សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងថា កំណើនសេដ្ឋកិច្ចកម្ពុជារយៈពេល២៥នេះ សម្រេចបានកើនចំនួន៨%។ ឆ្លើយតបនឹងនឹងកំណើននេះ បច្ចុប្បន្នរាជរដ្ឋាភិបាលក៏បានបង្កើនថវិកាដល់វិស័យអប់រំប្រមាណ៣ដង ដែលមានទឹកប្រាក់ចំនួន៨០០លានដុល្លារអាម៉េរិកក្នុង១ឆ្នាំ។
លោក ហង់ជួន ណារ៉ុន បានលើកឡើងបែបនេះ នៅក្នុងពិធីប្រកាសដាក់ឱ្យអនុវត្តជាផ្លូវការគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស ហៅកាត់ថា SE4HC នៅព្រឹកថ្ងៃទី០១ ខែមេសា ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា។
លោករដ្ឋមន្ត្រីក្រសួងអប់រំ មានប្រសាសន៍ថា រយៈពេល ១០ឆ្នាំចុងក្រោយនេះ អត្រារួមនៃការសិក្សានៅកម្រិតបឋមសិក្សា កើនឡើងពី៥៥%ក្នុងឆ្នាំ២០១៣ ឡើងដល់៧៥%ក្នុងឆ្នាំ២០២៤។ ចំណែកអត្រាចូលរៀននៅកម្រិតមធ្យមសិក្សាទុតិយភូមិ កើនពី២៦%ឡើងដល់ ៤៤% និងអត្រាចូលរៀននៅឧត្តមសិក្សា កើនពី១០% ឡើងដល់១៩%។
ថ្លែងនៅក្នុងឱកាសដដែលនោះ លោក ហង់ជួន ណារ៉ុន ក៏បានលើកឡើងអំពីបញ្ញាសិប្បនិម្មិត(AI)ផងដែរ។ លោកបញ្ជាក់ថា នៅឆ្នាំ២០៣០ខាងមុខ ៣០%នៃទីផ្សារពលកម្មនឹងមានការផ្លាស់ប្ដូរហើយជំនាញក៏មានការផ្លាស់ប្ដូរដូចគ្នាដែរ។ ដូច្នេះយើងត្រូវត្រៀមខ្លួន ហើយការពង្រឹងធនធានមនុស្សពីកម្រិតមត្តេយ្យដល់កម្រិតមធ្យមសិក្សាជារឿងចាំបាច់។
លោករដ្ឋមន្ត្រីបន្តថា ដើម្បីឆ្លើយតបនឹងទីផ្សារAI ក្រសួងនឹងបង្កើតជំនាញបន្ថែម ដែលមានដូចជា ជំនាញតម្លើងនិងថែទាំម៉ាសុីនត្រជាក់ ជំនាញអគ្គិសនីក្នុងអគារ ជំនាញបង្កាត់ពូជមាន់ ជំនាញកាត់តវីដេអូ ជំនាញគ្រប់គ្រងទិន្នន័យ ជំនាញសរសេរកូដ និងជំនាញថែទាំម៉ាសុីនយានយន្តជាដើម។
លោក ហង់ជួន ណារ៉ុន បានគូសបញ្ជាក់ថា បច្ចុប្បន្នក្រសួងអប់រំបានបញ្ចូលកម្មវិធីAIនៅក្នុងសាលារៀនជំនាន់ថ្មី វិទ្យាស្ថានជាតិអប់រំ និងវិទ្យាស្ថានគរុកោសល្យភ្នំពេញ-បាត់ដំបង។
ជាមួយគ្នានេះ លោករដ្ឋមន្ត្រីក្រសួងអប់រំ ក៏បានស្នើឱ្យបន្តបញ្ចូលគម្រោងបញ្ញាសិប្បនិម្មិតនេះ ទៅក្នុងសាលារៀនធនធានផងដែរ។
សូមជម្រាបជូនថា ពិធីប្រកាសដាក់ឱ្យអនុវត្តគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស រៀបចំឡើងក្នុងគោលបំណងដើម្បីផ្សព្វផ្សាយឱ្យទូលំ ទូលាយក្នុងគោលដៅអភិវឌ្ឍន៍មូលធនមនុស្ស ដែលមានជំនាញវិទ្យាសាស្ត្រ និងបច្ចេកវិទ្យាឌីជីថល ដើម្បីឆ្លើយតបទៅនឹងការកសាងសេដ្ឋកិច្ច និងសង្គមឌីជីថលតាមរយៈការពង្រឹងប្រសិទ្ធភាពមធ្យមសិក្សាឱ្យមាន គុណភាព មានភាពធន់នឹងបម្រែបម្រួលអាកាសធាតុ សមធម៌ និងសមភាពយេនឌ័រ៕
ដោយ៖ សូរិយា
