សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រសួងអប់រំ យុវជន និងកីឡា នៅថ្ងៃទី១៨ ខែសីហា ឆ្នាំ២០២៥នេះ បានចេញពីសេចក្តីណែនាំ ស្ដីពីវិធានការសុខភាព និងសុវត្ថិភាព សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ ដើម្បីចូលរួមលើកកម្ពស់ការថែទាំសុខភាព និងសុវត្ថិភាពសម្រាប់គណៈមេប្រយោគ គណៈកម្មការនានា និងបេក្ខជន អំឡុងពេលនៃដំណើរការប្រឡងសញ្ញាបត្រមធ្យមសិក្សាទុតិយភូមិ។ នេះបើយោងតាមសេចក្តីណែនាំរបស់ក្រសួងអប់រំ យុវជន និងកីឡា។
សេចក្តីណែនាំនេះ បានបញ្ជាក់ថា គណៈមេប្រយោគទូទាំងប្រទេស ត្រូវចាត់តាំងអនុគណៈកម្មការទទួលបន្ទុកការងារសុខ តួនាទី និងភារកិច្ច ទទួលបន្ទុកការងារសុខភាព តាមដាន និងវាយតម្លៃលើស្ថានភាព ការរក្សាអនាម័យ និងសុវត្ថិភាពក្នុងការរៀបចំមណ្ឌលសំណេរ មណ្ឌលកំណែ និងមណ្ឌលស្រង់ បូកពិន្ទុដោយកុំព្យូទ័រ តាមដាន និងវាយតម្លៃលើដំណើរការអនុវត្តវិធានសុខភាព និងសុវត្ថិភាពចំពោះបេក្ខជន គណៈមេប្រយោគ គណៈកម្មការនានា និងអ្នកពាក់ព័ន្ធក្នុងដំណើរការប្រឡង
ឆ្លើយតបចំពោះសំណើ និងរាល់បាតុភាពនៃការលេចឡើង ករណីសង្ស័យពាក់ព័ន្ធបញ្ហាសុខភាព សាធារណៈនៅតាមមណ្ឌលសំណេរ មណ្ឌលកំណែ និងមណ្ឌលស្រង់ បូកពិន្ទុដោយកុំព្យូទ័រ និង ផ្ទៀងផ្ទាត់ស្នើសុំកិច្ចសហការពីស្ថាប័នពាក់ព័ន្ធ ភ្នាក់ងារសុខាភិបាល ដើម្បីចាត់វិធានការសង្គ្រោះ និងវិធានការ សុវត្ថិភាពស្របតាមវិធានវេជ្ជសាស្ត្ររបស់ក្រសួងសុខាភិបាល នៅក្នុងដំណាក់កាលសំណេរ កំណែ និងដំណាក់កាលស្រង់ បូកពិន្ទុដោយកុំព្យូទ័រ។
ទន្ទឹមគ្នានេះត្រូវបូកសរុបរបាយការណ៍អំពីករណីសង្ស័យ និងការដាក់ចេញនូវវិធានការឆ្លើយតបចំពោះការផ្ទុះឡើង នៃជំងឺឆ្លងរាតត្បាត ឬគ្រោះថ្នាក់ផ្សេងៗ ក្នុងអំឡុងពេលដំណើរការប្រឡង ព្រមទាំងរាយការណ៍ និងសុំការសម្រេចពីគណៈមេប្រយោគទូទាំងប្រទេស ក្នុងករណីចាំបាច់។
គណៈមេប្រយោគទូទាំងប្រទេសប្រចាំរាជធានី ខេត្ត ត្រូវចាត់តាំងក្រុមការងារទទួលបន្ទុកសុខភាព សម្រាប់ដំណើរការប្រឡងនៅតាមរាជធានី ខេត្ត ដោយមានសមាសភាពចូលរួមពីតំណាង០១រូប នៃគណៈមេប្រយោគទូទាំងប្រទេសប្រចាំរាជធានី ខេត្ត គណៈអភិបាលរាជធានី ខេត្ត ក្រុង ស្រុក ខណ្ឌ ឬ តំណាងមន្ត្រីសុខាភិបាល និងអង្គភាពពាក់ព័ន្ធ៕
សូមអានសេចក្តីណែនាំលម្អិតរបស់ក្រសួងអប់រំ យុវជននិងកីឡា ខាងក្រោមនេះ៖
