រៀងផ្លាស់ប្តូរសេដ្ឋកិច្ចសេរី ជាមួយ ចិន កូរ៉េ អេមីរ៉ាតអារ៉ាប់រួម … ។ ជាមួយគ្នានេះដែរ កម្ពុជា កំពុងតែខិតខំស្វែងរកបង្កើតនូវកិច្ចព្រមព្រៀងពាណិជ្ជកម្មសេរីជាមួយនឹងបណ្ដាប្រទេសផ្សេងៗទៀតផងដែរ។
សម្ដេចតេជោប្រធានព្រឹទ្ធសភា បានសង្កត់ធ្ងន់ថា កម្ពុជាចង់ឱ្យសេដ្ឋកិច្ចរបស់ខ្លួនឯករាជ្យ ដោយពឹងផ្អែកលើការខិតខំដោយខ្លួនឯង ដោយពុំពឹងផ្អែកទៅលើភាពអនុគ្រោះឬជំនួយពីខាងក្រៅ។ នៅលើទំនាក់ទំនងទ្វេភាគីផងដែរ សម្ដេចតេជោប្រធានព្រឹទ្ធសភា បានមានប្រសាសន៍ស្នើដល់ភាគីអាល្លឺម៉ង់ ជំរុញការចរចាដើម្បីឈានដល់ដល់កិច្ចព្រមព្រៀងពាណិជ្ជកម្មសេរីរវាងអាស៊ាន និង សហភាពអឺរ៉ុប។ សម្តេចបានសម្ដែងការរីករាយ ក្នុងការបន្តកិច្ចការដែលបានធ្វើជាមួយគ្នា ពិសេស ជំរុញទេសចរអាឡឺម៉ង់មកកាន់កម្ពុជាឱ្យបានកាន់តែច្រើនថែមទៀត។ សម្តេចជឿជាក់ថា ការបង្កើតស្ថានកុងស៊ុលកិត្តិយសអាល្លឺម៉ង់ នៅទីក្រុងសៀមរាប អាចនឹងជួយជំរុញវិស័យទេសចរណ៍ផងដែរ។
សម្តេចតេជោ និង លោក ឯកអគ្គរដ្ឋទូត ក៏បានពិភាក្សាគ្នាអំពីបញ្ហាប្រឈមនានានៅក្នុងតំបន់និងសកលលោក រួមមានវិបត្តិនយោបាយនៅមីយ៉ាន់ម៉ា និងសង្គ្រាមនៅអ៊ុយក្រែនផងដែរ។
ជាចុងក្រោយ សម្ដេចតេជោប្រធានព្រឹទ្ធសភា បានជូនពរឱ្យ លោក ឯកអគ្គរដ្ឋទូតអាល្លឺម៉ង់ និងសហការី ទទួលបានសុខភាពល្អ និងជោគជ័យក្នុងការងារបន្តដើម្បីពង្រឹងនូវទំនាក់ទំនងទ្វេភាគីកម្ពុជា-អាល្លឺម៉ង់ ឱ្យកាន់តែរឹងមាំបន្ថែមទៀត៕
ដោយ ៖ សិលា
