សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ស្នងការដ្ឋាននគរបាលខេត្តកំពង់ស្ពឺ បានឱ្យដឹងថា រថយន្តឡិចស៊ីសម៉ាក RX300 មួយគ្រឿងបើកបុកពីក្រោយរថយន្ដដឹកទំនិញលេីផ្លូវល្បឿនលឿនPK39 បណ្ដាលឱ្យស្លាប់០២នាក់និងរបួសម្នាក់ កាលពីថ្ងៃទី៣ ខែមករា ឆ្នាំ២០២៥ វេលាម៉ោង ៣និង ៤៥នាទីទៀបភ្លឺ លើកំណាត់ផ្លូវល្បឿនលឿន K39+200 ទិសដៅព្រះសីហនុទៅភ្នំពេញត្រង់ចំណុចភូមិត្រាច ឃុំកាហែង ស្រុកសំរោងទង ខេត្តកំពង់ស្ពឺ ។
ប្រភពដដែលបន្តថា រថយន្ត ១គ្រឿង ម៉ាកឡិចស៊ីស RX300 ពណ៌ស ពាក់ផ្លាកលេខបាត់ដំបង 2B-3816 អ្នកបើកបរឈ្មោះ លី ហ៊ូវ ភេទប្រុស អាយុ ៤០ឆ្នាំ (ស្លាប់) នៅភូមិពោធិ៍ខ្វិត ឃុំព្រះបាទជាន់ជុំ ស្រុកគីរីវង់ ខេត្ដតាកែវ ដោយមានអ្នករួមដំណើរជាមួយចំនួន២នាក់៖
១-ឈ្មោះ YIN CHAOYANG ភេទប្រុស ជនជាតិចិន (ស្លាប់)
២-ឈ្មោះ DING YUMEI ភេទស្រី ជនជាតិចិន (របួសធ្ងន់) កំពុងសង្រ្គោះបន្ទាន់។
យោងតាមកាមេរាសុវត្ថិភាពទិន្នន័យផ្ដល់ដោយក្រុមហ៊ុនផ្លូវល្បឿនលឿន រថយន្តបើកបរពីទិសខាងលិច មកពីខេត្តព្រះសីហនុ ឆ្ពោះទៅទិសខាងកើត រាជធានី ភ្នំពេញ លុះមកដល់ចំណុចខាងលើបានបុកពីក្រោយរថយន្ដដឹកទំនិញ ០១គ្រឿង ម៉ាកហ៊ីយ៉ិនដាយ ពណ៌ស ពាក់ផ្លាកលេខភ្នំពេញ 3D-7588 មិនស្គាល់អត្តសញ្ញាណអ្នកបើកបរ (ក្រោយហេតុការណ៍បានចុះរត់គេចខ្លួន) កំពុងបើកបរស្របទិសគ្នា ។
សមត្ថកិច្ចនគរបាលប្រចាំការផ្លូវល្បឿនលឿនបានសហការជាមួយកំលាំងជំនាញអធិការដ្ឋាននគរបាលស្រុកសំរោងទង ធ្វើការវាស់វែងអន្ដរាគមន៍ជួយសង្រ្គោះនិងបញ្ជូនជនរងគ្រោះទៅមន្ទីរពេទ្យ រីឯសពបានតំកល់ទុកនៅមន្ទីរពេទ្យបង្អែកខេត្តកំពង់ស្ពឺ រង់ចាំក្រុមគ្រួសារមកទទួលយកទៅធ្វេីបុណ្យ។
បច្ចុប្បន្នសមត្ថកិច្ចនគរបាលបានធ្វេីការស្ទួចយករថ យន្ដបង្កគ្រោះថ្នាក់ទាំង ២គ្រឿង មករក្សាទុកនៅប៉ុស្តិនគរបាលរដ្ឋបាលត្រពាំងគង អធិការដ្ឋាននគរបាលស្រុកសំរោងទង ដើម្បីចំណាត់ការនីតិវិធីបន្ដ៕
ដោយ៖ តារា
