សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបេីករថយន្តម៉ាកJeep RUBICON មួយគ្រឿងខណៈមេឃកំពុងភ្លៀង ដែលសង្ស័យមេីលផ្លូវមិនច្បាស់ក៏ជ្រុលទៅបុកក្បាលនាគថ្មពុះចែកទ្រូងផ្លូវបណ្ដាលឱ្យរថយន្តហោះគងលើទ្រូងផ្លូវរងការខូចខាតព្រមទាំងធ្វើឱ្យអ្នកបេីកបររងរបួស។ ហេតុការណ៍នេះបង្កឡេីងកាលពីវេលាម៉ោង៨និង៥០នាទីយប់ ថ្ងៃទី១៨ខែកញ្ញាឆ្នាំ២០២៤ នៅជិតស្ពានអាកាសក្បាលថ្នល់ ផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
បេីតាមប្រភពព័ត៌មានពីកន្លែងកើតហេតុ បានអោយដឹងថា មុនពេលកេីតហេតុគេឃើញប្តីប្រពន្ធ២នាក់វ័យប្រហែលជាង៥០ឆ្នាំ បានបេីករថយន្តម៉ាក Jeep RUBICON ពណ៌ប្រផេះ ពាក់ផ្លាកលេខ កម្ពុជា H.TH8989 ធ្វើដំណើរតាមបណ្ដោយផ្លូវព្រះនរោត្តម ក្នុងទិសដៅពីត្បូងទៅជេីង ដោយបុរសជាប្តីជាអ្នកបេីក ពេលមេឃកំពុងតែភ្លៀងផង លុះមកដល់ចំណុចកេីតហេតុ ដោយសង្ស័យអ្នកបេីកបរមេីលផ្លូវមិនច្បាស់ ទេីបធ្វើឱ្យរេចង្កូតរថយន្តជ្រុលទៅបុកក្បាលនាគថ្មពុះចែកទ្រូងផ្លូវបណ្ដាលឱ្យខ្ទាតរលំអស់ចំនួន២កង់ ហេីយកល់រថយន្តទេីរលេីទ្រូងផ្លូវទៅមុខលែងរួច ។
ករណីគ្រោះថ្នាក់ចរាចរណ៍នេះ បានធ្វេីឲ្យបុរសជាអ្នកបេីកបររងរបួសបែកក្បាលហូរឈាម ចំណែកស្ត្រីជាប្រពន្ធអត់រងរបួសទេ ។ ភ្លាមនោះត្រូវបានប្រជាពលរដ្ឋជួយដឹកអ្នករបួសយកទៅព្យាបាលនៅមន្ទីរពេទ្យដោយទុករថយន្តបង្កចោលនៅកន្លែងកេីតហេតុ ។
ក្រោយមក រថយន្តបង្កក៏ត្រូវសមត្ថកិច្ចជំនាញចរាចរណ៍ខណ្ឌចំការមនចុះមកធ្វេីការវាស់វែងប្រគល់ឲ្យផ្នែកជំនាញចរាចរណ៍ក្រុងធ្វើការស្ទូចយករថយន្តទៅរក្សាទុកនៅការិយាល័យនគរបាលចរាចរណ៍ផ្លូវគោកដេីម្បីរង់ចាំដំណោះស្រាយបន្តតាមក្រោយ ៕
ដោយ ៖ ភារ៉ា ដង្កោ
